Ilyo abena Israele bapuswike kuli Farao na bashilika bakwe pali Bemba Wakashika, balitootele sana Yehova. Na ifwe bene kuti twatootela Yehova. Ca cine, nga twaba na mafya, kuti twafuupulwa. Icingatwafwa pali iyi nshita, kulatontonkanya pa fyo twapaalwa.

 Ipaalo ilikalamba sana twakwata lisubilo lya kuti tukalubulwa kuli fyonse ifitukalipa ne fitusakamika. Nangu tucule shani, twalishininkisha ukuti Yehova takatushe fweka. Kacema wesu uwatutemwa alatupeela fyonse ififwaikwa pa kumubombela ne cishinka. Lyonse fye akulaba, ‘icubo cesu kabili amaka yesu, akulatwafwa lyonse ilyo tuli na mafya.’ (Amalu. 46:1) Nga tuletontonkanya pali aya mapaalo, tukaba na maka ya kushipikisha na mafya ayakalamba sana. E ico, mu mwaka fye onse, natuletontonkanya pa mapaalo twakwata kabili ‘natuletootela Yehova, pantu musuma; pantu icikuuku cakwe ca muyayaya.’—Amalu. 106:1.