Thomson uwikala ku Uganda, alilekele ukuya ku calici, pantu bashimapepo ba mu macalici balelombelesha sana indalama ku bantu abaleya mu kupepako. Lelo alitwalilile ukubelenga Baibolo cila bushiku. Ibuuku lya Ukusokolola e lyo atemenwe sana ukubelenga kabili aleesha ukwilula umo ifyebo alebelenga fyalola no kufilemba mu katabo. Ilyo munyinefwe umo aile apo Thomson alebombela ifya  makuule, amusangile alebelenga Baibolo. Balilanshenye bwino sana ifya mu Baibolo ica kuti Thomson alipokele ne citabo citila Bushe Cinshi Baibolo Isambilisha? ico munyinefwe amupeele. Thomson alibelengele icitabo conse ubushiku bonse. Ubushiku bwakonkelepo, alitumiine munyinefwe meseji pa foni no kumweba ukuti: “Shikulu acindikwe pa citabo ico mwampeele. Nomba kuti nafuma muli Babiloni Mukalamba.” Thomson alilombele impapulo shonse isho balandilepo mu mafutunoti na mu fyebo fyalundwako ifya muli ici citabo. Alitemenwe sana ukusambilila Baibolo, alilundulwike bwangu kabili alibatishiwe pa Kulongana kwa Citungu ukwa mu 2012 ukwakwete umutwe uwaleti “Sunga Umutima Obe!” Mu March 2013, Thomson alitampile bupainiya bwa nshita yonse pa kuti aleyafwa abantu ukwiluka ukuti balingile ukufuma muli Babiloni Mukalamba.

Jimmy akuliile ku Port Louis, umusumba ukalamba uwa calo ca Mauritius. Atampile ukunwa ubwalwa ninshi ali fye ne myaka 16 kabili alekolwa cila bushiku. Ilingi line alekolwa ica kuti alefilwa no kuilama kabili pa miku iingi balimukakile mu cifungo. Limo alenwa amabotolo ya bwalwa batila rum yatatu kabili alepeepa imishanga ya fwaka 60 mu bushiku bumo. Nga takwete indalama sha kushitamo ubwalwa, alenwa umuti wa kuwamisha amawindo umwaba ubwalwa. Alenwa na pefyumu yaba nyina iyo batila eau de cologne. Ilyo umuntu umo amwebele ukuti ubwalwa bwalamwipaya, aile ku cipatala uko bapeela abantu imiti ya kucefyako ukunwesha nelyo ukukunkuma ku bwalwa ne miti ikola uko aikele umwaka umo na hafu, lelo imiti tayabombele kuli ena.

Umuye nshiku, Jimmy asukile amonana ne Nte sha kwa Yehova kabili ilyo bamwipwishe nga kuti atemwa ukulamusambilisha Baibolo, alisumiine. Inshita shimo nga balemusambilisha alefuma pe sambililo ku kuyanwamo ubwalwa.  Mu kupita kwa nshita, bamunyinefwe 8 e bamusambilishe Baibolo. Na mu kulekelesha Jimmy alilwike ukuti alingile ukwalula imisango yakwe. Atile: “Naumfwile kwati ulupanga ulwalembwa pa AbaHebere 4:12 lwalepulinkanya mu mutima. Bushiku bumo ilyo nalebelenga Baibolo, nasangile ilembo lya Amapinda 24:16 ilitila: ‘Umulungami kuti awa imiku 7 lelo ukwima akema.’ Ili ilembo e lyalengele ukuti njaluke.” Pa numa ya ‘kuwa’ nangu ukufilwa ukwaluka ilyo bamunyinefwe 7 basambilile nankwe, Jimmy alefwaisha “ukwima” nelyo ukwaluka lintu munyinefwe uwalenga 8 atampile ukusambilila nankwe. Alitendeke ukulongana, alipaapeete Yehova ukuti amukoshe kabili alilekele ne misango yabipa iyo alecita. Mu 2003, alibatishiwe kabili mu 2012, alitampile ukubomba nga painiya wa nshita yonse. Pali ino nshita mubomfi utumikila mu cilonganino caba pa cishi ca Rodrigues.

Ba Mary, abali ne myaka 70 abekala ku Kenya balepepa ku icalici limo fye ilya Presbyterian. Balibombeshe ukwafwilisha icalici ukulasanga indalama kabili balyafwilishe ukukuula ne calici limo. Ilyo umwana wabo umwaume asambilile icine no kuba Inte, ba Mary tabatemenwe. Nga abeta ukuya mu kulongana, balekaana abati balefwaya ukusambilila ifya mu Baibolo mu lulimi lwabo, ulwa ciKikuyu te mu ciSwahili. Lelo bushiku bumo balisumine ukuyasangwa ku kulongana kwa citungu ukwali no kuba mu lulimi lwa ciKikuyu. Pa kulongana baikele pa ncende bapekanishishe abakoloci. Balitemenwe sana ukumona ifyo abantu bali ne cikuuku no kutemwa kuli bena. Ba Mary batile tabatalile abamonapo abantu abalanga ukutemwa kwa musango ulya ku calici balepepa. Balekutikisha ilyo amalyashi yonse yalelandwa,  kabili balitemenwe fyonse ifyo baumfwile. Ilyo babepwishe nga kuti batemwa ukusambilila Baibolo muli broshuwa itila Mulekutika kuli Lesa, balisumine apo pene fye.

Pa numa ya kusambilila pa myeshi iinono, ba Mary batampile ukufwaisha ukuba Inte ya kwa Yehova, e co bailefuutisha ishina lyabo ku calici. Bashimapepo ba ku calici balikalipe nga nshi, ica kuti balitile na pasta ukufuma ku musumba ukalamba uwa Nairobi ukuti alanshanye nabo. Pasta alyeseshe na maka yonse ukunashanasha ba Mary ukukanafuma mu calici, lelo alifililwe. Aipwishe ba Mary ati, “Ni bani bakaba ifibusa fyenu nga mwafuma mu calici? Mwalikwata ifibusa ifingi na bena mupalamano abengi mu calici.”

Ba Mary bayaswike abati, “Yehova na bamalaika e bakaba ifibusa fyandi. Ba Nte nabo bakaba ifibusa fyandi.”

Ilyo uyu pasta afililwe ukunashanasha ba Mary, alibwelelemo. Ba Mary balitwalilila ukulunduluka mwi sambililo lya Baibolo kabili lyonse balalongana nangu ca kuti Ing’anda ya Bufumu yaba ukutali na kuntu bekalila. Bushiku bumo tabakwete indalama sha kuninina motoka pa kuya ku kulongana, e co baendele pa nshi pa maawala yabili ninshi ne  mfula ileloka. Nangu ca kuti abena mupalamano balabapumya, ba Mary tabafwaya ukuleka ukulongana, bafwaisha fye ukutwalilila mpaka bakabatishiwe.

Ashton umukashana uuli ne myaka 14 ekala ku Cameroon. Ilyo atampile ukusambilila Baibolo ne Nte sha kwa Yehova, ba wishi mukalamba na bena mwabo abo aleikala nabo balemukaanya sana. Balemupatikisha ukuti aleya nabo ku kupepa kwi calici lya baPentekosti. Bushiku bumo ilyo bali mu calici, pasta umwanakashi aleikata pa mitwe ya bantu pa kuti bapokelele ico baleti “umupashi” uwalelenga balepona pa nshi. Lelo Ashton ena taponene. Pasta alipepele imiku ne miku lelo Ashton ena atwalilile fye ukwiminina, e pa kumukolokofya pa kuti awe! Ilyo babwelele ku ng’anda, Ashton aebele ba wishi mukalamba na bena mwabo ukuti pasta acimukolokofya, nomba tabasumine. Ukutula lilya line atile takatale abwelelako na kabili ku calici. Ukushinta na lelo, Ashton alitwalilila ukulongana ku Ng’anda ya Bufumu nangu ca kuti ba lupwa wakwe na bena mupalamano balamukaanya no kumutuka.

Nangu ca kuti ali fye no mwaka umo ne myeshi isano, Anilpa alibombeshe muli kampeni ya kwita abantu ku kulongana kwa citungu ukwali mu Angola mu mwaka wa 2012. Umulimo Anilpa akwete kukonkonsha pa ciibi e lyo alolela abene ba ng’anda ukwisulako pa kuti abapeele akapepala ka kubetilapo, e lyo banyina balondolola ico bakonkele. Apo Anilpa aleumfwa bwino ukukonkonsha pa fiibi, limo aleya mu kukonkonsha pa ng’anda iikonkelepo ilyo banyina bashilapwisha no kulanshanya. Abo Anilpa alepeela utupepala  pa mayanda, balitemenwe sana. Ku ca kumwenako, pa bushiku bwa kulekeleshako ubwa kulongana kwa citungu, umwanakashi umo aile kuli Anilpa no kumweba ati: “Nacilakufwaya, ala natemwa ifi nakumona pantu niwe wanjitile kuli kuno kulongana.”

Mu mweshi wa August 2012, bakasabankanya aba mu Cilonganino ca Antaviranambo ku Madagascar bakumenye ibumba lya bantu abalefwaya ukuba Inte sha kwa Yehova. Aba bantu batile baleumfwa ububi sana pantu intungulushi shabo isha mapepo shaali sha bumbimunda. Abantu abalepepa kuli ili calici batile bashimapepo babo tabalebasambilisha ifya mu Baibolo kabili tabakwete ne mpapulo ishalelanda pa fyo basuminemo. Indalama isho balebalipilisha ku macalici shali ishingi sana, kabili tabatemwanene nge fyo Abena Kristu balingile ukutemwana. Na kabili batile balishibe ukuti ba Nte bena tabakwata amafya ya musango uyu.

Pa numa ili bumba lyalembele ku musambo aliti: “Ico twalembela iyi kalata kumwishibisha ukuti tulefwaya ukubombela Yehova. Nomba uko twikala kutali sana ica kuti  twenda amaawala 9 nelyo 15 pa kufika ukwa kulonganina. Kanshi twapaapaata, tumeni umuntu uwa kwisa mu kutusambilisha Baibolo. Te kuti tubombele Yehova no mweo onse nga ca kuti tamutumine uwa kutusambilisha pa kuti tukoshe bucibusa bwesu na Lesa. Bonse pamo tuli 215 ukufuma ku mishi itatu. Kale twalikwete amacalici ayo twalepepako, nomba bonse tulefwaisha ukulabombela Yehova no kulamumfwila no mweo onse. Tulecetekela ukuti mukatuma uwa kutwafwilisha.”

Bamunyinefwe baliile mu kumona ili bumba kabili baendele amaawala 9 pa kuyafika pa mushi wa kubalilapo. Bamunyinefwe bapekenye ukuti kube ukulongana kabili abantu 65 e basangilweko. Aba mu mishi imbi balyumfwile ukuti ba munyinefwe baali muli uyu mushi. E co nabo balilombele ukuti bamunyinefwe bakaye basambilishako ifya mu Baibolo. Bamunyinefwe balikonkenyepo ubulendo no kwenda amaawala na yambi yane pa kuyafika pa mushi walenga bubili apo bapekenye ukulongana na kumbi, kabili abantu 80 e balongene. Pali uyu mushi napo bamunyinefwe bamonene na bantu abafumine ku mushi umbi abapaapeete ukuti bayebasambilisha. Bamunyinefwe balisumine ukuya nabo kabili baendele amaawala yabili ukuya kuli uyo mushi uko abantu 50 balongene.

Pa miku ibili abantu ukucila pali 30 aba muli iyi mishi baliile mu kulongana ku Mahanoro kabili pa kuyafika ukwa kulonganina baleenda ubushiku bumo na hafu. Na bambi 25 apali abaupana, indupwa, na bakoloci, baliile ilyo kangalila wa muputule atandalile cilya cilonganino. Bonse baikele mu ng’anda imo kabili cila muntu aleshimika ifyo asambilile no kwipusha amepusho mpaka na pa kati ka bushiku. Aba bantu batile kwali na bambi abengi mu mishi abalefwaya ukuba Inte pantu balifuupwilwe pa fyo balebacusha kuli bashimapepo wabo.