ARMENIA Ubuteko Bwalisuminisha Aba Bwananyina Ukulabomba Incito ya Buteko Iishitungilila Ifya Bushilika pa Mulandu na Kampingu Yabo

Mu 2013, ubuteko bwa Armenia bwalibikileko programu iya kusuminisha Inte sha kwa Yehova muli ici calo ukulabomba incito ya buteko iishitungilila ifya bushilika ukucila ukubakaka nga bakaana incito iitungilila ifya bushilika pa mulandu wa kampingu yabo. Lipoti yafumine ku musambo wa ku Armenia yatile mu January 2014, bamunyinefwe 71 balitampile ukulabomba iyi incito. Ku ca kumwenako,  bamunyinefwe bamo babomba incito ya mu kicini nelyo ukwafwilisha ba nasi mu fipatala. Abangalila iyi incito balalanda ifisuma sana pa mibele iisuma iyo bamunyinefwe bakwata na pa fyo babomba bwino iyi incito nangu ca kuti yalikosa. Bamunyinefwe balatasha sana pali iyi programu iibasuminisha ukubomba incito iishitungilila ifya bushilika pa kuti bengatwalilila ukuba na kampingu iyasanguluka. * Munyinefwe umo atile, “Tulatootela sana Yehova pantu pali lelo kuti twabomba incito ya buteko iishitungilila ifya bushilika, iilenga twaba na kampingu iyasanguluka no kukwata ubuntungwa bwa kumupepa.”

DOMINICAN REPUBLIC Ubuteko Nabusuminisha Baeluda Ukulaufya pa Menga nge fyo Bwasuminisha BaKatolika

Mu 1954, ubuteko bwa Dominican Republic bwalisaine icipangano na baKatolika aba ku Vatican, icabapeele insambu sha kuti e calici lyeka fye ililingile ukulaufya pa menga. Nga ca kuti abalefwaya ukuupana tabalebofya kuli baKatolika, ninshi umulashi wa buteko kuti abofya. Lelo mu 2010, ubuteko bwalifumishe ifunde ilyapeele insambu intungulushi ishafikapo isha macalici na yambi isha kusuminisha ukulaufya abantu pa menga. Ubuteko bwalipekenye isukulu umo bonse abalefwaya ukulaufya pa menga bali no kusambilishiwa. Umusambo wa ku Dominican Republic walisalile baeluda 30 aba kuyasangwa kuli ili isukulu, kabili pa bantu ukucila 2,000 abalembeshe, basuminishepo fye abali 32. Icawemeko ca kuti, bamunyinefwe bonse 30 balibasuminishe ukulaufya pa menga ya ba Nte.

 INDIA Balashimikila Ukwabula Umwenso

Pa 27 January, 2014, icilye ca Karnataka State Human Rights Commission capingwile ukuti kapokola wa ku Old Hubli mu Karnataka, alikeele pa nsambu sha kwa munyinefwe Sundeep Muniswamy pantu alikene ukumucingilila ilyo ibumba lya bantu lyamusanshile pa 28 June, 2011. Icilye calipeele kapokola umulandu wa kwikala pa nsambu sha kwa munyinefwe kabili caebele no buteko bwa Karnataka ukusalapula uyu kapokola no kutila  alingile ukulipila munyinefwe icifuta mulandu amarupee 20,000 (mupepi na ZMK 2,000.00.) Icilye caebele ubuteko ukuti buleputula ishi ndalama ku malipilo ya kwa uyu kapokola.

Munyinefwe Muniswamy atile ena no lupwa lwakwe balatootela Yehova pali ifi icilye capingwile no kuti bali no kutwalilila ukulashimikila imbila nsuma ukwabula umwenso. Ifi icilye capingwile fyalikosha icitetekelo ca ba bwananyina kabili calilenga bacetekela mu maka ya kwa Yehova aya kucingilila abantu bakwe. Na kabili, fyalilenga abalashi bailuka ukuti balingile ukucingilila insambu sha ba Nte mu Karnataka. Lelo kwaliba umulandu bapeela munyinefwe Muniswamy na munyinefwe umbi uucili mu cilye, uwakuma ifi ifyacitike.

KYRGYZSTAN Icilye Cikalamba Calisumisha Ukutila Umuntu Kuti Akaana Ukwingila Ubushilika pa Mulandu na Kampingu Yakwe

Ubushiku bwa pa 19 November, 2013, bwali ubwacindama kuli bamunyinefwe abakaana ukwingila ubushilika pa mulandu na kampingu yabo. Icilye Cikalamba capingwile ukuti ifyo ubuteko bwa Kyrgyzstan bwalandile pa fyo abakaana ukwingila ubushilika balingile ukucita ifyabimbilemo na ba Nte 11 fyali kupula mwi funde. Ubuteko bwatile abakaana ukwingila ubushilika bafwile ukulalipila indalama ku bashilika isha kubafwilisha mu milimo yabo iya bushilika. Na kabili, ubuteko bwatile abakaana ukwingila ubushilika pa mulandu na kampingu yabo, nga bapwisha fye ukubomba incito iishili ya bushilika balingile ukulembesha ukuba mwi bumba lya bashilika abo beta fye nga balefwaikwa. Icilye catile ifi ubuteko bwalepatikisha abalekaana ukwingila ubushilika pa mulandu na kampingu yabo ukulabomba incito sha musango uyu, kubekala pa nsambu shabo isha kupepa. E ico, mu myeshi ya kutendekelako iya 2014, Icilye ca Supreme Court of Kyrgyzstan calikonkele ifyo Icilye Cikalamba capingwile kabili califumishe ba Nte 14 abo bakakile ukukonka ifunde lya kale. Ifi ifyo Icilye Cikalamba capingwile fyalilenga umulandu uo balubulwile pa myaka 7 upwe no kupeela abakaana ukwingila ubushilika insambu  sha kupepa pa mulandu na kampingu yabo. Ifyo aba bamunyinefwe bashipikishe fyalenga ishina lya kwa Yehova lyacindikwa kabili fyalilenga ne nsambu shesu isha kupepa mu Kyrgyz Republic shacindikwa.

NIGERIA “Yehova Alinambwile”

Mu citungu ca Abia ku Nigeria, ba Nte ilingi line balabatiinya no kubacusha pa mulandu wa kuti balakaana ukuibimba mu tubungwe twa mu mushi utwa bantu abapupa imipashi no kucita ifimfulunganya. * Bushiku bumo ulucelo, mu November 2005, aba mu kabungwe ka mu Asaga Ohafia balisanshile ba Emmanuel Ogwo na bena mwabo no kubasendela ifipe fyonse mu ng’anda kabili babele ukuti ifi fipe e malipilo ya kuba mu kabungwe. Ifyo bashele fye na fyo fya kufwala ifyo bafwele. Mu 2006, munyinefwe  Ogwo balimufumishe mu ng’anda no kumutamfya mu mushi. Ba Ogwo na bena mwabo babutukile ku mushi umbi uko baileikala pa ng’anda ya kwa munyinefwe umo uwatendeke ukubasunga. Nangu ca kuti munyinefwe Ogwo alibwelelemo ku mushi ku mwabo umwaka wakonkelepo, alitwalilile ukushipikisha ifyo balemupatikisha ukwingila mu kabungwe, alyeseshe ukuti bamubweseshe ifipe lelo balekaana.

Mu kulekelesha, pa 15 April, 2014, icilye ca Abia State High Court calipeele munyinefwe Ogwo insambu kabili catile ba Ogwo balikwete ne nsambu sha kusalapo akabungwe ako abene balefwaya kabili balikwete ne nsambu sha kupepa. Ifipe fya kwa munyinefwe Ogwo ifyo bamupokele balimubweseshe kabili pali nomba ba Nte tabalebacusha sana nge fyo cali kale. Aba bwananyina mu Asaga Ohafia nomba baleshimikila fye bwino ukwabula no wa kubatiinya.

Ilyo icilye cabilishe ifyo bapingwile, munyinefwe Ogwo atile: “Ala nalitolweke. Nalitemwe sana. Natile fye Yehova nacimfya kabili bamalaika baali na ine. Yehova alinambwile.”

RUSSIA Icilye Casuminisha Webu Saiti ya jw.org Ukutwalilila

Imilandu iingi iyo bamunyinefwe ku Russia balubulula yalilenga ‘imbila nsuma yalunduluka’ muli ici calo. (Fil. 1:12) Nangu ca kuti abalashi ba buteko ne ntungulushi sha mapepo balipampamina pa kukaanya ukupepa kwesu, aba bwananyina ku Russia balitwalilila ukuba aba kaele, kabili Yehova alebapaala nga nshi.

Ica kumwenako cimo, mulandu uo bacimfishe mu musumba wa Tver’. Mu 2013, bandubulwila ba buteko balitwele umulandu ku cilye pa kuti baleshe Webu saiti ya jw.org mu calo ca Russia conse. Ukwabula no kuti beshibisheko abeminishi ba Nte sha kwa Yehova pa kuti bakaye mu kulubulula, icilye capeele fye insambu aba bandubulwila. Ilyo bamunyinefwe baumfwile ili lyashi balicitile apilu. Pa 22 January, 2014, icilye ca Tver’ Regional Court catile icilye cinono calilufyenye kabili calisuminishe no kuti Webu saiti iya jw.org itwalilile mu Russia. Tuletasha sana Yehova na pa  mapepo ya ba bwananyina mwi sonde lyonse. Pali lelo, ba Nte ku Russia kuti banonkelamo mu fyebo fyaba pa jw.org.

TURKEY Ubuteko Bucili Bulakaana Ukupeela Bamunyinefwe Insambu sha Kukaana Ukwingila Ubushilika pa Mulandu na Kampingu Yabo

Ba Bariş Görmez, ba Nte abekala ku Turkey, balibakakile mu cifungo pa myaka ine pa mulandu wa kukaana ukwingila ubushilika. Ilyo babalindike, bakapokola balebacusha sana kabili balebapantaula no kubomina ku nkonto. Na kabili, kwali ifingi ifyo baleculako ilyo bali mu cifungo. Ku ca kumwenako, pa mulandu wa kuti ba Görmez baleepa amamita 2.1, balefilwa ukulaala bwino pa busanshi ubo babapeele. E co balebuula ubusanshi bubili e po bapindama ninshi nabafutubala. Mu kuya kwa nshita, abalashi ba cifungo balisuminishe ukuti munyinefwe kuti alalaala pali matresi iikalamba iyo icilonganino camuletele.

Mu 2008, munyinefwe Görmez na ba Nte banankwe batatu, balitwele umulandu ku cilye ca European Court of Human Rights uwa kuti ubuteko bwalibekele pa nsambu sha kupepa pa kukanacindika insambu shabo isha kukaana ukwingila ubushilika pa mulandu na kampingu yabo. Pa 3 June, 2014 aba bamunyinefwe bane * baliwinine umulandu kabili icilye catile ubuteko bwalingile ukubafuta pali fyonse ifyo bapooselepo pa kulubulula. Uyu e muku walenga butatu icilye ca European Court capeele ba Nte insambu no kupingula ukuti ubuteko bwa ku Turkey bwalilufyenye. Nangu ca kuti pali lelo takwaba ba Nte abo bakaka ku Turkey, uyu mulandu ukapwa fye ilyo ubuteko bukatendeka ukupeela insambu aba bwananyina abakaana ukwingila ubushilika pa mulandu na kampingu yabo.

Azerbaijan: Bakapokola kuli ici calo bacili balacusha aba bwananyina nga balelongana, balabakaanya ukupokelela impapulo shimo, balabekata nga baleshimikila no kubekala pa nsambu shimbi. Na kabili, ubuteko bucili bulakaana ukulembesha cipya cipya akabungwe ka Religious Community of Jehovah’s Witnesses muli ici calo. Bamunyinefwe balitwala icalo ca Azerbaijan ku cilye ca European Court of Human Rights pa miku 19. Nangu ca kuti kwaliba aya mafya, Yehova alepaala bamunyinefwe pantu impendwa ya bakasankanya ileilako fye pa muulu. Baibolo iituntulu iya Amalembo ya Calo Cipya iyafumine mu ciAzerbaijani nayo ilalenga aba bwananyina balesekelela.

Eritrea: Aba bwananyina muli ici calo balitwalilila ukubombela Yehova ne cishinka nangu ca kuti balabacusha sana. Bamunyinefwe batatu, Paulos Eyassu, Isaac Mogos, na Negede Teklemariam, balibakaka mu cifungo ukutula pa 24 September, 1994 kabili nomba napapita ne myaka 20. Pa 14 April, 2014 ilyo kwali Icibukisho ca mfwa ya kwa Kristu, abalashi ba buteko bwa ku Eritrea balikete ba Nte pamo na bambi abangilweko 150. Balikete abaice abali ne myaka ukutendekela pa mwaka umo ne myeshi ine ukufika ku bakalamba abacilile na pa myaka 85. Na kabili ilyo kwali ilyashi lyaibela pa 27 April, 2014 abalashi balikete ba Nte na bambi abasangilweko ukucila pali 30. Kwena abengi pali aba balibafumya.

Kazakhstan: Icipani ca buteko icilolekesha pa fya mapepo ica Agency for Religious Affairs calilesha impapulo 14 ukwingila mu calo nelyo ukushisabankanya ku bantu muli ici calo. Na kabili, aba bwananyina balibalesha ukulashimikila ku nse ya fifulo fya kulonganinamo ifyalembeshiwa, kabili bamunyinefwe nalimo 50 balibakaka pa mulandu wa kubabepesha ukuti balebomba bumishonari ukwabula insambu. Pa kucingilila insambu sha maisosele isho umuntu umo umo akwata, bamunyinefwe balitwala uyu mulandu ku cipani ca United Nations Human Rights Committee pa miku 26.