Ba Borbonio Aybar babatishiwe pa 19 January, 1955 ninshi balibinda umulimo wa kushimikila. Pa numa ya kubatishiwa baletungulula amasambililo ya Baibolo ayengi mu Monte Adentro na mu Santiago. Ilyo icibindo capwile mu 1956, abasambi babo bamo balibatishiwe ukubikako na bena mwabo.

Pa kati ka July 1957, bacilolo ba buteko balikumene mu Salcedo, ku kulanshanya ifyo bali no kukanda ba Nte. Munyinefwe Albar atile “Francisco Prats-Ramírez e wakwete ifingi ifya kulanda pali uku kukumana. Prats-Ramírez atile, ‘Mu nshiku fye ishinono bali no kuloba.’” Tapapitile na nshita, pa 19 July, 1957, bakapokola balikete Inte sha kwa Yehova mu Blanco Arriba, El Jobo, Los Cacaos, na mu Monte Adentro.

Munyinefwe Aybar atile, “Na ine balinjikete. Batutwele ku maofeshi yakalamba aya bashilika mu Salcedo. Ilyo twafikile fye, Saladín umukalamba wa bashilika, alingumine. Alikalipe ica kuti ilyo aletutulumwina amenso ni cikanga yafume na mu mutwe. Lyena balitutantamike mu milongo ibili, umo uwa baume, umbi uwa banakashi. Bakalinda ba cifungo batendeke ukupantaula no kuuma abaume, e lyo abanakashi bena balebalopaula amembya uku ninshi balelanda no kuti, ‘Ine ndi Katolika, no kwipaya ndepaya.’”

Munyinefwe Aybar balimulipilishe indalama no kumukaka pa myeshi itatu. Na kabili atile: “Ilyo twali mu cifungo, Santos Mélido Marte, umukalamba wa bashilika alitutandalile. Atwebele ukuti: ‘Nalibelenga Baibolo kabili nalishiba ukuti Yehova ni Lesa . Kwena tapaba umulandu mwacita uwa kumukakilapo, lelo tapali ico ningacita pantu abalenga ukuti mube mu cifungo  ni bashimapepo ba ku Katolika. Abengamukakula fye no kumufumya mu cifungo ni bashimapepo nelyo jefe (“bosi,” Trujillo).’”

Pa abo baikete pali no mwana umwanakashi uwa ba Fidelia Jiménezi na bana ba baice babo. Bonse aba bali basambi ba Baibolo aba ba Fidelia Jiménezi. Nangu ca kuti ba Fidelia bena tababekete lilya line, baliitwele abene ku balashi pa kuti babakake pantu balefwaya ukulakoselesha abali mu cifungo. Pali ilya ine nshita e lyo Ludovino Fernández, umushilika uwakwete icifulo ca pa muulu sana kabili uo baishibe ukuti munkalwe, uwatalama alitandalile icifungo. Aitile ba Fidelia ukuti bamonane nankwe, lyena abepwishe ukuti: “E iwe mukalamba wabo?”

Ba Fidelia bayaswike abati, “Iyo mukwai, mwe bakalamba ni mwe.”

Lyena Fernández atile, “Kanshi ni we pasta.”

Ba Fidelia kabili batile, “Iyo mukwai. Yesu e pasta.”

Fernández abepwishe ukuti: “Bushe te iwe walenga ukuti aba bonse babe mu cifungo? Ni we walebasambilisha, te fyo?”

Ba Fidelia batile, “Iyo mukwai. Baibolo e yalenga ukuti babe mu cifungo. Balecita fye ifyo basambilila muli Baibolo.”

Ilyo balelanshanya, bamunyinefwe babili, ba Pedro Germán na bafyala baba Fidelia, ba Negro Jiménez nabo abali mu cifungo, balipitile apo baiminine. Balebashindika ukufuma ku ka cifungo uko bababikile beka no kubatwala ku cifulo ca cintubwingi. Ba Negro balikwete umulopa uwauma kwi shati, e lyo amenso ya ba Pedro yena yalifimbile icine cine. Calimoneke fye apabuuta tuutu ukuti balibomine icabipisha. Ba Fidelia baipwishe umukalamba wa bashilika, “Bushe ifi ifine e fyo mucita abantu abasuma, aba cishinka kabili abatiina Lesa?” Fernández  alimwene ukuti ba Fidelia balishipile, e co abebele ukuti babwelelemo mu cifungo umo baali.

Ababomfi ba kwa Yehova aba cishinka balefwaikwa ukushipa ilyo balebacusha, kabili ifi fine e fyo baali! Nangu fye balashi ba buteko balishibe ukuti cine cine bali abashipa. Ku ca kumwenako, pa 31 July, 1957, Luis Arzeno Colón, cilolo wa kwa kateka alembele kalata kuli kalemba wa buteko, umo alilishike ukuti: “Nangu ca kuti akabungwe ka National Congress kafumishe ifunde lya kuti Inte sha kwa Yehova tabalingile ukulacita ifya mipepele yabo, aba bantu tabaleka iyo, balikonkanyapo.”