Mwe Bafyashi

Abaice nga balekula baba fye mwenso mwenso kwati bantu baletantala pa mulando. Tabeshiba bwino ifyo balaenda kabili balaba sana no mwenso. Mwe bafyashi nalimo kuti mwatemwa fye no kwimya umwana pa kuti ‘etantala’ pa mulando. Nomba apo te kuti mumwimye, kuti mwamwafwa fye. Ni mwe mulingile ukwafwa abana benu pa kuti bakula bwino no kwisaba na mano mu bukalamba.

Nalimo kuti mwatila ukulanda kwena calyanguka! Kwena ico ca cine. Nalimo ilyo umwana wenu aali umwaice aali fye uwabilima; nomba ukutula apo afishisha imyaka nalimo 14, aba fye tondolo tafwaya ukulanda nenu. Nalimo umwana wenu umukashana ilyo aali umwaice, alefwaya ukulamukonka konse fye uko mwaya; nomba pali ino nshita tafwaya nangu fye panono ukuba nenu mu cintubwingi!

Na lyo line nga cabe fi, mwilamona kwati namufilwa ukusunga umwana. Mwalikwata ukwa kupandwa amano ayengamwafwa no mwana wenu. Aya mano yaba mu Cebo ca kwa Lesa, Baibolo.

Cino citabo ica kuti Ifipusho Abacaice Bepusha, Ibuuku 2, bacipekanishishe ukuti cafwe umwana wenu ukwishiba ukufunda kusuma ukwaba mu Malembo. Nga mwamona pa fyebo fili pa mabula 4 na 5 mwalamona amalyashi yalekanalekana ayali muli cino citabo. Cino citabo tacilelanda fye pa fishinka fyeka. Moneni na fimbi ifilimo:

(1) Cino citabo cili kwati uulebelenga alelanshanya na umo. Muli incende ishingi umo umwana wenu ali no kulalemba ifyo aletontonkanya pa mepusho yalekanalekana na pa fyebo fimbi. Ica kumwenako fye, pa mabula 132 na 133 apali akamutwe akaletila “Ifyo Nkacita Abanandi nga Balefwaya Mbakonkelele,” pali ifyebo ifya kwafwa umwana wenu ukutontonkanya pa mafya yamo ne fya kucita pali ayo mafya. E lyo kabili, pa mpela ya fipande fyonse 9 muli ili buuku, pali ibula  apali akamutwe akaleti “Ifyebo Fyandi,” apo umwana wenu engalemba ifyo aletontonkanya ne fyo aleumfwa pa fyo abelengele mu cipande.

(2) Cino citabo cilekoselesha abaice ukulalanda ifili mu mutima. Ica kumwenako fye, pa mabula 63 na 64 pali akabokoshi akaleti “Kuti Nacita Shani pa Kuti Nande na Bafyashi Bandi pa Lyashi lya Baume Nangu Ilya Banakashi?” Kabili pa mpela ya cila cipandwa, pali akabokoshi akaleti “Uletipo Shani?” Aka kabokoshi, te ka kupitulukamo fye, lelo ifipusho ifilimo kuti mulelanshanyapo na pe sambililo lya lupwa. Kabili, cila cipandwa nacikwata akabokoshi na kambi akaleti “Ifyo Ndefwaya Ukucita!” umo bebele umwaice ukupwishishisha ifyebo fya kuti: “Ifyo ningatemwa ukwipusha abafyashi bandi pali ili lyashi ni fi . . .” Ifi bebele abaice fikalenga baleeba abafyashi babo ukubafwa nga bakwata amafya ayaba kwati kutantala pa mulando.

Ico mufwile fye ukwibukisha ca kuti: Pa kukoselesha abacaice ukulalemba mu citabo cabo ifili ku mukoshi, tamulingile ukulamonamo mu citabo cabo. Nalimo inshita imbi kuti bamweba ifili mu mutima ifyo balemba.

Na imwe bene mulingile ukukwata cino citabo, kabili mulingile ukubikako amano pa kucibelenga. Ilyo mulebelenga, mufwile ukulaibukisha amafya ayo mwalekwata ilyo mwalekula. Mwe bene nga mwamona bwino kuti mwashimikilako umwana wenu ifyo mwalekula. Nga mulecita ifyo, abana benu kuti balemwebako amalyashi bakwete. Nga balelanda, mulekutika! Nga mwaesha ukulanda na bo nomba mwamona kwati tabaleumfwa, mwinaka. Nangu bamoneke kwati tabalefwaya ukumfwa ifyo mulebeba, abana ilingi line balacindamikapo ukufunda kwa bafyashi babo ukucila ukwa baice banabo.

Mukwai natutemwa nga nshi pa kupeela mwe bafyashi na bana benu cino citabo icashimpwa pali Baibolo, kabili tulepepela fye ukuti cino citabo cikamwafwe bwino sana mu lupwa lwenu.

Ni fwe Bakalemba