Ukulingana ne fyo Yohane Ailembele 9:1-41
9 Ilyo alepita, amwene umwaume uwafyelwe impofu.
2 Kabili abasambi bakwe bamwipwishe abati: “Rabi,*+ nani wabembwike pa kuti uyu muntu afyalwe impofu? Bushe ni uyu wine nangu bafyashi bakwe?”
3 Yesu abaswike ati: “Uyu muntu tabembwike na bafyashi bakwe bene tababembwike, lelo ico afyalilwe impofu ni pa kuti abantu bamone imilimo ya kwa Lesa.+
4 Tufwile ukubomba imilimo ya wantumine ilyo tabulaila;+ inshita ya bushiku ileisa ilyo umuntu nangu umo ashingabomba.
5 Ilyo ncili mu calo, nine lubuuto lwa calo.”+
6 Pa numa ya kulanda ifi fintu, afwishiile amate panshi, akasa iloba na mate, e lyo asuba uyu muntu pa menso+
7 kabili amwebele ati: “Kabiye kasambe mu cishiba ca Siloamu” (ili ishiwi nga balipilibula lyalola mu kuti “Amenshi Ayatumwa”). Na o alile, asamba kabili abwelele ninshi alemona.+
8 Lyena abena mupalamano na balemumona kale alelomba, batendeke ukulanda abati: “Bushe uyu muntu te waleikala alelomba?”
9 Bamo baleti: “Ni uyu wine.” Bambi nabo baleti: “Awe, bapalana fye.” E lyo umwine aleti: “Nine wine.”
10 E ico bamwipwishe abati: “Nomba amenso yobe yashibwilwe shani?”
11 Na o abaswike ati: “Umuntu uwe shina lya kuti Yesu e wacikasa iloba, anshinga pa menso e lyo anjeba ati, ‘Kabiye ku Siloamu usambe.’+ E fyo na ine naciyasamba, natampa no kumona.”
12 E ico bamwipwishe abati: “Ali kwi uyo wine muntu?” Na o atile: “Nshishibe.”
13 Lyena batwele uyu muntu uwali impofu kale ku baFarise.
14 Cali fye nkuma ukuti ilyo Yesu akashile iloba ashibula na menso+ ya uyu muntu, bwali bushiku bwe Sabata.+
15 E ico abaFarise nabo batendeke ukumwipusha ifyo atendeke ukumona. Na o abebele ati: “Ambikile iloba pa menso, e lyo nayasamba, natampa no kumona.”
16 Lyena abaFarise bamo batampile ukulanda abati: “Uyu muntu tafuma kuli Lesa, pantu tasunga Isabata.”+ Lelo bamo baleti: “Bushe umuntu umubembu kuti acita shani ifipesha amano fya musango uyu?”+ E ico balipusene ifyo balelanda.+
17 Na kabili baipwishe uyu mwaume uwali kale impofu abati: “Bushe uletipo shani pali ena, apo niwe ashibwile amenso?” Na o abaswike ati: “Ni kasesema.”
18 Lelo abaYuda tabasumine ukuti ulya muntu ali ni mpofu kale no kuti balimushibwile amenso. Basukile baita abafyashi bakwe.
19 Kabili babepwishe abati: “Bushe uyu e mwana wenu uo mutila afyelwe impofu? Nomba cinshi cilengele alemona?”
20 Abafyashi bakwe ba-aswike abati: “Ca cine uyu mwana wesu kabili afyelwe impofu.
21 Lelo tatwishibe icilengele atendeke ukumona, tatwishibe no wamushibwile amenso. Mukalamba. Mwipusheni. Afwile ukuilandila umwine.”
22 Ico abafyashi bakwe balandiile ifi, ni co baletiina abaYuda,+ pantu abaYuda balyumfwene ukuti umuntu nga asumina ukuti Yesu e Kristu, balingile ukumutamfya mwi sunagoge.+
23 E mulandu wine abafyashi bakwe balandiile abati: “Mukalamba. Mwipusheni umwine.”
24 E ico baitile uyu muntu uwali impofu pa muku walenga bubili e lyo bamweba abati: “Ulecindika Lesa; natwishiba ukuti uyu muntu mubembu.”
25 Na o abebele ati: “Nampo nga mubembu nelyo iyo, ine nshishibe. Ico ine njishibe fye ca kuti kale nali impofu, nomba ndemona.”
26 Lyena bamwipwishe abati: “Cali shani? Akushibwile shani amenso?”
27 Na o abaswike ati: “Nimweba kale, lelo tamumfwile. Cinshi mulefwaila ukumfwa na kabili? Bushe na imwe mulefwaya ukuba abasambi bakwe?”
28 Lyena balimuponteele abati: “Uli musambi wakwe, lelo ifwe tuli basambi ba kwa Mose.
29 Ifwe twaishiba ukuti Lesa alandile na Mose, lelo uyu muntu tatwaishiba uko afuma.”
30 Na o abebele ati: “Kwena mwampapusha, amuti tamwishibe uko afuma, uwanshibwile amenso!
31 Twalishiba ukuti Lesa tomfwa ku babembu,+ lelo umuntu nga alatiina Lesa kabili alacita ifyo afwaya, alamumfwa.+
32 Ukufuma na kale tatwabala atumfwapo ukuti kwali uwashibwile amenso ya muntu uwafyelwe impofu.
33 Nga ca kuti uyu muntu tafuma kuli Lesa, te kuti acite nangu cimo.”+
34 Nabo bamwebele abati: “Iwe wafyalilwe mu lubembu, niwe wingalatusambilisha?” E ico bamutamfiishe panse!+
35 Yesu alyumfwile ukuti balimutamfiishe panse, kabili ilyo amusangile amwipwishe ati: “Bushe nautetekela Umwana wa muntu?”
36 Uyu mwaume atile: “Bushe nani uyo wine mukwai pa kuti imutetekele?”
37 Yesu amwaswike ati: “Naumumona, na kuba e ulelanda na iwe.”
38 E lyo atile: “Namutetekela, mwe Shikulu.” Kabili alimufukamiine.*
39 Lyena Yesu alandile ati: “Ico naishile pano calo, ni mu kuti abantu bapingulwe, pa kuti abashimona balemona+ e lyo abamona babe impofu.”+
40 Bamo abaFarise abali nankwe balyumfwile ifi alandile, kabili bamwipwishe abati: “Bushe na ifwe tuli mpofu?”
41 Yesu abaswike ati: “Amuba impofu, nga tamwaba no lubembu. Lelo mutila, ‘Tulamona.’ Kanshi mucili no lubembu.”+
