Icipandwa 12

Kuti Nacita Shani pa Kuti Ndeicetekela?

Ee Awe

Nga walolesha muli mirra, bushe □ □

ulatemwa ifyo umoneka?

Bushe kwaliba imilimo imo iyo □ □

waishiba iyo abantu bengakutashishapo?

Abanobe nga balekutunka ukucita □ □

ifyabipa, bushe kuti wabakanina?

Bushe kuti wasuulako fye nga bakulengulula? □ □

Bushe kuti wasuulako fye bamo nga □ □

bakubepesha ubufi?

Bushe umona ukuti kwaliba abakutemwa? □ □

Bushe ulasakamana ubumi bobe? □ □

Bushe ulomfwa ububi abanobe nga filebawamina? □ □

Bushe ifyo ucita filatunguluka? □ □

Nga ca kuti amepusho ayengi wa-asuka ukuti awe, nalimo ukukanaicetekela e kwalenga ukuti wilamona ifisuma ifyo ucita. Ici cipandwa calakwafwa ukutendeka ukulamona ifisuma ifyo ucita!

 ABAICE abengi tabatemwa ifyo bamoneka e lyo bamona kwati tapali ifyo bengacita, no kuti abaice banabo balibacila. Bushe na iwe e fyo uimona? Nga e fyo uimona, ninshi te iwe weka uyumfwa ifi!

Leticia atile, “Ifilubo ncita filanenga ukulaimona kwati nshaba kantu, ndailengulula sana.”

Haley ena atile, “Nangu uyembe shani, lyonse ukalasanga ukuti kuli na bambi abakucila.”

Rachel na o atile, “Ndasakamana sana nga ndi pa bantu. Imona kwati bonse nabansuula.”

Ifi nga e fyo uyumfwa, wisakamana. Kuli ifingakwafwa. Natulande pa fintu fitatu ifingalenga waicetekela.

Ule-afwa Bambi

Ilembo ilingakwafwa. “Mwaba insansa ishingi mu kupeela ukucila ishaba mu kupokelela.”—Imilimo 20:35.

Umo aya mashiwi yalolele. Ilyo ule-afwa bambi, na we mwine ninshi uleyafwa. Mu nshila nshi? Baibolo itila, “Umuntu wa bukapekape akakwata ifingi, no uliisha bambi na o bakamuliisha.” (Amapinda 11:25) Ukaba ne nsansa nga ule-afwa bambi! *

Breanna atile, “Ndatontonkanya pa fyo ningaafwa aba mu cilonganino kabili ndabaafwa mu fyo balekabila. Ukutemwa abantu bambi no kulasangwa nabo kulanenga ukuba ne nsansa.”

Javon na o atile, “Mulafuma ifisuma mu kubomba umulimo wa kushimikila pantu uyu mulimo ulalenga waleka ukutontonkanya fye pa  fyobe lelo watendeka no kulatontonkanya pa bantu bambi.”

Icishibisho: Wila-afwa abantu bambi pantu fye ulefwaya na bo bakakwafwe. (Mateo 6:2-4) Nga ulecita ifi te kuti ube ne nsansa nakalya. Kabili abantu nabo balamona ukuti ifyo ulebacitila tafilefuma pa nshi ya mutima!—1 Abena Tesalonika 2:5, 6.

Cita ifi. Ibukisha uo wa-afwilepo. Lemba ishina lyakwe ne fyo wamucitiile.

․․․․․

Bushe waumfwile shani ilyo wamwafwile?

․․․․․

Tontonkanya pa muntu na umbi uo wingafwa, kabili lemba ifyo wingamucitila.

․․․․․

Kwata Ifibusa

Ilembo ilingakwafwa. “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.”—Amapinda 17:17.

Umo aya mashiwi yalolele. Mu nshita ya mafya, cibusa  musuma kuti akwafwa nga nshi. (1 Samwele 18:1; 19:2) Ukwishiba fye ukuti kwaliba uukusakamana kuti kwalenga wasansamukako. (1 Abena Korinti 16:17, 18) Kanshi uleba ne fibusa ifingakwafwa.

Donnell atile, “Ifibusa fya cine filasansamusha.”

Heather na o atile, “Limo icacindamisha kwishiba fye ukuti kwaliba abakusakamana. Ici cilalenga walaumfwa ukuti kanshi walicindama.”

Icishibisho: Wilakonkelesha ifilecita abanobe pa kuti fye bakutemwe. (Amapinda 13:20; 18:24; 1 Abena Korinti 15:33) Ukucita ifyabipa pa kuti fye usekeshe bambi kukalenga fye walayumfwa uwa cabecabe.—Abena Roma 6:21.

Cita ifi. Lemba ishina lya munobe uwingalenga waicetekela.

․․․․․

Ulesangwa sana no yu muntu.—Icishibisho: Uyu cibusa tafwile ukuba fye umwaice munobe.

Wilaleka Ukucita Ifisuma nga Walufyanya

Ilembo ilingakwafwa. “Bonse babembu kabili balifilwa ukufika pa bukata bwa kwa Lesa.”—Abena Roma 3:23.

Umo aya mashiwi yalolele. Apo tawapwililika, limo ukalalufyanya mu milandile nelyo mu ncitilo. (Abena Roma 7:21-23; Yakobo 3:2) Nangu ca kutila tapali ifyo wingacita pa kuti wilalufyanya, kuti wacitapo cimo nga walufyanya. Baibolo itila: “Umulungami kuti awa imiku cinelubali (7), lelo ukwima akema.”—Amapinda 24:16.

 Kevin atile, “Limo icilenga umuntu ukulayumfwa ukuti tacindama, kulinganya ifilubo acita ku fisuma ificita bambi.”

Lauren na o atile, “Bonse tulacita ifisuma e lyo ne fibi. Kanshi tufwile ukuyumfwilapo icilumba pa fisuma no kubombela pa fibi ifyo tucita.”

Icishibisho: Wilamona ukuti ifi ushapwililika ninshi ufwile ukulacita fye imembu. (Abena Galatia 5:13) Ukubembukila umumbo kuti kwalenga bucibusa bobe na Yehova Lesa ukupwa!—AbaHebere 10:26, 27.

Cita ifi. Lemba imibele iyo ulefwaya ukuwamyako.

․․․․․

Lemba no bushiku bwa lelo mupepi na pa walemba imibele. Fwailapo ifyebo na fimbi pa fyo wingacita pa kutila uwamyeko, kabili nga papita umweshi umo, mona nga nauwamyako.

 Lesa Akumona Ukuti Walicindama

Baibolo itila: “Lesa alicila imitima yesu.” (1 Yohane 3:20) Ici calola mu kuti, Lesa alakumona uwacindama sana ukucila ne fyo we mwine uimona, te mulandu no kuti tawapwililika. Natulangilile, tutile naukwata K50,000 iyalepuka. Bushe kuti waipoosa nelyo ukuimona ukuti taikwete incito pantu fye nailepuka? Awe! Te mulandu ne fyo ilepwike, icili ni K50,000.

E fyo na Lesa akumona. Nangu ca kutila tawapwililika aishiba ukuti walicindama. Alamona kabili alasekelamo mu fyo ucita nangu fimoneke ifinono kuli iwe! E co Baibolo ikwebela ukuti, ‘Lesa taba uushalungama, takalabe umulimo obe no kutemwa uko walangile kwi shina lyakwe.’—AbaHebere 6:10.

IFYO TUKALANDAPO MU CIPANDWA CIKONKELEPO

Bushe limo ulacilamo ukumfwa ubulanda? Nga e fyo umfwa, kuti wacita shani?

[Futunoti]

ILEMBO ILIKWETE ICISHINKA CIKALAMBA

“Umo na umo alange umulimo wakwe, e lyo akasansamuka pa mulimo wakwe, te kuilinganya ku muntu umbi iyo.”—Abena Galatia 6:4.

IFYO WINGACITA

Wilalanda ati, ‘Lyonse ndafilwa ukucita ifintu bwino’ no kuti ‘Tapaba ifisuma ifyo ncita.’ Amashiwi ya musango uyu kuti yalekufupula fye. Lelo kuti cawama ilyo ulemona ifilubo ucita, ulemona ne fisuma fine.

BUSHE WALISHIBA UKUTI . . . ?

Ifyo uimona we mwine e fyo na bambi bengalakumona . . . kabili e cingapima ifyo bakalacita kuli iwe.

IFYO NDEFWAYA UKUBOMBELAPO!

Abaice banandi nga balenengulula, nkacita ifi ․․․․․

Nga naishiba ukuti imona fye ifilubo ncita, nkacita ifi ․․․․․

Ifyo ningatemwa ukwipusha abafyashi pali ili lyashi ni fi ․․․․․

Amepusho ya Kutontonkanyapo

● Cinshi cingalenga abaice maka maka ukukanaicetekela?

● Mulandu nshi cacindamina ukuicetekela?

[Amashiwi pe bula 88]

“Umuntu kuti alamoneka bwino sana lelo amona kwati tamoneka bwino. Nelyo umuntu kuti tamoneka na bwino sana lelo atontonkanya ukuti musuma sana ukucila bonse. Caba fye ne fyo umona ifintu.’’—E fyalandile Alyssa

[Icikope pe bula 90]

Filya fine indalama iba iyacindama nangu ilepuke, e fyo na Lesa akumona ukuti walicindama nangu ca kutila tawapwililika