BUSHE bucibusa bwali pali Trujillo ne calici lya Katolika bwali shani? Incenshi imo mu fikansa pa mitekele ya calo yatile: “Pa myaka yonse ilyo Trujillo aleteka ukutula mu 1930 ukushinta mu 1961, ubuteko bwa Dominican Republic bwaleumfwana sana ne Calici; uyu kateka uwa lucu aletungilila Icalici kabili Icalici nalyo lyaletungilila imitekele yakwe.”

Mu 1954, Trujillo alile ku Rome uko ailesaina icipangano na Papa. Germán Ornes, uwali impanda mano ya kwa Trujillo alembele ukuti: “Apo Icalici lya Dominican lilomfwana sana na Trujillo, [icipangano] calilenga ‘Imfumu’ [Trujillo] ukukwata sana aba kuitungilila. Ibumba lya bashimapepo ilitungululwa na bashikofu bakalamba, Ricardo Pittini na Octavio Beras, e lyaba pa ntanshi mu kutungilila imitekele ya kwa Trujillo.”

Ornes na kabili atile: “Lyonse nga kwaba fye ishuko, Papa aletuma umutende kuli Trujillo ukubomfya telegramu. . . . Mu 1956, kateka Trujillo alipekenye ukukumana kwa baKatolika uko baleita  abati Congress of Catholic Culture, mu Ciudad Trujillo. Pali uku kukumana, Francis Spellman, shimapepo mukalamba uwaleimininako Papa, aliletele kalata umwali amashiwi ya kukoselesha kateka. Uyu shimapepo mukalamba afumine ku New York no kuya ku Dominican Republic uko umukalamba wa bashilika [Trujillo] umwine ailemupokelela mu nshila ya lulumbi. Ubushiku bwakonkelepo, amanyunshipepala ya mu Dominican Republic yalisabankenye ifikope ifyalelanga ifyo aba babili balekumbana pa kuposhanya.”

Mu 1960, magazini ya Time yatile: “Ukufika na lelo, Trujillo ne calici bacili balomfwana. Shikofu, Ricardo Pittini kabili shimapepo bacindikisha sana mu America, pali nomba ali ne myaka 83 kabili alipofula. Lelo, imyaka ine iyapitapo alisaine kalata iyatuminwe kuli ba New York Times iya kulumbanya Trujillo no kusosa ukuti, ‘uyu “kateka wa lucu” balimutemenwe sana ku bantu bakwe kabili balimucindike.’”

Na lyo line, pa numa ya myaka 30 iya kutungilila ubuteko bwa kwa Trujillo, kateka wa lucu, baKatolika balitampile ukufumamo pantu nomba ifintu fyalitendeke ukwaluka mu mapolitiki. Incenshi imo mu fikansa pa mitekele ya calo yatile, “Ilyo abantu batampile ukukaana imitekele ya lucu, na pa numa lintu bafwaile ukukwata ubuteko umo bali no kulaisalila bakateka, Icalici ilyaleumfwana sana na Trujillo lyalipatikishiwe ukuleka ukumutungilila.”

Na mu kulekelesha, mu 2011 Icalici lyalipatikishiwe ukulomba ubwelelo ku bena Dominican. Kalata ye calici iyo basabankenye na mu nyunshipepala ya Dominican Today yatile: ‘Tulelomba ubwelelo bwa kuti twalilufyenye kabili te lyonse twalekonka ifyo icisumino cesu caba ne milimo ye calici lyesu. Pali uyu mulandu, tulelomba no kupaapaata abena Dominican bonse ukuba ne cikuuku kuli ifwe kabili batweleleko.’