PA MULANDU wa fyo bacindamika nga nshi umulimo wabo uwa kusambilisha Baibolo, bamo kuti pambi batontonkanya ukuti tabasekelela mu masomo ya ku calo. Lelo ifyo te fyo caba. Pa kusambilisha bambi, kasambilisha intanshi afwile ukusambilila, kabili ici cifwaya ukukanshiwa kwalinga no kufundwa. E co ukusansha pa kubomfya bwino amasukulu ya ku calo, Inte sha kwa Yehova pa myaka iingi balinonkelamo mu  kutantika kwalekanalekana ukwa masomo na masukulu ifitungululwa na Watch Tower Society. Ifi fyalyafwa Inte na bambi ukuwaminako lwa ku muntontonkanya, mu mibele, na lwa ku mupashi.

Ku ca kumwenako, mu fyalo ifingi Inte shalilolenkana no kusonsomba kwaibela​—ifya kusambilisha abantu abakwete ishuko linono nelyo abashakwete ishuko lya kusambilila kwalinga mu masukulu na muli fyo tabaishiba ukubelenga no kulemba. Pa kupikulule yi mpika, Watch Tower Society yaliteyanyako amasukulu ya shibukeni.

Mu Nigeria, ku ca kumwenako, amakalasi ya shibukeni yalitungululwa ne Nte sha kwa Yehova ukutula 1949. Abena Nigeria abengi nga nshi balisambilila ukubelenga muli aya makalashi. Ilyo bafwailishe basangile ukuti Inte sha kwa Yehova ukucila pa maperesenti 90 mu Nigeria balishibe ukubelenga no kulemba, balicilile abaishibe ukubelenga no kulemba mu calo conse. Mu Mexico, Inte sha kwa Yehova balesambilisha abantu ukubelenga no kulemba ukutula mu 1946. Mu mwaka fye umo abantu ukucila pali 6,500 balibasambilishe ukubelenga no kulemba. Na kuba abantu ukucila pali 100,000 balibasambilishe ukubelenga no kulemba. Amakalasi ya shibukeni na kabili yaliteyanishiwa mu fyalo fimbi ifingi, pamo nga Bolivia, Cameroon, Nepal, na Zambia. Inte sha kwa Yehova balipulinta akatabo katila Sambilileni Ukubelenga no Kulemba ukucila pa mamilioni 7 mu ndimi ukucila pali 100.

Ukutantika kwa musango yo ukwa shibukeni ilingi line kwalishibikwa ku mabulashi ya fya masomo mu fyalo muntu yacitwa. Mu Mexico, ku ca kumwenako, umubomfi wa buteko alembele ukuti: “Ndetootela nga nshi pa kubombela pamo na imwe, kabili mu kwimininako ubuteko natuma kuli imwe ukutasha kwabo ukwafumaluka pa mulimo wenu uwacindama uulunduluka ku kumwenamo kwa bantu mu kuleta ulubuuto lwa kwishiba ku bashibelenga no kulemba. . . . Shi mwingatunguluka mu mulimo wenu uwa masomo.”

Pa mulandu wa kuti balicindamika nga nshi umulimo wabo uwa masomo ya Baibolo, Inte sha kwa Yehova balatukuta ukuwamyako amaka yabo aya kulondolola ifisambilisho fya Baibolo kuli bambi. Ku ca kumwenako, muli cimo na cimo ica filonganino ifyacila pali 119,000 mu kusaalala kwa calo, abasambi balabakansha mu kulamuka kwa kubelenga no kulanda kwa pa cintubwingi. Abasambi bonse, atemwa ni Nte nelyo iyo, balalekanina ukupeela pa ntanshi ye bumba ilyashi ilipi pa mutwe uusalilwe libela. Te mulandu no mushinku wabo, abasambi lyene balafundwa kuli kafundisha mu kuba no buyo bwa kubakansha mu kulamuka kwa kubelenga no kulanda kwa pa cintubwingi. Nangu bana abacepesha, mu kwangufyanya fye lintu baishiba ukubelenga, kuti balembwa no kupokelela uku kukansha, ukusanguka ukuba ukwa kwaafwa kuli bene na mu mbali shimbi, ukusanshako  na ku masukulu yabo aya ku calo. Bakasambilisha abengi balilandapo kuti abasambi Inte balacilapo ukuilumbulwila abene bwino.

Mu kulundapo, icilonganino cimo na cimo ica Nte sha kwa Yehova cilakoseleshiwa ukukwata laibrare mu Ŋanda ya Bufumu, nelyo umwa kulonganina, iyakwatamo ifya kwaafwa ukusambilila Baibolo, amadikishonari, ne fitabo fimbi ifya kuloshako. Uyu laibrare alabomfiwa kuli bonse abasangwa ku kulongana pa Ŋanda ya Bufumu. Ukubelenga kulakoseleshiwa apakalamba mu filonganino fyabo, kabili ulupwa lumo na lumo mu nshila imo ine lulakoseleshiwa  ukukwata laibrare wa lupwa uwabamo impapulo shalekanalekana ishilanda pa kukabila ukwa bana na bakalamba.

Watch Tower Society na kabili ilatungulula amasukulu ya kukanshishamo bamishonari abaume na banakashi, pamo pene na masukulu ya kukanshishamo abaume abakwata ifishingamo fya kutumikila mu filonganino fya cikaya. Aya masukulu yaba bushininkisho bwalundwako ubwa kuti Inte sha kwa Yehova balicindamika nga nshi amasomo.