Ilyo intungulushi sha ba mu macalici ya batila bena Kristu shaumfwile ukuti ubuteko nabupeela ba Nte insambu sha kulapepa, balifulilwe sana. Bashimapepo ukucila pali 700 ukubikako ne ntungulushi isha mu macalici 7 aya baProtestanti, balikumene mu Jakarta pa kuti bapatikishe aba mu buteko ukubinda ba Nte na kabili. Lelo aba mu buteko balikene.

Lintu abekala calo baumfwile ukuti aba mu buteko nabafumyapo icibindo pali ba Nte mu Indonesia, abengi abalefwaya ukusambilila Baibolo balilembeele aba kwi ofeshi lya musambo ukubeba ukuti babatumineko impapulo nelyo ukuti balebasambilishako Baibolo. Mu 2003, abantu ukucila pali 42,000 balisangilwe ku Cibukisho. Kanshi abasangilwe ku Cibukisho balifulile ukucila bakasabankanya abali mu Jakarta pali iyi nshita. Na kabili abantu mupepi na 10,000 balisangilwe ku kulongana ku kalamba mu Jakarta ukubikako fye na umo pa bakalamba abalebomba ku Dipatimenti Ilolekesha pa Mipepele mu Indonesia. Uyu mwaume alitemenwe ukumona uko abakalamba e lyo na abaice kumo mwi bumba balekupukula amaBaibolo yabo kalanda nga alanda ilembo. Lyena alyebele aba bwananyina ukuti akaafwa abantu ukwishiba ukuti fyonse ifyo bashimapepo ne ntungulushi sha mu macalici balelanda pa Inte sha kwa Yehova fya bufi.

Apo ubuteko bwalifumishepo icibindo pa mulimo wa ba Nte, bamishonari baliile na kabili mu kubombela mu Indonesia. Bamishonari ababalilepo ukufika ni ba Josef Neuhardt na bena mwabo ba Herawati * (abafumine ku fishi ifyo beta ukuti Solomon Islands), ba Esa Tarhonen na bena mwabo ba Wilhelmina (abafumine ku Taiwan), ba Rainer Teichmann na bena mwabo ba Felomena (abafumine ku Taiwan), e lyo na ba Bill Perrie na bena mwabo ba Nena (abafumine ku Japan).  Lyena bamishonari na bambi abafumine kwi Sukulu lya Gileadi balibatumine ukuyabombela mu North Sumatra, mu Kalimantan, mu North Sulawesi e lyo na mu ncende shimbi isha mu Indonesia.

Mu 2005, iofeshi lya musambo lyalipekanye Isukulu lya Kukansha Ilya Butumikishi (pali ino nshita li Sukulu lya Bakabila ba Mbila Nsuma ya Bufumu) e lyo na Isukulu lya Bakangalila Benda. Munyinefwe Julianus Benig uwalesambilishako mwi Sukulu lya Kukansha Ilya Butumikishi atile: “Ala naletemwa sana ukwafwa abana besukulu ifyo bengeshibilako ukusambilisha nefyo bengaba bakalanda abasuma no kulabombako imilimo iingi mu cilonganino ca kwa Yehova.” Abengi abapwishishe ili sukulu ni bapainiya baibela nelyo bakangalila ba miputule. Bamunyinefwe abengi abasambilile mwi Sukulu lya Kukansha Ilya Butumikishi * ilya kubalilapo, balikanshiwe kale ninshi balibinda umulimo wa kubila imbila nsuma. Ili isukulu lyalibafwile ukubomba bwino imilimo ilyo  bafumishepo icibindo. Ba Ponco Pracoyo abali mwi sukulu lya kubalilapo batile: “Isukulu lyalingafwa ukuba sana ne cikuuku no kulabomba bwino umulimo wa mu muputule. Ala ifyo nasambilile muli ili sukulu fyalingafwile sana ukutwalilila ukulabomba bwino uyu mulimo!”

Ilyo babindile ba Nte pa myaka 25 mu Indonesia, aba bwananyina balelonganina fye mu mayanda ya bantu. Kwali fye ifilonganino ifinono ifyakwete indalama sha kukuulila Ing’anda ya Bufumu kabili calyafishe ubuteko ukubasuminisha ukukuula apa kupepela. Apo ifilonganino fyalefulilako fye, iofeshi lya musambo lyalipangile Iofeshi Lyangalila Amakuule ya Mayanda ya Bufumu (pali ino nshita ni Dipartimenti ya Makuuke) pa kuti bakuule Amayanda ya Bufumu ayengi.

Pa Mayanda ya Bufumu ayo babalilepo ukukuula, imo baikuulile pa cishi ca Nias mu North Sumatra. Ba Haogo’aro Gea ababa mu cilonganino ca Gunungsitoli pa nshita iitali batile: “Ilyo twaumfwile ukuti bali no kutukuulila Ing’anda ya Bufumu, twalitemenwe nga nshi. Aba kwi ofeshi lya musambo balitutumiine ababomfi ba makuule 7 aba kwangalila umulimo wa kukuula. Twapwishishe ukukuula Ing’anda ya Bufumu mu 2001.” Ba Faonasökhi Laoli abali muli komiti ya makuule batile: “Kale twalelonganina mu mayanda ya bantu ayanono kabili abekala mushi tabatucindike iyo. Lelo ilyo twapwishishe fye ukukuula Ing’anda ya Bufumu, fwe balesangwa ku kulongana twalifulileko ukufuma pali 20 ukufika kuli 40. Mu myeshi fye 12 twalifulile ukucila na pali 200. Ing’anda ya Bufumu yesu eyawamisha pa fikuulwa fyonse muli iyi incende kabili abantu nomba balicindika Inte sha kwa Yehova.”

Mu 2006 mu Bandung, ku West Java, aba bwananyina batampile ukufwaya apo bengakuulila Ing’anda ya Bufumu iya kubalilapo muli uyu musumba. Ba Singap Panjaitan, baeluda abali mu komiti ya makuule batile: “Palipitile imyeshi 12 pa kuti tusange apasuma apa kukuula Ing’anda ya Bufumu. Na lyo line, pa kuti ubuteko butusuminishe ukukuula, abena  mupalamano 60 balingile ukutusuminisha. Abena mupalamano 76 balitusuminishe, ukubikako fye no mwanakashi uo abantu bacindike sana uwaletulwisha kale. Ilyo Ing’anda ya Bufumu yapwile, twalitileko abena mupalamano no mukalamba wa mu buteko mu musumba wa Bandung ku kwisaimona. Uyu mukalamba wa mu buteko atile: ‘Ifi Ing’anda ya Bufumu ilemoneka iisuma kabili iya busaka e fyo bonse balingile ukulakuula amacalici yabo.’” Iyi Ing’anda ya Bufumu iya ntunti shibili baipeele kuli Yehova mu 2010.

Ukutula mu 2001, aba bwananyina balikuula Amayanda ya Bufumu ukucila pali 100 mu Indonesia kabili na yambi yalefwaikwa.