Yoshua 2:1-24
2 Lyena Yoshua umwana wa kwa Nuni atumine abaume babili mu bumfisolo ukufuma ku Shitimu+ abakuyalengula icalo. Abebele ati: “Kabiyeni kalenguleni icalo, maka maka umusumba wa Yeriko.” E ico balile kabili bailefikila ku ng’anda ya mwanakashi cilende, ishina lyakwe ni Rahabu,+ kabili e ko baikele.
2 Kabili imfumu ya Yeriko baliyebele ukuti abaume abena Israele nabesa ubushiku mu kulengula icalo.
3 E ico imfumu ya Yeriko yatumine abakuyaeba Rahabu ati: “Fumya abaume abeshile, abaleikala mu ng’anda yobe, pantu beshile mu kulengula icalo conse.”
4 Nomba Rahabu alifishile balya abaume babili. Lyena atile: “Ca cine abaume bacisa kuli ine, lelo nshacishiba uko bacifuma.
5 Nomba ilyo kwacifiita ninshi bali mupepi no kwisala impongolo, balya baume bacifuma. Nshishibe uko bele, lelo nga mwabakonka ulubilo, mwalabasanga.”
6 (Lelo abafishile pa mutenge mu tumuti balefundako ulushishi lwa kupangila insalu uto batuulike pa mutenge.)
7 E ico balibakonkele ulubilo ukulola ku fyabu fya Yordani,+ kabili ilyo fye abalebakonka bafumine, balisele impongolo.
8 Ilyo abaume bashilasendama, aile kuli bena pa mutenge.
9 Kabili abebele ati: “Ninjishiba ukuti Yehova akamupeela cino calo+ kabili tulemutiina.+ Bonse abekala muli cino calo nabasakamikwa nga nshi pa mulandu wenu,+
10 pantu twalyumfwa ifyo Yehova akamishe amenshi ya muli Bemba Wakashika ilyo mwafumine mu Egupti,+ ne fyo mwacitile imfumu shibili isha bena Amore, Sihone+ na Oge,+ isho mwalofeshe bushilya* bwa Yordani.
11 Ilyo twaumfwile ifi, twalisakamikwe nga nshi,* kabili bonse tulamutiina sana,* pantu Yehova Lesa wenu e Lesa mu muulu na pano isonde.+
12 Nomba lapeni kuli ine mwi shina lya kwa Yehova ukuti, apo nimulanga ukutemwa ukushipwa, na imwe mukalanga aba mu lupwa lwa kwa tata ukutemwa ukushipwa; kabili mufwile ukumpeela icishibilo ca kuti mukacita ifyo mwalalaya.
13 Tamufwile ukwipaya batata na bamayo, bandume yandi na bankashi nandi, na bantu babo bonse, lelo mufwile ukutupususha.”*+
14 Lyena balya baume bamwebele abati: “Nga tatwakacite ifyo twalalaya ninshi ni fwe tukafwilamo te imwe iyo!* Nga tamwebeleko bambi ico twishiile kuno, ninshi tukamulanga ukutemwa ukushipwa kabili tukaba aba cishinka kuli imwe ilyo Yehova akatupeela cino calo.”
15 Pa numa abekishishe ku ntambo pe windo, pantu ing’anda yakwe yalisuntinkene ne cibumba ce linga. Na kuba, aleikala pe linga.+
16 Lyena abebele ati: “Kabiyeni ku citungu ca mpili, e ko muyebelama pa nshiku shitatu pa kuti abalemufwaya bemusanga. Abalemufwaya nga babwela, kuti mwabwelelamo uko mwafumine.”
17 Aba abaume bamwebele abati: “Tukaba fye aba kaele kuli uyu mulapo uo walenga twalapa+
18 nga ca kuti ilyo tukesa mu calo tukasange naukaka iyi ntambo yakashika ce pe windo ilyo uletwikishishapo. Ulingile ukwingisha bawiso, banoko, bamunonko na balupwa lwa bawiso bonse mu ng’anda yobe.+
19 Lyena onse uukafumina kunse ya ng’anda yobe, umulopa wakwe ukaba pa mutwe wakwe, lelo ifwe tukaba aba kaele. Nomba nga ca kuti icabipa cikacitikila* umo pa bo ukaba nabo mu ng’anda, ninshi umulopa wakwe ukaba pa mitwe yesu.
20 Nomba nga wasokolola ico twishiile kuno,+ tukaba aba kaele ku mulapo uo walenga ukuti tulape.”
21 Na o abebele ati: “Nacikabe ifyo fine mwalanda.”
E ico alibalekele baya. Pa numa akakile intambo yakashika ce pe windo.
22 E ico balile ku citungu ca mpili kabili baikeleko inshiku shitatu, mpaka abalebafwaya babwelako. Balibafwaile mu nshila shonse, lelo tababasangile.
23 Lyena aba abaume babili batentemwike icitungu ca mpili kabili ba-abwike umumana, babwelela na kuli Yoshua umwana wa kwa Nuni, kabili bamushimikile fyonse ifyabacitikile.
24 Lyena baebele Yoshua abati: “Yehova natupeela icalo conse.+ Na kuba, bonse abekala muli ici icalo nabasakamikwa nga nshi pa mulandu wesu.”+
Amafutunoti
^ E kutila, lwa ku kabanga.
^ Mu ciHebere, “imitima yesu yalisungulwike.”
^ Mu ciHebere, “kabili takuli umuntu uwakwata umupashi.”
^ Nelyo “ukupususha imyeo yesu.”
^ Nelyo “imyeo yesu e ikafwa te imwe!”
^ Nelyo “nga ca kuti ukuboko kwesu kukesa pali.”
