Ukusansa kwa kubalilapo kwacitike mupepi no mushi wa Koindu umwali ibumba lya baume abalesambilila Baibolo kabili abalelongana lyonse. Nga filya fine abaume abaKisi abengi baali, aba abaume baali mu kabungwe ka mu bumfisolo aka Poro abalepupa sana imipashi. Ba James Mensah abapwishishe Isukulu lya Gileadi, ababombeleko na ku Sierra Leone batile: “Ilyo abasambi ba Baibolo bakeene ukupupako imipashi, umukalamba wa kabungwe alifulilwe sana, ica kuti ena na bantu bakwe balyumine abasambi ba Baibolo, babebila ifipe, babocela amayanda, babakaka iminyololo, babasha na mu mpanga pa kuti bafwe ku nsala. Imfumu iikalamba e yatunkile aba mu kabungwe ka Poro. Nangu babacushishe ifi, abasambi ba Baibolo bali fye abakosa.”

Ilyo bamunyinefwe batwele umulandu ku kapokola, umukalamba kwa aka kabungwe, pamo ne fibusa fyakwe, e lyo ne  mfumu iikalamba balibekete. Balibalubulwishe, balibakalipiile sana kabili imfumu yena baliibindile ukuteeka mupepi no mwaka umo. Abantu abengi balishibe ili lyashi ne fyo ba Nte bacimfishe kabili calengele abapya abengi batendeke ukulongana. Pa numa, imfumu yalilapiile kabili yatendeke no kusambilila Baibolo. Ilyo kwali ukulongana kwa muputule, imfumu yalipokelele ababwananyina kabili yalibapeele ne ng’ombe iikulu sana.

Intungulushi shimbi isha aka kabungwe shalyeseshe inshila imbi iya kusanshilamo bamunyinefwe, kabili iyi yali ni nshila ya kubomfya “ifipope fya mafunde.” (Amalu. 94:20) Ba politishani aba mu kabungwe ka Poro batwele ilyashi ku ng’anda ya mafunde pa kuti babinde umulimo wa Nte sha kwa Yehova. Ba Charles Chappell batile: “Imfumu iikalamba yalitulandiileko, yaebele bashimafunde ukuti yalesambilila Baibolo na ba Nte pa myaka ibili. Yalibalondolwelele ukuti ukuteyanya kwesu takuitumpa mu fya mapolitiki kabili kulasambilisha abantu ifya kuba ne mibele isuma. Lyena yalandile no kuti bushiku bumo ilefwaya ukuba Inte. Ilyo shimafunde na umbi uwasambililepo Baibolo alandile cimo cine pali ba Nte, ilyashi lyalipwile.”

Bonse abafuminemo mu tubungwe twa mu bumfisolo balebacusha sana ku ndupwa shabo. Jonathan Sellu, umusepela uwafumine ku Koindu aali cishikulula ca bashimapepo abalepupa imipashi. Na o wine balemusambilisha ifya kupupa imipashi. Ilyo atampile ukusambilila Baibolo alilekele ukutuula amalambo ne ntambi shonse isha mipashi. Ba lupwa wakwe balemulwisha, balimuleseshe ukuya ku sukulu, balemutana ne fya kulya nga aya mu kulongana. Balemupumya abati, “Lesa obe alekuliisha!” Lelo Jonathan ena atwalilile fye ukuba uwakosa. Tafwile ku nsala. Alisambilile ukubelenga no kulemba e lyo pa numa alitampile na bupainiya kabili alitemenwe sana ilyo banyina basambilile icine.

Mu 1960, ifilonganino na mabumba ayaba ukutali fyalipangilwe mu Bo, Freetown, Kissy, Koindu, Lunsar, Magburaka, Makeni, Moyamba, Port Loko, Waterloo, na ku kapinda ka ku kuso aka musumba wa Kabala. Impendwa ya bakasabankanya muli ulya mwaka yalikuliileko ukufuma pali 182 ukufika pali 282. Bapainiya baibela abengi balishile ukufuma ku Ghana na ku Nigeria mu kukoselesha ifilonganino ifipya.

Bakasabankanya abapya abengi bali mu mabumba yabili: AbaKrio, abaleikala mu Freetown ne ncende sha mupepi, e lyo na baKisi abaleikala mu Citungu ca ku Kabanga. Nomba ilyo icine catwalilile ukukula, imitundu na imbi balitampile ukulasambilila icine. Pali iyi imitundu pali, abaKuranko, abaLimba, abaTemne aba ku kapinda ka ku kuso, abaMende aba ku kapinda ka ku kulyo e lyo ne mitundu imbi.

Mu 1961, Ing’anda ya Bufumu iya Cilonganino ca ba Freetown East yalipeelwe. Lyena Ing’anda ya Bufumu na imbi iya matafwali iya Cilonganino ca Koindu umwingalonganina abantu 300 yalipeelwe. Iyi Ng’anda ya Bufumu yali fye kwati Cikuulwa ca Kulonganinamo ukulongana ukukalamba. Tapapitile na nshita, baeluda 40 balisangilwe ku Isukulu lya Butumikishi Ilya Bulesa ilya kubalilapo mu Sierra Leone. Na cimbi icacitike muli ulya mwaka ca kuti bamunyinefwe balibombeleko muli kampeni ya kushalika Baibolo—Amalembo ya Calo Cipya.

Cine cine Yehova alepaala abantu bakwe. Pa 28 July, mu 1962, ubuteko bwa Sierra Leone bwalisuminishe ukulembesha akabungwe ka mwi funde aka International Bible Students Association, ako Inte sha kwa Yehova babomfya mu fyalo ifingi.

Natulande nomba pa calo icapakana na Sierra Leone ica Guinea (ico baleita kale ukuti French Guinea). Ilyo umwaka wa 1958 taulafika, bamunyinefwe bamo ilyo balepita muli ici calo balishimikiileko abantu, lelo abalashi ba buteko bwa ku France balibaleseshe. Lelo mu 1958, ifintu fyalitampile ukuwama ilyo icalo ca Guinea capokele ubuntungwa ku baFrench catampa no kulaiteka.

Pa numa ya ulya mwaka, Munyinefwe Manuel Diogo uwali ne myaka ya mu kubangilila kwa ba 30, uwafumine ku Dahomey (ino nshita calo ca Benin) kabili uwalelanda iciFrench aingile incito pa mukoti apo baleimba ulubwe ulwaba nge bumba mu Fria, itauni apaali amakilomita 80 ku kapinda ka ku kuso aka musumba ukalamba uwa Conakry. Apo  balefwaisha sana ukushimikila muli iyi ncende, ba Manuel balembeele kwi ofeshi lya ku France pa kuti babatumineko impapulo na bapainiya baibela. Pa kusondwelela kalata yabo batile: “Ndepepa fye ukuti Yehova akapaale umulimo wakwe pantu abalefwaya ukusambilila icine bengi.”

Iofeshi lya ku France lyalembeele Munyinefwe Manuel kalata iya kumukoselesha ukuti atwalilile ukwikala mu Guinea. Na kabili iofeshi lya musambo lyalitumineko painiya waibela ku kuya musambilisha ifya kubomba umulimo wa kushimikila. Ifyo Manuel bamukoseleshe fyalimupeele inkosho kabili atwalilile ukushimikila mu Fria mpaka fye ne mfwa yakwe mu 1968.

Ilyo munyinefwe Wilfred Gooch, Kangalila uutandalila Imisambo aile ku Conakry mu 1960, asangileko bamunyinefwe babili aba mu Africa balebomba umulimo wa kushimikila. Munyinefwe Gooch atile umulimo wa kushimikila mu Guinea ufwile ukwangalilwa no musambo wa mu Sierra Leone ukucila ukulayangaliwa no wa ku France. Iyi imitantikile yatendeke pa 1 March 1961. Ilyo papitile umweshi umo, icilonganino ca kubalilapo mu Guinea calipangilwe mu Conakry.

Imbila nsuma yalitampile ukubilwa mu ncende shimo isha mu Guinea. Ba Falla Gbondo, abaKisi abaleikala mu Liberia balibweleele ku mwabo ku Fodédou ukwaba amakilomita 13 lwa ku masamba ya musumba wa Guékédou. Balisendele ibuuku lya Ukufuma kuli Paradaise wa Luba ukuya kuli Paradaise Wanonkwa. Ba Falla tabaishibe ukubelenga, lelo balelondolwela abantu babo ifikope ifyali mwi buuku. Ba Falla batile “Abengi baletemwa sana ukulanshanya ifyali muli ili buuku ica kuti balelita ukuti ibuuku lya kwa Adamu na Efa.”

Ba Falla balibwelelemo ku Liberia uko baile batishiwa no kutendeka bupainiya bwaibela. Imiku ibili mu mweshi, balibwelelemo ku Fodédou uko balesambilisha abantu  nalimo 30. Papitile fye inshita iinono ba Borbor Seysey, bapainiya baibela abaKisi abafumine ku Liberia balishile. Bonse babili balibombele pamo bapanga ne bumba na limbi ilya ba Nte mu Guékédou. Amabumba yonse yabili yaishileba ifilonganino.

Ilyo abaKisi abengi basambilile icine no kuba ba Nte, imfumu shabo shalimwene ukuti imibele yabo yali iisuma. Ba Nte balebombesha, bali abafumacumi kabili balengele mu bwikashi mube umutende. Ilyo bamunyinefwe balombele incende apa kukuula Ing’anda ya Bufumu mu Fodédou, imfumu shalibapeele incende ama hekita yatatu. Bapwile ukukuula Ing’anda ya Bufumu iya kubalilapo mu Guinea mu kubangilila kwa 1964.

Ifimfulunganya e lyo fyatendeke fye mu Conakry. Ifimfulunganya fya mapolitiki fyalengele abalashi ba buteko baletunganya ba mwisa. Ubuteko bwalikeene ukupeela bamishonari bane aba ku Gileadi ifitupa fya kwikalila mu calo, e co balibatamfishe. Bamunyinefwe babili abena Ghana balibekete no kubakaka mupepi ne myeshi ibili pa milandu ya kubabepesha fye.

Bati bashifuma mu cifungo, munyinefwe umo pali aba, Emmanuel Awusu-Ansah, balimwikete na kabili no kumubika mu cifungo umwabipile sana. Ilyo ali mu cifungo ca fiko, alembele ati: “Lwa ku mupashi, ndi fye bwino, nomba fye ubulwele bwa mpepo tabupwa. Nalyo line ndashimikila. Uyu mweshi wapwile nabombele amaawala 67, kabili abantu abo nsambilisha Baibolo balitampile ukushimikila.” Umo pali aba abasambi alisambilile icine. Ilyo papitile imyeshi isano Munyinefwe Awusu-Ansah balimukakwile mu cifungo bamutamfisha na ku Sierra Leone. Mu Conakry mwashele fye kasabankanya umo.

Mu 1969, ilyo ifyongo fya bamapolitiki fyacepeleko, bapainiya baibela balifikile mu Conakry. Ilyo aba mu buteko babasuminishe, balikuulile Ing’anda ya Bufumu, babikapo  ne cipampa. Tapapitile na nshita, abantu 30 balitendeke ukulongana lyonse.

Pa mulandu wa kuti balebekata sana, bamunyinefwe baleba abacenjela pa kushimikila. Lelo ilyo umwenso wapwile, balitwalilile ukubombesha. Mu 1973, aba muli ici cilonganino icinono, basabankenye amatrakiti 6,000. Pa numa, bakasabankanya baleshalika magazini mu maofeshi na mu fifulo fya makwebo. Panono panono, abalashi ba buteko batampile ukwishiba bwino umulimo wesu. Apo bamunyinefwe balitekenye kabili batwalilile fye ukubombesha, pa 15 December, 1993, ubuteko bwalibasuminishe ukulembesha akabungwe ka mwi funde aka “Christian Association of Jehovah’s Witnesses of Guinea.”