Nangu ca kuti pali lelo Intaneti tailaseeka mu Cuba, abantu kuti bakopolola ifyebo pa Intaneti mu fikuulwa ifyo kampani ya mafoni yakwata. Na lyo line, iyi kampani ilalipilisha indalama ishingi. E ico pa kuti bonse balenonkelamo mu fyaba pa jw.org, iofeshi lya musambo lyakoseleshe ifilonganino ukukwata kasabankanya umo uwa kulakopolola impapulo, amavidio, na fimbi ifyakopwa ifyaba pa Webu saiti no kulapeelako ba Nte banabo mu filonganino. Ifi bacita filebomba bwino sana.

Teona uuli ne myaka 10 no mwaice wakwe Tamuna uwa myaka 8 bekala ku Republic of Georgia. Aba bakashana balefwaya foni. Pa kubafwa ukushita foni, banakulwibo balibalaile ukulabapeelako indalama shimo isha penshoni cila mweshi. Ku ca bulanda, banakulwibo balifwile mu kupumikisha. Na lyo line, ulupwa lwabo lwapeele abakashana indalama isha kulekeleshako isha penshoni ya banakulwibo pa kuti bashitemo foni. Pa numa ya kutontonkanyapo sana, abakashana balembeele icilonganino ukuti: “Natwishiba ukuti mu milungu fye ibili ubukuule bwa Ing’anda yesu iya Bufumu mu T’erjola buli no kutendeka. Bamama balefwaisha ukwafwilisha ubu bukuule, kanshi ine no mwaice wandi tulefwaya tusangwile ku cilonganino indalama shonse isha kulekeleshako isha penshoni ya bamama, ukucila ukushitamo foni. Mukwai mukatukuulile Ing’anda ya Bufumu iisuma!”

Pa 17 January, 2014, munyinefwe Geoffrey Jackson uwa mwi Bumba Litungulula alikakwile Baibolo ya Amalembo ya Calo Cipya aya ciGriki aya Bwina Kristu mu ciTetum, ululimi ulo balanda sana mu Timor-Leste, mu musumba wa Dili. Kale, ni baKatolika fye abalepulinta no kusabankanya Amalembo ya mu ciGriki mu ciTetum, kabili balekaana ukushitishako ba Nte na abo baletunganya ukuti balesambilila Baibolo na ba Nte. Na lyo line, muli aya amaBaibolo baKatolika bapilibwile mwali ifilubo ifingi, balishilemo fimo, babomfeshe amashiwi aya kale kabili ayayafya ukumfwa, na mashiwi yamo balilufyenye ukuyapulinta. Ba Darren, bamishonari ababombela ku  Timor-Leste balandile pali Baibolo ya Amalembo ya Calo Cipya aya ciGriki aya Bwina Kristu ukuti: “AbaTimorese abengi nga babelenga fye iyi Baibolo balatemwa pa fyo yumfwika bwino, kabili balalomba amakope na yambi. Batila yalyanguka ukumfwa, kabili apo ifilembo fikalamba baliitemwa pantu na kuba mu mayanda ayengi mwaba fye amalaiti ayanono. Abengi abapokako amakope balitendeka ukusambilila Baibolo.”

Mu January 2014, umulimo wa kupilibula mu ciRomany ico balanda mu Macedonia walilundulwike. Ibumba lya bakapilibula lyalipangilwe kabili balibasuminishe ukulapilibula impapulo ukulakonka alufabeti ya ciRoman ne ya ciCyrillic. Ukupilibula muli uyu musango kuleyafwilisha sana abalanda iciRomany pantu na kuba babelesha alufabeti ya ciCyrillic, kabili iyi alufabeti e yaseeka mu Macedonia.

Abengi abalanda iciRomany balatasha sana pa fyo icilonganino  ca kwa Yehova cibapekanishisha impapulo mu lulimi lwabo. Nkashi umo atile: “Apo ululimi lwandi ciRomany, ilingi line, abantu ba mitundu imbi balinsuula, kanshi ndatasha sana Yehova pa fyo ancindamika pantu alampekanishisha ne mpapulo mu lulimi lwandi. Ici cilalenga napalama sana kuli ena.”

Ukutula pa 1 February, 2014, iofeshi lya musambo wa ku United States e lyatampile ukwangalila umulimo ku Jamaica na ku Cayman Islands. Ala ici calilenga ukuti bakasabankanya ukucila 1.2 milioni abo iofeshi lya musambo wa ku United States lyangalila baikatana! Na shimbi incende isho ili iofeshi lyangalila ni Bahamas, Bermuda, British Virgin Islands, U.S Virgin Islands, Puerto Rico, Turks and Caicos Islands ne fitungu 50 ifya mu U.S.A.

Bamunyinefwe na bankashi mu Japan balitwalilila ukukwata umupashi wa bupainiya, kabili ici calo e calenga bune pa fyalo ifyakwata bapainiya abengi sana. Pa kutendeka kwa mwaka wa mulimo uwa 2014, bakasabankanya 2,646 balitampile bupainiya, kabili bapainiya nomba bafikile 65,668. Mu March 2014, ukucila pali hafu ya bakasabankanya bonse, balibombeleko bupainiya bwa kwafwilisha.