Mu 1948, ine no mwina mwandi Paula, pamo no mwana wesu umwanakashi twatendeke ukulalongana ne Nte sha kwa Yehova mu Blanco Arriba. Twaleenda amakilomita yonse pamo 40 ukuya no kubwela, lelo tatwatalile atupuswa mu kulongana. Pa 3 January, 1949, ine na Paula twalibatishiwe.

Ilyo papitile imyeshi 6, ba Efraín na bambi abo balelongana nabo balibekete no kubakaka pa myeshi itatu. Twalelaala pa nshi kabili twalelya inkonde no kunwa tii umuku umo cila bushiku. Ilyo batufumishe mu cifungo, abalashi ba buteko balitutiinishe pantu bena balemona ukuti twali no kuleka ukushimikila. Lelo, ilyo twabwelele ku mayanda, twalitampile ukulalongana no kushimikila mu bumfisolo. Apo abalashi ba buteko baletusopa sana, twalelonganina mu mayanda, mu mabala ya kofi, na mu mafarmu. Mu nshita ya kulalonganina mu fifulo fimo fine lyonse, pa mpela ya kulongana twalebilisha  uko tukalonganina umuku ukakonkapo. Pa kuya mu kushimikila twaleya umo umo; twalefwala ifya kufwala fya kubombelamo kabili tatwalesenda impapulo nelyo Baibolo. Nangu cali ifi, ukutula mu 1949 ukushinta mu 1959, balinkakile pa miku iingi, pa myeshi itatu ukufika ku myeshi 6 mu fifungo 7.

Nalingile ukuba uwacenjela sana pantu bamo abalencusha, bali ni ba lupwa wandi. Nangu ca kuti nalelaala mu mpili nelyo mu mafarmu pa kuti benjikata, ukunjikata kwena limo balenjikata. Inshita imo ilyo banjikete, bantwele ku cifungo ca ku La Victoria mu Ciudad Trujillo, muli ici cifungo nasangilemo abantu 50 nelyo 60. Kuli ici cifungo kwena twalelya imiku ibili cila bushiku; e kutila, ubwali bwa amataba mu nshita ya lucelo, utumupunga na tucilemba mu nshita ya kasuba. Mu cifungo ba Nte baleshimikila abafungwa banabo, twalelongana lyonse kabili pa kulongana twalelanda amalembo ayo twasungile ku mutwe no kushimika ifyalecitika mu mulimo.

Umuku wa kulekeleshako ilyo bankakile, umushilika alingumine ne mfuti mu mbafu na ku mutwe. Nangu ca kuti na nomba ncili ndacula kuli shilya mpumo, ifi fyonse fyalikoseshe icitetekelo candi, fyalilengele nashipikisha no kutwalilila ukubombela Yehova.

Pali lelo, ndi ne myaka 96 kabili ndi mubomfi utumikila mu cilonganino. Nangu ca kuti te kuti nyende intamfu iitali, ndekala pa ng’anda no kulashimikila ku bapita nshila. Ubufumu bwa kwa Lesa te ciloto fye. Lelo, bwa cine cine kabili nalishimikila pali ubu bufumu ukucila pa myaka 60. Imona ukuti icalo cipya ca cine cine nga filya fine fye nalecimona lintu naumfwile pa Bufumu umuku wa kubalilapo. *