MU 1970, nalebomba ku kampani ka British mining akaleimba diamondi mu Tongo Fields, incende umwaba sana diamondi ku kapinda ka ku kuso aka Kenema. Na ine naleimbako diamondi iyandi fye nga nakwata inshita kabili naleya mu kushitisha ku Kenema no kwangalako.

Mu 1972, nalimonene ne Nte sha kwa Yehova kabili nalitendeke ukusambilila Baibolo. Pa numa ya myeshi 5, nalibatishiwe. Apo nshakwete inshiku sha kuila pa cuti, nalilombele uo nalebomba nankwe ukuti akamombeleko pa kuti nkayebatishiwa pa kulongana kwa citungu. Alisumine lelo anjebele ukuti mfwile ukumupeela indalama isho nali no kufola pa mulungu umo. Nalisumine pantu nalicindamike sana ulubatisho ukucila indalama. Ilyo nabwelele, anjebele ukuti sunga fye indalama pantu ukubombela Lesa e cintu  cacindama ukucila fyonse. Ilyo papitile imyeshi 6, nalilekele iyi ncito uko nalefola indalama no kutendeka bupainiya bwaibela pa kuti ntendeke ukulonganika ifyuma ku muulu.—Mat. 6:19, 20.

Pa myaka 18 nalibomba bupainiya bwaibela e lyo nalibombela na mu miputule iingi. Nalyupa Christiana, uwa cishinka, uuntungilila kabili twalikwata no mwana umukashana Lynette.

Ilyo kwali inkondo ya bana calo mu Sierra Leone, ine na Christiana twalebomba bupainiya mu Bo, umusumba umwaba sana diamondi. Mu Bo twalisangilemo “diamondi” ya ku mupashi, Abena Kristu ba cine. Mu myaka fye ine, icilonganino cesu calikulile nga nshi. Pali lelo, mu Bo muli ifilonganino fitatu ifilelunduluka.

Mu 2002, balinjitile ukuti imbe mu Komiti ya Musambo wa ku Sierra Leone. Ine no mwina mwandi Christiana twikala mupepi na Bethel, kanshi incelela fye mu kubomba. Christiana, alabomba bupainiya bwaibela lelo Lynette abombela pa Bethel ukupilibula iciKrio.

Kale nalefwaisha ukusanga diamondi nomba nalisanga ifyacila pali diamondi, icine pali Yehova. Nalimbile diamondi ya ku mupashi 18, nelyo abasambi ba cine. Cine cine Yehova alimpaala!