MU MWAKA wa 1961, pa numa fye umweshi umo ukutula apo baipaile Trujillo nalibatishiwe. Pali iyi nshita nalesambilila ifya buloya pa yuniversiti. Batata balefwaisha ukuti nsambilile iyi ncito, lelo nalishibe ukuti amasambililo ya fya kwa Lesa e yacindama sana. E co, nalilekele isukulu pa yuniversiti nangu ca kutila batata bakoselepo fye ukuti ntwalilile ukusambilila. Tapakokwele, nalisontelwe ukuba painiya waibela.

Pa ncende isho bantumineko pali no musumba wa La Vega uko baKatolika balimba imishila pa nshita ntali. Pa nshita yonse ilyo nali kulya takwali nangu umo uwasambilile icine. Nga ndelanda ilyashi lya ku cintubwingi, painiya munandi e walesangwako fye. Nalyo line, Yehova alengafwa ukupitila mwi sambililo lya Baibolo ilya pa lwandi, ukulongana kukalamba, e lyo na mapepo ya kufuma pa nshi ya mutima. Nalepepa kuli Yehova nga ca kuti mu musumba wa La Vega kuti mwabako fye icilonganino. Ndi ne  nsansa ukumwishibisha ukuti nomba muli Amayanda ya Bufumu 6, ifilonganino 14 e lyo bakasabankanya ba mbila nsuma nabacila pali 800.

Mu 1965 twalyupene na Ángela, e lyo mu 1981 balitwitile ukuya mu kubombela pa Bethel. Ilyo nabatishiwe, mu Dominican Republic mwali fye bakasabankanya 681. Pali ino nshita bakasabankanya balicila pali 36,000 e lyo na bambi abengi balasangwa ku kulongana kukalamba ukwalekanalekana. Nga natontonkanya pa fyo cali kale, ndapapa ukumona ifyo Yehova alenga abantu abengi baishiba icine icaba mu Baibolo.