Pali ino nshita, vidio iitila Mulandu Nshi Mulingile Ukusambilila Baibolo? yalipilibulwa mu ndimi 8 isho abena Canada balanda. Ilyo kwali kampeni mu October 2014, aba bwananyina mu musumba wa Nunavik Arctic balitambishe abantu iyi vidio mu lulimi lwa ciInuktitut mu mishi 14 umwikala abantu 12,000.

Mu September 2014, aba bwananyina balikwete ukulongana kukalamba ukwa bantu abafuma mu fyalo ifingi mu cibansa ca mupila ico beta ukuti Sangam World Cup Stadium icaba mu musumba wa Seoul ku South Korea. Abantu abalongene balicilile pali 56,000. Umukalamba wa  cibansa ca mupila alitashishe pa mibele iisuma iya ba bwananyina na pa fyo balebombela pamo. Atile: “Bonse abalongene bali ne mibele iisuma. Nalipapile ilyo namwene ifyo bawemye bwino icibansa ukucila ne fyo ababomfi besu baciwamya. Kuti cawama nga nshi nga ca kuti na babomfi besu balebombela pamo nga ba Nte. Nga tulefwaya ukulapepa bwino, tulingile ukuba nge Inte sha kwa Yehova.”

Mu May 2012 ubuteko bwa ku Sweden bwalikeene ukubombela pa cipepala ico ba Nte baipushishepo ukubapeela indalama isho ubuteko bupeela imipepele yonse muli ici calo. E ico Ibumba Litungulula lyalisuminishe aba bwananyina ku Sweden ukutwala uyu umulandu ku cilye cikalamba ica Supreme Administrative Court.

 Aba muli ici cilye balefwaya ukwipusha aba bwananyina pa kuti bayumfwile pa tunwa twabo. Bamunyinefwe abafumine ku fyalo ifyalekanalekana balikumene pa kuti bapandashanye amano pa fyo bali no kulayasuka aba mu cilye. Aba bamunyinefwe bakumanine pa Ng’anda ya Bufumu iya mu musumba wa Stockholm.

Ilyo balelanshanya, baumfwile umuntu alekonkonsha. Munyinefwe aliswile iciibi no kusanga ukuti abalekonkonsha bakashana babili, umo ali ne myaka 13 umbi na o ali ne myaka 14. Lyena aba abakashana baebele munyinefwe abati balefwaya ukwishiba fimo pa Nte sha kwa Yehova. Uyu munyinefwe atile: “Nalefwaya ukubeba ukuti bakabwele ubushiku bumbi pantu twalikwete ifya kucita ifingi.”

Na lyo line, munyinefwe alilandile na aba abakashana. Abakashana balipwishe munyinefwe amepusho ayengi, yamo yali pa mikalile na pa kusala intungulushi. Ilyo munyinefwe apwishishe ukulanshanya na aba abakashana, alingiile mu Ng’anda ya Bufumu no kweba bamunyinefwe amepusho ayo abakashana bamwipwishe ne fyo abaswike.

Ubushiku bwakonkelepo, bamunyinefwe balipapile pantu amepusho ayengi ayo aba mu cilye babepwishe yali yamo yene na yo abakashana baipwishe munyinefwe ubushiku bwafumineko. Munyinefwe uwaleimininako Inte sha kwa Yehova atile: “Nshaletutuma kabili nalitekele no mutima nangu ca kuti abalendubulwisha bali ni ba loya abasambilila sana. Nshaletwishika no kutwishika ukuti Yehova alitukanshishe ubushiku bwafumineko lintu abakashana baishile.”

Aba mu cilye balitupeele insambu kabili babweseshe umulandu ku buteko.

Ken uuli ne myaka 6 uwikala ku Haiti alitemenwe sana ilyo aumfwile ukuti bali no kubakuulila Ing’anda ya  Bufumu. E ico alipangile akabokoshi umo alesungila indalama no kukafisa ku muputule uko alelaala. Mu cifulo ca kubomfya indalama isho abafyashi balemupeela isha kuliilamo ku sukulu, ena alebika mu kabokoshi. Ken alitwalilile ukusunga indalama mu kabokoshi mpaka ilyo aba makuule batendeke ukukuula. Lyena alibapeele akabokoshi umwali indalama ishingi isho bashitilemo isaaka lya mupunga ilikalamba. Abalekuula balilile uyu umupunga pa nshiku ishingi.

Uyu mwaka wapwile, lintu kwali ubulwele bwa Ebola, aba bwananyina mu Sierra Leone balefwaikwa ukukwata ifitupa pa kuya ku ncende isho babindile ukuyako. Ku ca kumwenako, bakangalila ba muputule balefwaikwa ukukwata amabarji ne fitupa ifya kusuminisha imyotoka shabo ukuya ku ncende isho babindile ukuyako. Abalesenda impapulo na makalata nabo bene balingile ukukwata ifi fintu pa kuya kuli ishi ncende. Bamunyinefwe ababa muli Komiti Iyafwilisha Abasanshilwe balingile ukutwala ifisolobelo ifyo balebomfya pa kundapa abalwele ne fya kulya. Icawemeko ca kuti aba bwananyina balebapeela amabarji ne fitupa ifyo balingile ukukwata.

Fimo ifyacitike fyalikoseshe icitetekelo ca ba bwananyina. Bamunyinefwe balilembele icipepala ica kwipushishapo aba mu buteko ukubapeela amabarji 34 ne fitupa fya myotoka 11, lelo balingile ukumonana no mukalamba wa bashilika pa kuti abasuminishe ukupoka ifi fintu. Lyena bamunyinefwe babili abafumine kwi ofeshi lya musambo balilemonana nankwe pa bushiku baleenekela ukuyasenda amabarji ne fitupa. Ku ca bulanda, icipepala calilubile. Bamunyinefwe balibebele ukufwaya ici icipepala mu mafaelo ya uyu mukalamba wa bashilika lelo tabacimwene. Pali iyi yine nshita, umukalamba wa bashilika aebele kalemba wakwe  ukuti ali mu kwisala iofeshi lyakwe no kuti pali no kupita imilungu ibili pa kubombela pa fipepala na kabili. Ilyo line bamunyinefwe balipepele mu mitima pa kuti Yehova abafwe. Lyena uyu mukalamba wa bashilika aloleshe bamunyinefwe e lyo abepusha ati, “Mabarji yanga mulefwaya, inga ifitupa fyena ni finga mulefwaya?” Ilyo bamwebele, aimine pa cipuna no kubasasukila ati, “Fyafula sana ifyo mulefwaya!”

Bamunyinefwe balimulondolwelele imilimo tubomba ne fyo baleyafwilisha abantu abasanshilwe ku cikuko ca Ebola. Lyena uyu umukalamba wa bashilika alikutumene, alolesha kalemba wakwe, e lyo amweba ati, “Bapeele fyonse ifyo balefwaya.”