Ilyo fye Farao aumfwile ukuti abena Israele nabafuma mu Egupti, aebele abashilika bakwe ati: ‘Pekanyeni amaceleta ya nkondo pa kuti tubakonke! Kanshi nga tatwabasuminishe ukuti baye.’ Farao na bashilika bakwe balitendeke ukupepeka abena Israele.

Yehova e waletungulula abantu bakwe, akasuba alebomfya ikumbi e lyo ubushiku alebomfya umulilo. Alibatungulwile kuli Bemba wa Kashika no kubeba ati bapange umwa kwikala.

Lyena abena Israele bamwene Farao na bashilika bakwe baleisa. Abena Israele tabakwete ukwa kuya pantu bali pa kati, uku kwali bemba e lyo uku kwali abashilika abena Egupti. Abena Israele baebele Mose ati: ‘Walatwipaisha! Nga walitulekele fye mu Egupti.’ Lelo Mose abebele ati: ‘Mwitiina. Loleleni mwalamona ifyo Yehova alatupususha.’ Mose alicetekele sana Yehova!

Yehova aebele abena Israele ukufuma apo bapangile umwa kwikala. Mu nshita ya bushiku, Yehova aseseshe ikumbi no kulibika pa kati ka bena Egupti na bena Israele. Uko abena Egupti bali kwalifitile lelo ukwali abena Israele takwafitile.

Yehova aebele Mose ukuti atambalike ukuboko kwakwe pali bemba. Lyena Yehova alengele kwaba icimwela icikalamba icapupile  ubushiku bonse. Amenshi yalipaatukeene kabili pa kati ka bemba paishileba inshila. Abena Israele bapitile pa mushili uwauma, ninshi amenshi nayapanga icibumba uku no ku mpaka bafika ku lubali lumbi.

Abashilika ba kwa Farao nabo batendeke ukwenda pa mushili uwauma ukukonka abena Israele. Lyena Yehova alifulungenye abashilika abena Egupti. Amawilo ya maceleta yabo yalitendeke ukusokoka. Abashilika batendeke ukupunda ati: ‘Tiyeni tubutuke! Yehova e ulebafwa.’

Yehova aebele Mose ati: ‘Tambalika ukuboko kobe pali bemba.’ Apo pene fye amenshi yalibwelele na kabili muli bemba no kwipaya abashilika abena Egupti. Farao na balishika bakwe balifwile. Takwali nangu umo uwapuswike.

Abena Israele balilumbenye Lesa, balimwimbile ulwimbo abati: “Imbileni Yehova, pantu nacindikwa. Kabalwe no waninapo abapoosa muli bemba.” Ilyo baleimba ulu lwimbo, abanakashi baleshana no kushana ninshi balelisha no tuoma. Bonse bali ne nsansa pantu balilubwike.