Munyinefwe José, ni painiya wacaice uwikala mu mushi uwaba ukutali ne tauni lya mu musumba wa Luanda ku Angola. Abomba incito ya bukafundisha pe sukulu ilyabela mupepi ne Ng’anda ya Bufumu. Pa mulandu wa kuti José alafunda bwino sana kabili alikwata ne mibele ya bwina Kristu, abana be sukulu 86 abo afunda balimucindika sana. Apo batendeka ukulongana kwa mu kati  ka mulungu ne nshita ya 16:00 hrs, José alipoka ulusa pa kuti aleinukako bwangu pali ubu bushiku. Nga ainuka, alungama fye ku Ng’anda ya Bufumu.

Abana be sukulu bamo tabaleishiba icalelenga José aleinuka bwangu na uko aleya pali ubu bushiku. Bushiku bumo, abana be sukulu babili balefwaya ukwishiba uko José aleya, e ico balimukonkele kabili baliilelongana nankwe. Ubushiku bumbi, ilyo José ali no lubali mu Kulongana kwa Mulimo, abana be sukulu batatu balimukonkele. Ili lyashi lyalisalangene bwangu ku bana be sukulu. Mu milungu iyakonkelepo, abana be sukulu abalelongana balifulileko ukufuma pali basano ukufika kuli 21. Bakasabankanya pa Ng’anda ya Bufumu balitampile ukulatungulula amasambililo ya Baibolo ku bana be sukulu, kabili abengi balisumine ukusambilila. Lintu abana be sukulu baleya ne mpapulo ku sukulu, abanabo balishitemenwe kabili nabo balitampile ukulongana. Ilyo calefika ku mpela ya mwaka, ninshi abana be sukulu 54 pali 86 abo José alesambilisha balilonganapo. Munyinefwe José atile abana be sukulu 23 balelunduluka kabili balitwalilila ukulongana.

Ilyo bapainiya baibela ba Joseph na bena mwabo ba Evezi bafikile ku Nigeria uko babatumine, bakasabankanya abengi ninshi balifuupulwa. Baebele bapainiya ukuti: “Icifulo ca kushimikilamo calicepa. Twalishimikilamo sana.” Pa numa ya mwaka umo, ba Joseph balembeele aba ku musambo abati: “Tulashimikila mu cifulo cesu cila bushiku kabili tuleya tulecefyako ulupato ulo abantu batukwatila. Pa kuya mu kushimikila tulasenda akalimba  akakulishishapo amaDVD ayo tutambisha abana, abalumendo na bakashana, e lyo na bakalamba bene. Ne ci calenga ukuti ine no mwina mwandi tuletungulula amasambililo ya Baibolo 18, kabili inshita shimo cilafya no kutungulula amasambililo yonse. Na kabili, abana balafwaya lyonse ukuti tulebatambisha ‘amavidio ya kwa Kalebu.’”

Mu April 2014, aba ku musambo wa ku Congo (Kinshasa) balipokelele kalata ukufuma kwi bumba lya balondo be sabi abekala pa cishi ca Ibinja icaba pali bemba wa Kivu. Ilingi line, aba abalondo balaya ku misumba iyaba mupepi ne cishi ku makwebo. Bushiku bumo ilyo baleya ku musumba wa Bukavu, balikumene na ba Nte. Ba Nte bashimikile abalondo no kubapeela Baibolo ne mpapulo shimo.

Abalondo balitemenwe ifyo babelengele kabili balishimikileko na bambi pa cishi ifyo basambilile. Apo abengi pali ici cishi balefwaya ukusambilila, abalondo balitumine umwaume umo ukuya ku Bukavu ku kuyafwaya ba Nte. Uyu mwaume alifililwe ukusanga ba Nte, e co alembeele aba ku musambo ukuti: “Mukwai twapaapaata, tutumineniko ba Nte bese batwafwilisheko ukwishiba Baibolo nga fintu bena baishiba pa kuti tukekale umuyayaya. Natukwata amayanda umo bengalaikala. Na kabili, kuti namupeela impanga apa kukuulila icalici. Twalibelenga Amalembo ya mu Baibolo ayalembwa mu mpapulo shenu ukuti bashimapepo na bapasta batusambilisha ifya bufi. Natushininkisha ukuti natusanga ukupepa kwa cine. Pali cino cishi ca Ibinja kuli abantu abengi abalefwaya ukusambilila Baibolo no kuba Inte sha kwa Yehova.”

Ifyalembelwe muli kalata fyalelanga ukuti pali ici cishi pali abantu nalimo 40 abalefwaya ukusambilila. Pa cishi ca Ibinja paba abantu ukucila 18,000, lelo tapaba Nte nangu umo. Iofeshi lya musambo talyaikete na ku cani, lyalitumine bapainiya baibela babili abaishibe icitundu ca pali ici cishi.

Pasta umo uwa calici lya baProtestanti ilyaishibikwa sana mu South Africa atile, “Nshakatale mpuswa ku  Cibukisho na kabili.” Cinshi calengele ukuti uyu shimapepo asangwe ku Cibukisho ca mu April 2014? Ifyo cali ni fi: Bushiku bumo, bamunyinefwe babili aba mishobo iyapusana baleshimikila kabili baile pa ng’anda yakwe. Kale kale aba bamunyinefwe balishibe ukuti uyu pasta talefwaya ukulanda na ba Nte. Pali aba bamunyinefwe pali na ba Adaine abatile: “Twalipapile, awe twamwene fye batwiswila icibi, batwingisha na mu ng’anda. Twalilanshenye pa nshita iitali. Pasta alipapile sana ukumona umusungu aleshimikila mu ncende umwikala abafiita kabili alelanda ululimi lwa bafiita. Uyu pasta alitampile ukulasambilila Baibolo.”

Ba Adaine na kabili batile: “Uyu mwaume ali mishonari kabili ali ni pasta ukucila pa myaka 40, lelo asangile amasuko ku mepusho akwete ilyo afikile imyaka 80. Alitemwa sana icitabo ca Pashanyeni Icitetekelo Cabo. Ifyo tusambilila alafibukisha ku mutwe kabili alaya na mu kusambilishako aba mwi calici lyakwe. Alilangishe aba mwi calici lyakwe icitabo ca Bushe Cinshi Baibolo Isambilisha? Abebele ukuti, ‘Ba Nte nga baisa pa mayanda yenu ne ci citabo, mulebapokelela no kukutika ku fyo balelanda pantu muli ici citabo mwaliba ifya kwa Lesa ifyacindama sana.’”

Uyu pasta aebele ba Adaine ukuti abakalamba ba calici balimusokele sana no kumulesha ukulanda pali ba Nte nga alepepesha mu calici. Taishibe ifya kucita. Ba Adaine baibukishe ilyashi lya kwa shimapepo wa ku Myanmar ilyali mu citabo ca Ilyashi lya Nte sha kwa Yehova mu 2013. Ilyo ba Adaine babelengeele uyu pasta ili lyashi, atile: “Ili lyashi kwati lilelanda fye pali ine! Nacicindama sana ukuti mpingulepo, kabili mfwile ukupingulapo ili line.”

Pa 14 April, 2014, e wali umuku wa kubalilapo ilyo uyu  pasta asangilwe ku Cibukisho kabili e lyo alandile no kuti takatale apuswa kuli uku kulongana. Na kabili alilanga ukuti alefwaisha ukuleka ukucitako fyonse ifyo ababa mu kupepa kwa bufi bacita.

Ba Baffour na ba Aaron ni bapainiya baibela ababombela mu Bokabo umo balima sana cocoa, incende iyabela ku masamba ya calo ca Ghana. Mu cifulo cabo ica kushimikilamo mwaba utumayanda utwasalangana, kabili pa kuyako kano wabomfya utushila twa tondo utwapita mwi farmu lya cocoa. Ilingi line, kulaba ukuluba nga wabomfya akashila kambi. Bushiku bumo, aba bapainiya tababomfeshe akashila ako balebomfya lyonse, e ico babomfeshe akabatwele ku mayanda ayo bashabalile abayako. Uku bailesanga ba Michael na bena mwabo ba Patience abatemenwe sana ifyo baumfwile kabili balisumine no kutendeka isambililo lya Baibolo. Ba Michael baebele aba bapainiya ukuti: “Pa myaka ibili iyapitapo, twalileka ukuya ku calici pantu twalimwene ukuti ifintu ifyo bacita te fyo Baibolo isambilisha. Pali iyi myaka yonse, cila cungulo ine na Patience tulabelenga Baibolo no kufwaya ifyasuko ku mepusho ayo twakwata. Tulapepa ukuti tukasange abengatwafwa ukusambilila icine.” Nangu ca kuti pa kufika ukwa kulonganina, balingile ukwenda intamfu iitali ukupita mu mafarmu, balitampile ukulongana ilyo line fye. Ilyo papitile fye umwaka umo, ba Michael na bena mwabo ba Patience balibatishiwe kabili batendeke na bupainiya bwa nshita yonse. Pali lelo, nabo balenda mu mafarmu ya cocoa pa kuti bafwaye ‘abapepa ukuti bakasange abengabafwa ukusambilila icine.’