Kalata ya kwa Yuda 1:1-25
1 Ine ne Yuda, ne musha wa kwa Yesu Kristu, kabili munyina wa kwa Yakobo,+ nalembela imwe mwe baitwa,+ abo Lesa Shifwe atemwa kabili abo asungila Yesu Kristu:+
2 Shi Lesa nacilepo ukumulanga uluse, umutende no kutemwa.
3 Mwe batemwikwa, nangu ca kutila nalefwaisha ukumulembela pa fyo tukapusuka bonse,+ namona ukuti mfwile ukumulembela pa kuti imukonkomeshe ukuti mulelwisha na maka, pa kuti mutwalilile ukuba ne citetekelo+ ico aba mushilo bapeelwe umuku wa limo.
4 Pantu abantu bamo nabengila muli imwe mu bucenjeshi, abo Amalembo yasobele ukuti bali no kupingulwa. Aba bantu abashitiina Lesa, balasangula icikuuku ca kwa Lesa wesu ukuba akabepekesho ka kucitilamo ifya nsoni*+ kabili balakaana cibinda wesu umo fye kabili Shikulwifwe, Yesu Kristu.+
5 Nangu mwalishiba fyonse kale, ndefwaisha ukumwibukishako ukuti, nangu ca kuti Yehova* alipuswishe abantu ilyo abafumishe mu calo ca Egupti,+ pa numa alyonawile abashali ne citetekelo.+
6 Na kabili bamalaika abashatwalilile pa fifulo fyabo ifyo bakwete pa kubalilapo, kabili abafumine uko balingile ukulaikala,+ abasungila mu cifungo ca pe umwafiita fititi pa kuti akabapingule pa bushiku bukalamba.+
7 Abena Sodomu na Gomora na baali mu misumba iyali mupepi, nabo bacitile ubulalelale* ubwabipa nga nshi, kabili bali no lunkumbwa ulushili lwa cifyalilwa.+ Filya Lesa abalofeshe umuyayaya ku mulilo,+ cilangililo ca kutusoka.
8 Nangu ca kuti kwaliba ifi ifya kutusoka, aba bantu nabo, bale-elenganya ifya kwelenganya, balekowesha umubili, balesuula abatungulula, kabili balesaalula abo Lesa acindamika.+
9 Lelo ilyo Mikaele+ malaika mukalamba+ apusene na Satana Kaseebanya no kuumanina pa citumbi ca kwa Mose,+ tamupingwile kabili tamusaalwile,+ lelo atile: “Yehova* akukalipile.”+
10 Lelo aba bantu bena balaponta pa fintu fyonse ifyo bashaishiba+ no mo fyalola. Kabili fyonse ifyo baishiba, baafishibila mu musango inama+ ishishaba na mano shishibilamo ifintu, kabili ifi fine e filebonaula.
11 Ndeumfwila aba bantu ubulanda, pantu bapashanya Kaini,+ kabili baliluba nga filya Balaamu+ uwalefwaya ukupoka icilambu alubile, kabili bakaloba pantu balapondokela+ abatungulula nge fyo Kora acitile!+
12 Aba bantu balalya pamo na imwe mu mitebeto+ mukwata iya kulanga ukutemwana, lelo baba nga mabwe ayashimoneka mu menshi. Ni bakacema abailiisha abene ukwabula umwenso;+ makumbi yabulamo amenshi ayasendwa ku mwela;+ fimuti ifishitwala ifisabo mu nshita ya fiko, ifyafwililila,* kabili ifyo bashula;
13 ifya nsoni+ ifyo bacita filamoneka nga filya fine amabimbi ayakali aya pali bemba yasha amafulo ayalamba; baba nge ntanda ishendauka, isho basungila ukupoosa mu mfifi iyafiitisha iya muyayaya.+
14 Aba, e bo Enoke+ uwalenga 7 ukutula pali Adamu na o alandilepo, ilyo aseseme ati: “Moneni! Yehova* aishile ne minshipendwa*+ ya ba mushilo bakwe,
15 ku kupingula bonse,+ no kushinina bonse abashitiina Lesa pali fyonse ifyabipa ifyo bacitile, na pa fya bunani fyonse ifyo ababembu abashitiina Lesa balandile pali ena.”+
16 Aba, bantu abailishanya,+ abailishanya pa mikalile yabo, abacita ifyo imitima yabo iya lunkumbwa ifwaya,+ abo utunwa twabo tulanda ifya matutumuko, uku ninshi balecindika* abantu bamo pa kuti bamwenemo.+
17 Lelo imwe, mwe batemwikwa, ibukisheni amashiwi ayo abatumwa ba kwa Shikulwifwe Yesu Kristu balandile,*
18 ayo balemweba abati: “Ku nshita ya ku mpela kukaba abakalapumya, abakalakonkelela fye ulunkumbwa lwabo ulwa kucita ifyabipa.”+
19 Aba e baleta amalekano,+ bantu abacita ifintu kwati ni nama, abashitungululwa no mupashi wa kwa Lesa.
20 Lelo imwe, mwe batemwikwa, ikosheni mwe bene pa mufula wa citetekelo cenu ica mushilo sana, kabili muleleka umupashi wa mushilo+ ulemutungulula ilyo mulepepa amapepo,
21 pa kuti mwikalilile mu kutemwa kwa kwa Lesa,*+ ilyo mulelolela uluse lwa kwa Shikulwifwe Yesu Kristu ulukalenga mukabe+ no mweo wa muyayaya.
22 Kabili twalilileni ukuba no luse+ ku batwishika;+
23 basompoleni mu mulilo pa kuti mubapusushe.+ Bambi mulebomfwila uluse, nomba mulecenjela ilyo mulecita ifi, kabili mulepata imibele yabo iyakantaikwa ne membu.*+
24 Nomba ku uli na maka ya kumucingilila pa kuti mwiwa kabili mwiba na kalema+ kuli Lesa wesu uwa bukata,* kabili mulesekelela nga nshi,
25 kuli Lesa umo fye Umupusushi wesu muli Yesu Kristu Shikulwifwe, kube umucinshi, ubukata, amaka, na bukateka ukufuma umuyayaya, ukufika pali ino nshita no muyayaya. Ameni.
Amafutunoti
^ Nelyo “ukucita ifyabipa ukwabula insoni.” Mu ciGriki paba ati, a·sel′gei·a. Moneni Amashiwi ya mu Baibo ne fyo Yapilibula.
^ Moneni Ifyebo Fyalundwako pa A5.
^ Moneni Ifyebo Fyalundwako pa A5.
^ Mu ciGriki, “ifyafwa libili.”
^ Moneni Ifyebo Fyalundwako pa A5.
^ Nelyo “amakana na makana.”
^ Nelyo “balelumbanya.”
^ Nelyo “basobele.”
^ E kutila, “ukulacita ifingalenga Lesa atwalilila ukumutemwa.”
^ Mu ciGriki, “mulepata ica kufwala icakantaikwa no mubili.”
^ Nelyo “mu bukata bwakwe.”