NALITEMENWE sana ifya mapepo kabili nali Katolika umwine mwine. Nali mwi bumba lya bakemba ba nyimbo ilya mu calici kabili naleya na bashimapepo ku ncende shimo uko twaleba fweka tulepepa no kusambilishanya. Twalenwa no kulya umulalilo wa kwa shikulu. Lyena mu 1955, abakalamba bandi abanakashi balinshimikile pali Paradaise iikesa. Balimpeele Baibolo, akatabo ka “Imbila Nsuma Iyi ya Bufumu” na citabo ca “Lekeni Lesa Abe Uwa Cine.” Nalitemenwe icine cine, e co naipwishe bashimapepo nga kuti nalabelengako Baibolo. Banjebele abati “ikakupenya.” Na lyo line, nalitendeke ukubelenga.

Ilyo nakuukile kuli bamama na bashikulu ku Boca Chica, shimapepo alinjipwishe ico nalekele ukuya ku calici. Namwebele ukuti ifingi ifyo baletusambilisha ku calici te fya mu Baibolo. Shimapepo alikalipe. Anjebele ati: “Umfwa kuno mukashana, uli mpaanga iyaluba iyafuma pa mukuni wandi.”

 Namwaswike nati: “Iyo mukwai, ni mwe mwafuma pa mukuni wa kwa Yehova, pantu impaanga sha kwa Yehova, umuntu takwatapo impaanga.”

Nshanyantileko ulukasa ku calici na kabili. Natampile ukwikala na bakalamba bandi abanakashi kabili pa numa fye ya myeshi 6 ukutula apo nasambilile icine pa muku wa kubalilapo, nalibatishiwe. Ilyo line fye, natampile bupainiya bwa nshita yonse. Pa numa fye ya mwaka umo, nalyupilwe kuli ba Enrique Glass, abali bakangalila ba muputule. Bushiku bumo ilyo twaleshimikila mu parka mu musumba wa La Romana, ba Enrique balibekete kuli bakapokola. Ilyo balebasenda, nalibakonkele pa numa ulubilo, ndebilikisha nati: “Na ine wine ndi Nte ya kwa Yehova, twacilashimikila bonse. Cinshi tamulenjikatila?” Nomba tabalefwaya ukunjikata.

Pali iyi nshita ninshi ba Enrique balibakakapo imyaka yonse pamo 7 ne myeshi 6. Uno muku babapingwile ukubakaka imyeshi 20. Cila mulungu pa bushiku bwa pa Mulungu, naletandalila ba Enrique. Bushiku bumo ilyo naile mu kumona ba Enrique, umukalamba wa cifungo alinjipwishe ukuti, “Cinshi ulefwaya kuno?”

Namwebele nati: “Abena mwandi balibakaka pantu ni Nte ya kwa Yehova.”

Anjebele ukuti: “Ucili umwaice kabili naukwata ishuko lya kucitako fimbi. Mulandu nshi wingalapoosela inshita na ba Nte?”

Namwaswike nati: “Na ine wine ndi Nte ya kwa Yehova. Nangu mwinganjipaya imiku 7 no kumbusha imiku 7, te kuti ndeke ukuba Inte ya kwa Yehova.” Takwete amashiwi na yambi, e fyo andekele.

Ilyo icibindo capwile, twalibombele mu muputule na mu citungu na ba Enrique pa myaka iingi. Ba Enrique baleele mu tulo twa mfwa pa 8 March, 2008. Nalitwalilila ukubomba bupainiya bwa nshita yonse.