Mu musumba wa Las Vegas mu Nevada, umulume no mukashi balefwaya ukukuukila ku ncende imbi uko balefwaya ukwikala ku matwi tondolo, e ico balishitishe ing’anda pa kuti bayeikala ku Dominican Republic. Aba bantu tabaali ba Nte. Kwashele fye nshiku 10 pa kuti indeke baali no kubomfya ime, lelo mu ng’anda mwena balingile ukufumamo. Abena mupalamano babo, Inte sha kwa Yehova,  balefwaya ukwafwa ulu lupwa, e co balibetile ukwikala nabo pa ng’anda. Ilyo bashilaya, baliile bonse ku kulongana ku Ng’anda ya Bufumu kabili ilyo baumfwile balumbula umwaka wa 1914 balipapile no kutemwa sana. Aba baupana balishibe ukuti uyu mwaka walicindama sana mu lyashi lya kale. Bashifika fye ku Dominican Republic, balilombele ba Nte ababalilepo ukubatandalila ukuti balebasambilisha Baibolo. Pa numa ya mwaka umo ne myeshi ibili, bonse babili baliipeele no kubatishiwa.

Ilyo kwali ukulangisha no kushitisha amabuuku ukwa fyalo ifingi mu 2012, mu musumba ukalamba uwa mu Panama, bamunyinefwe nabo balikwete itebulo apo babikile impapulo. Abana be sukulu babili abakashana baile pali ili itebulo lya bamunyinefwe. Umo pali aba bakashana aebele nkashi uwaleshimikila pali ili itebulo ukuti alikalipe sana pantu bawishi balikunkwime ku miti ikola kabili taishibe ne fya kucita. Nkashi abuulile icitabo ca Ifipusho Abacaice Bepusha ne Fyasuko Ifingabafwa Volyumu 2 pa mutwe uutila: “Kuti Nacita Shani nga ca Kuti Abafyashi Bandi Balitekwa Ubusha ku Miti Ikola Nangu ku Bwalwa?” Umukashana atile: “Mwampeela fye ifyo ndefwaya!” Abakashana balikumbatiile nkashi kabili pa numa fye ye awala limo balibwelele ku kumutasha na kabili. Pa nshiku shisano isho balelangisha no kushitisha amabuuku, bamunyinefwe bapeele abantu ifitabo 1,046, magazini 1,116, e lyo na mabroshuwa 449. Kabili abantu 56 e bashile amaadresi yabo pa kuti ba Nte bakabatandalile.

Ba Fredy abalanda ululimi lwa ciCabecar bekala mu mishi ya mpili mu calo ca Costa Rica. Imyaka ine iyapitapo,  ba Fredy balibapeele icitabo citila, Bushe Cinshi Baibolo Isambilisha? na broshuwa itila Bushe Cinshi Cintu Lesa Afwaya kuli Ifwe? ilyo balebomba mu musumba ukalamba uwa San José. Kasabankanya uwabapeele ishi mpapulo abebele ukuti nga babwelelamo bakayeshimikilako abantu babo. Ilyo ba Fredy babwelelemo, balibelengele icitabo kabili balyalwike sana mu mikalile yabo ica kuti balilembeshe ne cupo cabo ku buteko. Balibombeshe ukusambilisha abantu icine abalanda iciCabecar.

Ba Fredy balipekenye amasukulu ya kusambilisha abasambi babo Baibolo. Balipangile amabumba 6 ukulingana ne fyo cila musambi abombele pa mashindano ayo babapeele pa kuti beshibe ifyo cila muntu aishibe ifya mu Baibolo. Lyonse balepekanya ukuti kube ukulongana. Balepekanya ne Cibukisho, no kulemba utupepala twa kwitilapo abantu ku Cibukisho utwaleti: “Inte sha kwa Yehova balemwita ku kusefya Icibukisho ca mfwa ya kwa Yesu pamo na ifwe.” Balecita fyonse ifi pa myaka ine ukwabula ukulanshanyapo na ba Nte. Pa myaka yonse balitwalilile no kupepa kuli Yehova ukuti atumeko ba Nte aba kubafwa mu mulimo.

Nomba line fye, Yehova alyaswike ipepo lya ba Fredy. Nangu ca kuti ulwendo lwalyafishe, kwali ba Nte bamo abaipeleeshe ukuya ku mushi ukwikala ba Fredy, kabili balipapile sana ukumona fyonse ifyo babombele. Ba Nte batile: “Nangu ca kuti ba Fredy tababatishiwa, bekala fye kwati ni ba Nte!” Ilyo papitile fye imyeshi itatu, ba Fredy balifikilepo ukuba kasabankanya uushabatishiwa. Pa kuti babatishiwe, baliile ku kulongana kwa citungu uko basangilweko pa muku wa kubalilapo pamo na basambi babo aba Baibolo 19. Pali nomba, balipanga amabumba na yambi yatatu aya balanda iciCabecar mu mishi ya mu kati sana ukucila no kwikala ba Fredy.

Bushiku bumo, Anna uusambilila ku sekondari mu America, alilondolwele bwino ifyo asuminamo ilyo abo asambilila  nabo balemupumya ukuti tasumina ukuti muli Lesa umo mwaba abene batatu. Anna atile: “Batampile ukumpumya lelo naikele fye tondolo pantu nshalefwaya abantu ukupata Inte sha kwa Yehova.” Ubushiku, Anna alipepele kuli Yehova ukuti amukoshe kabili alifwailishe ne fyebo pa cisambilisho ca kuti muli Lesa umo mwaba abene batatu. Ubushiku bwakonkelepo, Anna alisendele Baibolo ku sukulu. Abana be sukulu banankwe balimushingulwike, balamuseka kutumfya kutumfya. Lelo tatiinine, alibalangile amalembo no kupelulushanya nabo. Bonse abalemutaalika batalele fye tondolo. Kapitao wa mwi kalasi lyabo uwakoselepo sana ukumucusha alandile fye apabuuta tuutu ukuti nomba akulacindika ba Nte. Umwaka onse ilyo bali pa sukulu, uyu kapitao aleipusha Anna amepusho ayengi pa fyo asuminamo.

Pa Mulungu ulucelo, namayo umo uwikala mu Barbados aleya ku calici ilyo akamushipi ka pa nsapato afwele kaputwike. Aile pa ng’anda yali mupepi no kulomba ka napini pa kuti amangileko akamushipi pa lusapato. Kanshi pa ng’anda apo  uyu namayo aile, pekala nkashi no mwana wakwe umukashana. Ilyo namayo alewamya ulusapato, nkashi alemulondolwela ifyo amasesemo ya mu Baibolo yalefikilishiwa. Lyena umwana wa kwa nkashi aipwishe namayo nga kuti atemwa ukuyalongana bonse ku Ng’anda ya Bufumu lilya line. Uyu namayo atile apo alicelelwe kale ku calici ku mwabo, cali fye bwino ukuya bonse mu kulongana. Pa kulongana, namayo alebelenga amalembo yonse muli Baibolo yakwe iya King James. Alitemenwe sana ifyo aumfwile pa kulongana. Atile alitendelwe ukumfwa icongo ca ng’oma no kupundapunda ifyo aba mwi calici lyabo balecita no kuti ni kale atampa ukufwaya ukusambilila Baibolo mu ncende umushili icongo. Alipokele icitabo ca: Bushe cinshi Baibolo isambilisha? kabili alitendeka no kusambilila Baibolo. Alalongana lyonse no kwasukapo sana.

Kasabankanya umo umulumendo uwikala ku Guyana atile: “Nalitemwa ukushimikila ku bana be sukulu banandi, lelo kwaliba umulumendo umo uushifwaya ukuti ndeshimikila. Bushiku bumo alinsunkiile ku cibumba no kunjeba ati, ‘Leka ukushimikila!’ Namwaswike nati Yehova fye e wingandesha ukushimikila. Ilyo natwalilile ukushimikila, uyu mulumendo aliputwile intambo ya ku kacola kandi aka kupaapa mu numa. Lyena angumine ikofi pa mulomo no kulepuka walepuka. Bonse babili balitwitile kwi ofeshi lya bakafundisha mukalamba, uko bailenjipusha ico nalufyenye pa kuti umulumendo angume ikofi pa mulomo. Nabaswike nati, nacilashimikila imbila nsuma e co angumiine. Bakafundisha mukalamba banjipwishe icalengele ukuti ine nimumamo, kabili batile na ine wine nga nalimuminemo. Natile nalisambilila mu Baibolo pa Abena Roma 12:17 ukuti umwina Kristu ‘talingile ukubwesesha ububi pa bubi.’ Balyumfwile ifyo nalandile, banjebele ukuya kabili batile baali no kubombelapo pa mulandu.”