Inte sha kwa Yehova nomba nababomba umulimo wa kushimikila mu Dominican Republic ukucila pa myaka 70. Pa myaka yonse iyi balipanga ishina ilisuma. Ilingi line, abantu balalomba bakasabankanya impapulo, kabili caliseeka ukumfwa uko abantu mu cifulo ca kubombelamo baleti: “Nalitemwa iyi imipepele” nelyo ukuti, “Mwe bantu imwe mulakonka ifyo Baibolo ilanda.”

Natulande pa cacitike ilyo kwali ukukuula Ing’anda ya Bufumu pa ncende iyo munyinefwe umo apeele aba bwananyina. Ilyo munyinefwe aile mu kulembesha iyi ncende asangile ukuti kwali umuntu umbi uwalembeshe incende mu bucenjeshi kabili aleti munyinefwe alefwaya ukumupoka iyi ncende. Uyu mulandu walipeseshe amano pantu uyu muntu alikwete na mapepala ayalelanga ukuti e wali umwine wa iyi ncende.

Pa nshita imo shicilye aipwishe uwalelubulwilako munyinefwe ukulanda uo aleimininako. Ilyo uyu mwaume alandile ukuti aleimininako Inte sha kwa Yehova, shicilye atile: “Nga ni fyo ninshi kanshi te ca kutwishika ukuti ifyo umwine wa mulandu alelanda fya cine. Ba Nte nalibeshiba sana kabili nalishiba ukuti bafumacumi. Te kuti beshe nangu panono ukupoka icintu mu bucenjeshi.”

Ilyo baceceetele amapepala bakwete, basangile ukuti uyu muntu uwaleitunga ukuti e mwine wa mpanga, akwete amapepala ya bufi, kanshi e o basangile no mulandu. Munyinefwe uwalelubulwilako ba Nte alandile ukuti, “Uyu te muku wa kubalilapo. Mu filye fya milandu mu calo fye conse, nga balumbula fye Inte sha kwa Yehova, lyonse aba mu cilye balalanda ifisuma.”

Ku ntanshi cikeshibikwa impendwa ya abantu na bambi abafwaya ukulacita ifisuma abakasambilila icine ca mu Baibolo no kutendeka ukupepa Lesa wa cine. Pali ino nshita aba bwananyina balebombesha ukushimikila abantu ba musango uyu imbila nsuma. Ku ca kumwenako, mu 2013 Inte sha kwa Yehova mu Dominican Republic bashimikile amaawala ukucila pali 11 milioni kabili batungulwile amasambililo ya Baibolo 71,922. Na kabili caliweme nga nshi ukumona uko bakasabankanya 9,776 babombeleko umulimo wa bupainiya. Mu August uyu wine mwaka, bakasabankanya 35,331 balibombeshe mu mulimo wa kushimikila. Na kabili cilemoneka ukuti ku ntanshi kukaba ukulunduluka pantu abantu 127,716 e basangilwe ku Cibukisho.

Umulimo wa kushimikila no kupanga abasambi mu Dominican Republic watampile kale ukutula pa Mulungu, mu April, 1945, ilyo ba Lennart na ba Virginia Johnson bafikile no kutendeka ukushimikila imbila nsuma iya Bufumu. Inte sha kwa Yehova mu Dominican Republic balatasha sana pa cine ico basambilila. Na kabili balatasha pa fyo aba bwananyina abatendeke ukushimikila baali abashipa lintu baleipelesha ukubombesha. Pali lelo balomfwa bwino pe shuko bakwata ilya ‘kulondolola bwino bwino pa Bufumu bwa kwa Lesa.’ (Imilimo 28:23) Balasubila ukumona uko abekala pali ici cishi bakalaimbila pamo na ba bwananyina mwi isonde lyonse abati: “Yehova naba imfumu! Isonde nalyange. Ne fishi ifingi nga nshi fisekelele.”—Amalumbo 97:1.