Mose aebele Farao ati nshakeseko kuno na kabili. Nomba ilyo ashilaya, Mose aebele Farao ati: ‘Pa kati ka bushiku umwana onse ibeli mu Egupti ali no kufwa, ukutendekela fye ku mwana wa kwa Farao ukufika fye na ku mwana wa musha umwina Egupti.’

Yehova aebele abena Israele ukwipika ifya kulya ifyaibela. Abebele ati: ‘Mwipaye impaanga iilume nelyo imbushi iili fye no mwaka umo, kabili mubule umulopa wa iyo nama no kuushinga pa nceshi shibili isha pa mwinshi e lyo na pa mwalo wa pa mwinshi. Moce inama kabili muliile pamo no mukate uushatutumuka. Mufwale ifya kufwala ne nsapato, kabili muipekanye ukuya pa bulendo. Lelo ubushiku, nalamulubula.’ Ala abena Israele balitemenwe icine cine!

Pa kati ka bushiku, malaika wa kwa Yehova aile mu mayanda yonse aya bena Egupti. Pa mayanda apo bashabikile umulopa pa fiibi, abana amabeli balifwile. Lelo malaika aleciluka amayanda ayakwete umulopa pa fiibi. Abana amabeli aba bena Egupti bonse abakankaala na bapiina balifwile. Lelo tapaali umwana wa bena Israele uwafwile.

No mwana wa kwa Farao na o alifwile. E ico Farao alifililwe ukushipikisha. Apo pene fye aebele Mose na Aarone ati:  ‘Imeni. Fumeni muno. Kabiyeni kapepeni Lesa wenu. Sendeni ne nama shenu muleya!’

Mu nshita ya bushiku ninshi no mweshi naubalika, abena Israele balifumine mu Egupti ukulingana ne ndupwa shabo e lyo ne mikowa. Abena Israele abaume abafumine bali 600,000, pali na banakashi abengi na bana. Na bashali abena Israele balibakonkele pa kuti nabo balepepa Yehova. Abena Israele basukile balubulwa!

Pa kuti baleibukisha ifyo Yehova abalubwile, bali no kulalya ifya kulya fyaibela pa bushiku balubwilwe cila mwaka. Ifi ifya kulya balefita ati Ica Kucilila.