Yobo 6:1-30
6 Lyena Yobo ayaswike ati:
2 “Kanshi ukukalipwa kwandi+ nga kuti bakupimaKabili nga kuti bakubika pa masekelo pamo no bucushi bwandi!
3 Pantu nomba ukukalipwa kwandi nakufina ukucila umucanga wa muli bemba.
E mulandu wine ndelandila icilandelande.*+
4 Pantu imifwi ya Wa Maka Yonse naindasa,Umupashi wandi ulenwa ubusungu+ bwa iko;Lesa alensansa kabili ndi no mwenso.
5 Bushe impunda ya mu mpanga+ kuti yalila nga naikwata umulemfwe wa kulya,Nelyo bushe ing’ombe kuti yalila nga naikwata ifya kulya fya iko?
6 Bushe kuti mwalya ifya kulya ifyatalalila umwabula umucele,Nelyo bushe amenshi ya mu mumbu tayatalalila?
7 Ninkaana* ukulya ifya kulya fyonse ifyaba nge fi.
Fili nge fiko ifyo babikile mu fya kulya fyandi.
8 Iye kanshi nga bampeela ico nalombaKabili Lesa nga ampeela ico ndefwaya!
9 Ukuti Lesa engasumina ukunshonaula,Kabili engafungulula ukuboko kwakwe no kunjipaya!+
10 Nangu ifi fyacitika kuti nasansamuka;Kuti nasekelela nangu ca kutila kuti naumfwa ubukali,Pantu nshakaana amashiwi ya Wa Mushilo.+
11 Bushe ninkwata amaka ya kulalolela fye?+
Kabili finshi ndelolela pa kuti ntwalilile ukuba no mweo?*
12 Bushe nakosa nge libwe?
Nelyo bushe umubili wandi wa mukuba?
13 Bushe ninkwata amaka ya kuyafwa,Apo abakungafwa bonse balibatalusha kuli ine?
14 Onse uushilanga umuntu munankwe+ ukutemwa ukushipwaAkaleka ukutiina Uwa Maka Yonse.+
15 Bamunyinane tabacetekelwa,+Baba nga menshi ya mu kamana mainsa, ayakama mu lusuba.
16 Yalifiita pa mulandu na menshi makaasa,Kabili muli yena e mo amenshi makaasa ayalesunguluka yafisama.
17 Mu kupita kwa nshita utumana mainsa tulakama kabili tulaloba;Mu lusuba amenshi ya tuko yalakama.
18 Balatupaatula, amenshi yatendeka ukuya mu ciswebebe;Kabili yalakama.
19 Abalendo ba ku Tema+ balafwaya utumana mainsa;Abalendo ba ku Sheba*+ balatulolela.
20 Baumfwa insoni pantu balicetekele ukuti balasanga amenshi;Ilyo baileko tabasangile ifyo bale-enekela.
21 Ifi fine e fyo na imwe muli kuli ine;+Namumona ubucushi nkwete, lelo tamulengafwa.+
22 Bushe nalimulombapo fimo;
Nelyo nalimwebapo ukuti mubuulepo pa fyuma fyenu mumpeeleleko umo ubupe?
23 Bushe nalimwebapo ukuti mumpusushe* ku mulwaniNelyo ukuti mumpusushe ku bancusha?
24 Nsambilisheni, na ine nalaikala tondolo+ ndekutika;Lekeni njishibe icilubo nacita.
25 Amashiwi ya cine tayakalifya mutima!+
Lelo bushe mulingile ukunungika?+
26 Bushe mulefwaya ukunungika pa fyo nandile,Amashiwi umuntu uwapelelwa alandile+ ayo umwela usenda?
27 Mukapendwila na pa mwana wa nshiwa+Kabili mukashitisha* cibusa wenu!+
28 E ico nomba pilibukeni mundoleshe,Pantu nshamubepe.
29 Tontonkanyenipo na kabili, mwilampeela imilandu ya bufi,Tontonkanyenipo na kabili, pantu ncili umulungami.
30 Bushe mulemona ukuti ifyo ndelanda tafili bwino?
Bushe mulemona ukuti te kuti njiluke ukuti ifyo ndelanda fibi?
Amafutunoti
^ Nelyo “ndelanda ukwabula ukutontonkanyapo.”
^ Nelyo “umweo wandi naukaana.”
^ Nelyo “pa kuti ntantalishe ubumi bwandi.”
^ Nelyo “ibumba lya balendo abena Sebea.”
^ Mu ciHebere, “mundubule.”
^ Nelyo “mukakabusha.”
