Ilyo Yesu ashimikile abantu imbila nsuma pa mwaka umo ne myeshi 6, ali no kusala aba kubomba nabo. Ni bani aali no kusala? Ni bani aali no kusambilisha abali no kulatungulula icilonganino ca Bena Kristu? Pa kuti asale bwino, Yesu alefwaya Yehova amwafwe. E ico aile ku lupili pa kuti abe fye eka, kabili alipepele ubushiku bonse. Ilyo bwacele, Yesu aitile abasambi bamo no kusalapo abatumwa 12. Bushe walishiba amashina yabo? Amashina yabo ni aya; Petro, Andrea, Yakobo, Yohane, Filipi, Bartolomeo, Toma, Mateo, Yakobo mwana Alfeo, Tadeo, Simone, na Yuda Iskariote.

Aba 12 baleya na Yesu konse uko aleya. Pa numa ya kubasambilisha, alibatumine ukuya beka mu kubila imbila nsuma. Yehova alibapeele amaka ya kufumya ifibanda mu bantu na ukundapa abalwele.

Yesu aleita aba 12 ati abanankwe, kabili alibacetekele. AbaFarise balemona ukuti abatumwa bali fye bacabecabe no kuti bali abashasambilila. Lelo Yesu alibasambilishe ifya kubomba  bwino umulimo wabo. Bali no kuba na Yesu pa nshita iyacindama sana mu bumi bwakwe, pamo nga ilyo ashilafwa na lintu abuushiwe. Abengi pali aba 12 abo Yesu asalile, nabo bali bena Galili. Bamo balyupile.

Abatumwa bali abashapwililika kabili balelufyanya no kulufyanya. Inshita shimo balelanda ukwabula no kutontonkanya pa fyo balefwaya ukulanda, kabili balelufyanya na pa kupingula pa fintu. Inshita shimo tabaletekanya, baletalikana na pa wali uwacindamapo pali bena. Na lyo line bali abantu abasuma kabili balitemenwe Yehova. E babalilepo ukuba mu cilonganino ca Bena Kristu lintu Yesu abwelelemo ku muulu.