Mose aikele ku Midiani pa myaka 40. Alyupile kabili alikwete na bana. Bushiku bumo ilyo alecema impaanga mupepi no Lupili lwa Sinai, amwene icintu ica mupapwishe. Icimpusa calebilima lelo tacalepya! Ilyo Mose aileko pa kuti amone ifyalecitika, aumfwile ishiwi ukufuma mu cimpusa aliti: ‘Mose! Wipalama. Fuula insapato pantu apo wiminine pa mushilo.’ Yehova abomfeshe malaika pa kulanda na Mose.

Mose alitiinine ica kuti afimbile ica kufwala ku menso. Yehova amwebele ati: ‘Nimona ifyo abena Israele balecula. Nkabafumya mu Egupti no kubatwala ku calo icisuma. Niwe ukayabafumya mu Egupti.’ Ala Mose afwile alipapile ifyo Yehova amwebele!

Mose aipwishe ati: ‘Bushe abantu nga banjipusha ukuti nani akutumine, nkabeba shani?’ Lesa amwaswike ati: ‘Ukabebe ati Yehova, Lesa wa kwa Abrahamu, Lesa wa kwa Isaki kabili Lesa wa kwa Yakobo e untumine.’ Na kabili Mose aipwishe ati: ‘Inga ca kuti abantu bakaana ukukutika ifyo nkabeba?’ Pa kuti Yehova alange Mose ukuti ali no kumwafwa, amwebele ukupoosa inkonto yakwe pa nshi. Inkonto yasangwike insoka! Ilyo Mose aikete iyi nsoka ku mucila, yaishileba inkonto na kabili. Yehova atile: ‘Nga wacita ifi fine nakulanga, abantu bakasumina ukuti nine nkutumine.’

Mose atile: ‘Nshilanda bwino.’ Yehova amulaile ati: ‘Nkakweba ifya kulanda kabili Aarone umukalamba obe akakwafwa.’ Apo Mose alishibe ukuti Yehova akamwafwa, alisendele umwina mwakwe na bana no kuya ku Egupti.