ICIPANI ca U.S. National Institute of Mental Health casabankenye ifyafumine mu kwipusha abafyashi abalangulwikwe ukuba abatunguluka​—abo bantu abana babo, bacilile pa myaka ya bukulu 21, “baali bonse abakalamba ba kusandulula abo mu kumonekesha baleiteulwila bwino ku bwikashi bwesu.” Aba bafyashi baipushiwe ukuti: ‘Ukushintilila pa ca kukumanya ca pa lwenu, kupanda mano nshi  kwawamisha mwingapeela ku bafyashi bambi?’ Libili libili ifyasuko fyaleba ni fi: ‘Mulefusha ukutemwa,’ ‘mulesalapula mu kukuulilila,’ ‘mulepoose nshita capamo,’ ‘mulesambilisha abana benu icalungama ukufuma ku calubana,’ ‘lundululeni ukucindikana,’ ‘mulebakutikisha,’ ‘peeleni ubutungulushi ukucila ukukambisha,’ kabili ‘mwilaenekela ifishingabomba.’

Abafyashi, nangu cibe fyo, tababa beka mu kubombela pa kuletako abana bakalamba abashikatala. Bakasambilisha na bo balabomba ulubali lukalamba muli ici. Impanda mano umo uwabelesha uwa pa sukulu alandilepo kuti: “Ubuyo bwa ntanshi ubwa masomo bwaba kwafwilisha abafyashi ukuletako abana bakalamba abacetekelwa abakushiwa bwino mu kulamuka, lwa ku mubili, na mu nkuntu.”

E co abafyashi na bakasambilisha bakwata ubuyo bumo bwine, ubwa kuletako imisepela iyo pa numa ikaba bantu bakalamba abakosoka kabili abashikatala abaipakisha ubumi kabili abengaba na  maka ya kulinga mu bwikashi muntu baikala.

Nangu cibe fyo, impika shilema lintu abafyashi bafilwa ukubombela pamo na bakasambilisha. Abafyashi bamo, ku ca kumwenako, tabayangwako mu kukumanina ku masomo ya bana babo; bambi besha ukucimfyanya na bakafundisha. Ukulanda pa lwa iyi mibele, inyunshipepala ya ciFrench imo yatile: “Kafundisha tali na kabili e kensha eka fye uwa ngalaba. Abafyashi, pa koobelwa ku kufwayo mwana wabo ukutunguluka, balasokota mu fitabo fya ku sukulu, ukupingula no kulengulule misambilishishe, kabili mu kupumikisha balakalifiwa ku matoni ya pa nshi aya bana babo.” Incitilo sha musango yo kuti shaingilila mu nsambu sha bakafundisha.

Inte sha kwa Yehova bayumfwa ukuti abana babo balabombelwa bwino lintu abafyashi babombela pamo na bakasambilisha, ukukwato buseko bwacincila, ubwa kwaafwa mu masomo ya bana babo. Balisumino kuti ukubombela pamo ukwa musango yo, kwaliba ukucilisha ukwacindama pa mulandu wa kuti incito yenu pamo nga bakasambilisha naicililako ukube yakosa.

Apantu amasukulu yabelebesha ifyaba mu bwikashi muntu yasangwa, kanshi tayacingililwa ukufuma ku mpika sha mu bwikashi mu cinkumbawile. Impika sha kwangalila pamo nashikoselako mu kupita kwa myaka. Ukulondolola imibele mwi sukulu limo mu United States, The New York Times yacitile lipoti ukuti: “Abasambi balasendama mu kalasi, balatiinya umo no munankwe mu nkuungu shakwate fibumba fyashilaulwapo, balasaalula abasambi basuma. . . . Mupepi fye na basambi bonse balebomba ne mpika shapala ukulela abana, ukusakamana abafyashi ababikwa mu cifungo no kulapusumuka ku lukaakala lwe bungwe. Pa bushiku ubuli bonse, mupepi na umo muli basano tesako ku sukulu.”

 Icicililepo kutulumusha cili ni mpika ya pa kati ka nko iya lukaakala lwa mu masukulu. Ukulwa kwa mu tushita mu tushita kabili ukupunkana no kusunkana fyalipyanikwapo no kulasa imfuti ukwa cibelesho no kulasa ku fyela. Ifyanso naficililako kube fyaseeka, ukusansa ukucililako kutapata, mu kuba na bana banono ukwalukila ku lukaakala mu kwangufyanya kwacilapo kabili pa mushinku wacepako.

Ukwabulo kutwishika, te calo icili conse icilolenkene ne mibele ya musango yo iya kutiinya. Nangu cibe fyo, bakasambilisha abengi mu kusaalala kwa calo balolenkana ne mibele iyalumbwilwe mu nyunshipepala ya ku France iya cila mulungu Le Point iyatile: “Kafundisha tali na kabili uwacindikwa; takwete ubulashi.”

Umusaalula wa musango yo ku bulashi uleta ubusanso ubwine bwine ku bana bonse. E co Inte sha kwa Yehova besha ukupampamika mu bana babo icumfwila no mucinshi ku bulashi, imibele iyibulila ilingi line mu masukulu ilelo.