PA CIBELUSHI, pa 5 October, 2013, abantu 257,294 mu fyalo 21 balisangilweko ku kukumana kwa pa mwaka ukwalenga 129 ukwa Watch Tower Bible and Tract Society of Pennsylvania. Bamo baile kulya kwine ukwabelele ukukumana e lyo bambi baletamba fye pa Intaneti. Umulungu wakonkelepo, ba Nte na bambi balitambile programu yonse iyakopwa. Bonse abatambile iyi programu bali 1,413,676 mu fyalo 31 kabili uku e kwali ukulongana uko ba Nte abengi nga nshi basangilweko pa ilya nshita.

Ukutula muli ba 1920, Inte sha kwa Yehova balibomfya imilabasa na mafoni ukumfwilako ukulongana kukalamba mu fyalo ifingi. Muno nshiku, abantu abengi ukubikako fye  na bali ukutali sana kuti babomfya Intaneti ku kukutika no kutamba ifilecitika pali ilya ine nshita nelyo pa numa fye ya mamineti yanono.

Bakabomba ba pa maofeshi ya misambo iingi balibombeshe ukucila pa mwaka umo ukupekanya fyonse ifyalekabilwa pa kutambisha iyi programu. Pa 5 October, 2013, bamunyinefwe abalebombela pali uyu mulimo, ku Brooklyn, mu New York, babombele ubushiku na kasuba pa kuti bashininkishe ukuti bonse abalongene mu fyalo fyalekanalekana 15 pa nshita ishapusanapusana bakutika kuli programu ukwabula ubwafya.