Yobo 9:1-35
9 Yobo ayaswike ati:
2 “Ca cine ninjishiba ukuti ifyo walanda fya cine.
Nomba bushe umuntu umwina kufwa kuti aba umulungami nga alubulula na Lesa?+
3 Umuntu nga alefwaya ukulubulula na Lesa,*+Te kuti asukepo icipusho nangu cimo pa mepusho 1,000 ayo Lesa engamwipusha.
4 Wa mano nga nshi,* alikosa kabili wa maka.+
Nani engamulwisha ukwabula ukuti acenekwe?+
5 Alasesha impili* ukwabula nangu umo ukuti eshibe;Alashiwisha nga afulwa.
6 Alalenga isonde lyasunkana,Ica kuti inceshi sha liko shilatenkana.+
7 Aleba akasuba ukuti kebalikaKabili alafimba pa ntanda pa kuti shisanika;+
8 Afungulula imyulu nge nsalu,+Kabili anyantaula pa mabimbi ayakalamba aya pali bemba.+
9 Apangile intanda sha Ashi,* isha Kesili* ne sha Kima,*+E lyo na mabumba ya ntanda aya ku kapinda ka ku kulyo aka muulu;*
10 Alacita ifintu ifikalamba ifyo tushingomfwikisha,+Ne fipesha amano ifishingapendwa.+
11 Apita apo ndi, lelo nshimumona;Nshishiba ne lyo apita pali ine.
12 Nga apoka umo fimo, nani engamukaanya?
Nani engamweba ukuti, ‘Cinshi mulecita?’+
13 Lesa takabweshemo ubukali bwakwe;+Nabafwilisha Rahabu*+ bakafukamina Lesa.
14 Nga namwasuka kuti acilanapo ukukalipaE ico mfwile ukusala bwino amashiwi pa kulanda nankwe!
15 Nangu ca kuti nshili no mulandu te kuti imwasuke.+
Kuti nalomba fye kapingula* wandi ukuti ambelele uluse.
16 Nga nalilila kuli ena, bushe kuti angasuka?
Ndemona kwati te kuti atemwe ukumfwa ishiwi lyandi,
17 Pantu anshonawila ku mfula ya mwela uukalambaKabili afusha ifilonda fyandi apabula umulandu.+
18 Taleka nakwatako inshita ya kupeema;Atwalilila fye ukundetela amafya.
19 Nga kwaliba uwakwata amaka, Lesa e wacilapo ukukwata amaka.+
Nga kwaliba uwa mulinganya, Lesa atila: Nani engampeela umulandu?*
20 Nangu ningaba uwabula umulandu, akanwa kandi kuti kampeela umulandu;Nangu ningatwalilila ukuba uwa kaele,* kuti ampeela umulandu.*
21 Nangu ningatwalilila ukuba uwa kaele,* nshaicetekela;*Nalipata* umweo wandi.
22 Tapaba ubupusano. E co nandila nati,‘Uwa kaele* no mubifi, bonse alabalofya.’
23 Ilyeshi nga lyaipaya abantu mu kupumikisha,Alaseka aba kaele abalecula.
24 Alipeela ababifi+ isonde;Afimba pa menso ya bakapingula.
Nga te ucita ifi, ninshi nani uuficita?
25 Nomba inshiku shandi shilapita ulubilo ukucila uulebutuka;+Lelo nshamonapo icisuma.
26 Shilabutukisha nga mato ya matete,Kabili nga filya bakapumpe bafookela ico balefwaya ukwikata.
27 Nangu ningalanda ukuti, ‘Nalalabako ku macushi yandi,Kabili nalaleka ukumoneka uwa bulanda,’
28 Kuti natwalilila ukutiina pa mulandu wa kucula kwandi konse,+Kabili ninjishiba ukuti tamwakalemona ukuti ndi wa kaele.
29 Mukansanga no mulandu.*
E ico cinshi ningalaicushisha fye ukulalanga ukuti ndi wa kaele?+
30 Nga nasamba mu menshi makaasa ayasungulwike,Kabili nga nasamba iminwe yandi mu menshi ayo babikilemo imito,+
31 Lyena mukanyingisha mu cilindi umwaba amatipa,Ica kuti ifya kufwala fyandi fikankaana.
32 Pantu te muntu nga ine uwa kuti njasuke,Kabili uo twingalubulula nankwe mu cilye.+
33 Takuli umuntu nangu umo uwingatulubulwisha,*Uwingaba kapingula* wesu.
34 Nga kuti aleka ukumpumaE lyo aleka no kuntiinya,+
35 Lyena kuti nalanda nankwe ukwabula umwenso,Pantu nshiba no mwenso pa kulanda.
Amafutunoti
^ Nelyo “nga atwala Lesa ku cilye.”
^ Mu ciHebere, “wa mano mu mutima.”
^ Nelyo “alafumya impili apo shaba.”
^ Nalimo ili ibumba lya ntanda ni lilya beta ukuti Great Bear constellation (Ursa Major).
^ Nalimo ili ibumba lya ntanda ni lilya beta ukuti Orion constellation.
^ Nalimo ishi intanda ni shilya beta ukuti Pleiades stars ishaba mwi bumba lya ntanda ilyo beta ukuti Taurus constellation.
^ Mu ciHebere, “imiputule ya mu kati iya ku kapinda ka ku kulyo.”
^ Nalimo uyu Rahabu ni shimweshimwe wa muli bemba.
^ Nelyo kuti lyapilibula no kuti, “uo ndelubulula nankwe mu cilye.”
^ Mu ciHebere, “nani enganjita ku cilye?”
^ Nelyo “Nangu ningaba umufumacumi.”
^ Nelyo “kuti anjeba ati nshili mufumacumi.”
^ Nelyo “nshatemwa; nakaana.”
^ Nelyo “nshaishiba umweo wandi.”
^ Nelyo “Nangu ningaba umufumacumi.”
^ Nelyo “abatwalilila ukuba aba cishinka.”
^ Mu ciHebere, “mukamona ukuti ndi mubifi.”
^ Nelyo “uwingaba kawikishanya.”
^ Mu ciHebere, “uwingabika ukuboko kwakwe pali ifwe babili.”
