Yobo 39:1-30
39 “Bushe walishiba inshita ilyo ifibushi mabwe fifyala abana?+
Bushe walimonapo uko insebula shilepaapa?+
2 Bushe ulapenda imyeshi iipitapo pa kuti shipaape?
Bushe walishiba inshita iyo shifyalilapo?
3 Shilafukamako pa kupaapa,Kabili ubukali ubo shumfwa pa kupaapa bulapwa.
4 Utwana twa shiko tulakosa kabili tukulila mu mpanga;Nga twaya tatubwelela kuli banyinabo.
5 Nani uwalekele impunda ya mu mpanga ileyendela fye,+Kabili nani uwakakwile impunda ya mu mpanga?
6 Naipangiile iciswebebe ukuti cibe e ng’anda ya ikoNe cifulo ca mucele ukuti e mo ileikala.
7 Taikala mupepi no musumba umwaba icongo;Tayumfwa ishiwi lya uleyeba ukuti iye mu kubomba.
8 Ilendauka mu mpili pa kuti isange umulemfwe,Ifwayafwaya ifimenwa ifiteku.
9 Bushe imboo kuti yasumina ukukubombela?+
Bushe kuti yaikala ubushiku bonse mwi tanga lyobe?*
10 Bushe kuti wakakila imboo ku ntambo pa kuti pa kulima ilekupangila imikolwa,Nelyo bushe kuti yalakukonka pa numa pa kuti ilime mu mupokapoka?
11 Bushe kuti waicetekela pa mulandu fye wa kuti yalikwatisha amakaNelyo bushe kuti waileka yabomba umulimo obe uwakosa?
12 Bushe kuti waicetekela ukuti ikakuletela ku ng’anda ifyo wasombola,*No kuti ikafitwala apo upumina ingano?
13 Amapindo ya kwa mwakatala yalapampaila bwino,Lelo bushe kuti yalingana na ya kwa kabaso?+
14 Pantu asha amani yakwe panshi,No kuyashiika mu mushili pa kuti yalekwata icikabilila.
15 Alalaba ukuti nga banyantapo kuti yatobekaNelyo inama mpanga kuti yanyantaulapo.
16 Tasunga bwino abana bakwe, baba fye kwati te bakwe;+Tasakamana ukuti filya acula pa kubikila amani kuti fyaba fya fye.
17 Pantu Lesa alimutanine* amanoKabili tamulengele aba na mano ya kwiluka.
18 Lelo ilyo aima, apampaila na mapindo yakwe,Alaseka kabalwe no uninapo.
19 Bushe niwe upeela kabalwe amaka?+
Bushe niwe umufwika amasense pa mukoshi?
20 Bushe kuti wamulenga alacilauka nga makanta?
Iciunda ca mwela uo apuuta mu myona yakwe cilatiinya.+
21 Alanyantaula umushili mu mupokapoka, kabili alasekelela nga nshi pa maka akwata;+Alaya mu kulwa inkondo.*+
22 Alaseka umwenso, kabili tatiina nangu cimo.+
Tabwelela ku numa nga amona ulupanga.
23 Akamufuko ka mifwi nga kauma kuli kabalwe imifwi iibamo ilapanga icongo,Ifumo na kalifumo filabeeka.
24 Apo alafwaisha ukuya ku nkondo alabutukisha* pa kuya ku nkondo,Teminina nangu aumfwa ukulila* kwa ntandala.
25 Intandala nga yalila, atila, ‘Eya!’
Alanunsha inkondo ninshi ali ukutaliKabili alomfwa ukupunda kwa bakalamba ba bashilika no kuwelesha kwa nkondo.+
26 Bushe niwe wasambilishe pungwa ifya kulelemba mu muulu,Ne fya kufungulwila amapindo ku kapinda ka ku kulyo?
27 Nelyo bushe niwe weba kapumpe ukupupukila mu muulu+No kupangila icinsa cakwe apasansuka,+
28 Ukuti ubushiku alesendama pa cilibwe icitali,Mu cisansala cakwe icacingililwa icaba pa cilibwe?*
29 Palya e po amwena ico engalya;+Amenso yakwe yalamona apatali.
30 Utwana twakwe tunwa umulopa;Kabili konse ukuli icitumbi, e ko aya.”+
Amafutunoti
^ Nelyo “ mu mulimba obe.”
^ Mu ciHebere, “imbuto.”
^ Mu ciHebere, “amulengele alaba.”
^ Mu ciHebere, “Alaya mu ku kumanya ifyanso.”
^ Mu ciHebere, “alamina imilundu (umushili).”
^ Nelyo kuti yapilibula no kuti, “tasumina ukuti intandala nailila.”
^ Mu ciHebere, “pe lino lya cilibwe.”
