MU MAY mu 1963, kwali abantu abapatile abena China bonse abaleikala mu West Java no kubemina balibemine. Ifi ifimfulunganya fyabipishe ku Sukabumi uko twaleikala no kucitila amakwebo ya kusendela abantu ifipe mu matraki yesu. Abantu abengi ukubikako fye na bena mupalamano baingile mu ng’anda yesu bukali bukali. Twalitinine sana ica kuti twaikele fye mwenso mwenso ilyo baleonaula no kusenda ifipe fyesu.

Ilyo aba bantu abankalwe baile, abena mupalamano balishile mu kutusansamusha. Batata balikele nabo pa nshi mu muputule wa kutushishamo. Ilyo bafwaile mu fipe ifyaonaike, balisangilemo Baibolo yabo iya ciSundanese. Balikupukwile no kweba abena mupalamano besu ukuti Baibolo yalisobele ukupakaswa kwa musango uyu. Lyena balibalondolweleleko pe subilo lya nsansa ishikaba mwi sonde lyonse ilyo Ubufumu bwa kwa Lesa bukalateka.

Batata tababikile amano ku kunonka ifyuma. Lyonse baletweba ukuti: “Ifya kwa Lesa e fyo tulingile ukulabikako sana amano!” Ala tulatasha sana pa fyo bali ica kumwenako icisuma ica kuti bamayo, na fwe bana bonse 6, bashikulu abali ne myaka 90 ukubikako fye na balupwa wesu abengi na bena mupalamano twalisambilile icine.