MU LUPWA lwa ba German Gomera bafyelwe 11, e lyo bena e balenga 10. Pa numa ya mfwa ya bashibo na bankashi yabo babili, banyinabo ba Luisa, bakuushishe ulupwa lwabo lonse ku tauni. Kulya kwine e ko bailetampa ukupepa kwi calici lya baMennonite uko ba ndume yabo ne ndupwa shabo balepepa.

Ba German batile: “Mu 1962, bapainiya baibela, umulume no mukashi balishile mwi tauni. Caleumfwika ukuti aba bapainiya balesambilisha ‘ifisambilisho fya kwa Satana Kaseebanya.’ Lelo ilyo baishile ku ng’anda ya ba Piña, balibapokelele. Ulupwa lwa ba Piña lwali ulukalamba sana. Balitemenwe ifyo aba bapainiya baali ne mibele iisuma kabili aba cikuuku, kanshi balekutika sana ilyo balebashimikila. Icakonkelepo ca kuti ulupwa lwa ba Piña na bana bandi batatu abakalamba balitendeke ukusambilila Baibolo.

“Ubushiku bumo ilyo aba bapainiya batandalile ulupwa lwa ba Piña, balitileko na bamayo. Balibelengele Amalembo ayalanda pe subilo lya kwikala pano isonde umuyayaya. Bamayo baipwishe abati, ‘Nomba cinshi mu calici lyesu basambilishisha ukuti tulaya ku muulu?’ Ilyo munyinefwe  abaswike ukubomfya Baibolo no kubalondolwela ifyo Amalembo yalanda pa kubuuka, bamayo balyumfwile bwino kabili balitampile no kulashimikilako bambi ifyo basambilile.

“Ilyo bapasta ba ku Mennonite Church baishibe ukuti abantu ba mwi calici lyabo balesambilila Baibolo ne Nte sha kwa Yehova, balyeseshe ukubalesha. E lyo pa kubalesha, balebatiinya no kubatiinya. Ba Maximina, ba muka ba Piña babebele abati, ‘Namwishiba, ine ndi mukalamba, mfwile ukuisalila ifyo ndefwaya.’

“Na mu kulekelesha abantu 22 balilekele ukupepa kwi calici lya baMennonite, batampile no kulongana na ba Nte mu ng’anda iyo balesonkela. Mu 1965, bamayo balibatishiwe, ine nabatishiwe mu 1969 ninshi ndi ne myaka 13.”