BUSHIKU bumo, akasuba bacipondoka balitwingilile mu musumba, balelishisha imfuti mu muulu nalimo pa maawala yabili. Bamo bali fye abaice aba kuti ne fyanso fyalebafya ukusenda. Baali ne fiko, umushishi wabo wali uwasakalala, kabili balemoneka fye ukuti nabakolwa imiti.

Ubushiku bwakonkelepo kwali ukwipayaulula bantu. Abantu balicenenwe, balilemanikwe nangu ukwipaiwa. Abanakashi balibekete no kulaala nabo ku maka. Ala kali kayofi! Munyinefwe Amara Babawo no lupwa lwakwe na bantu bane abalesambilila icine baishilebelama pa ng’anda pa mwandi. Twalitiinine icine cine.

Tapapitile na nshita, umukalamba wa bacipondoka aishiletweba ati, twalingile ukuya mu kusambilila ifya kulwa ubushiku bwakonkelepo. Tatwalefwaya nangu panono ukuyako, nangu ca kuti nga twakaana bali no kutwipaya. Twalipepele ubushiku bonse. Twabukile lucelocelo, twasambilila ne lembo lya bushiku e lyo twatampa ukulolela ifipondo. Lelo tafyaishile.

 Bushiku bumo, umukalamba wa bashilika na bantu bakwe bane baishilepoka ing’anda yandi. Lelo tabatutamfishemo, eco twalitwalilile ukulalongana no kulasambilila ilembo lya bushiku pa ng’anda. Abashilika bamo batile: “Mulebelenga ne lembo lya bushiku! Muli Nte sha kwa Yehova, te fyo?” Tabalefwaya ukusambilila Baibolo, lelo balitucindike.

Ubushiku bumbi nabo, umukalamba wa bashilika alishile mu kumona abashilika abaleikala pa mwandi. Aishilepika sulupu kuli Munyinefwe Babawo amuposha na mu minwe. Pa kulanda na bashilika, uyu umukalamba wa bashilika alandile bukali bukali ati: “Uyu muntu ni kapitao wandi, na imwe bene ni kapitao wenu. Nga nkomfwepo fye icikacitika pali uyu muntu na ba mu ng’anda yakwe, nangu kakabe akanono shani, tamwakapekale pano, Mwaumfwa?” Nabo bayaswike abati, “Ee mukwai!” Lyena, umukalamba wa bashilika atupeele kalata umo balembele ukuti, akabungwe ka Revolutionary United Front takalingile ukutusansa pantu tuli bantu ba mutende.

Ilyo papitile imyeshi iingi, utumabumba twa bacipondoka twatampile ukulwishanya, eco twafulumukiile ku calo ca mupepi ku Liberia. Nako kwine ibumba limbi ilya bacipondoka lyalefwaya ukutusansa. Lelo twabebele atuti: “Tuli Nte sha kwa Yehova.” Umushilika umo atwipwishe ati, “Inga Yohane 3:16 itila shani?” Ilyo twalandile amashiwi yabapo, alitulekele twaya.

Na kabili twalikumenye umukalamba wa fipondo uwaebele Munyinefwe Babawo na ine ukuti tumukonke. Twamwene fye kwati e mpela yesu. Cipondoka atwebele ati, alisambililepo na ba Nte ilyo inkondo tailatendeka. Alitupeeleko indalama kabili twalimupeele na kalata pa kuti atutwalileko ku cilonganino ca mupepi. Mu nshita fye iinono, bamunyinefwe babili balishile ne fya kutukumbusuka kabili batutwele uko twali no kwikala umutende.