Yehova aebele Samwele ati: ‘Kabiye ku ng’anda ya kwa Yese. Umo pa bana ba kwa Yese e uli no kuba imfumu ya Israele.’ E ico Samwele alimine no kuya ku ng’anda ya kwa Yese. Ilyo amwene umwana wa kwa Yese umukalamba, atontonkenye ati: ‘Uyu afwile e o Lesa asalile.’ Lelo Yehova aebele Samwele ati te o. Yehova amwebele ati: ‘Ine mona mu mutima nshimona fye ifyo umuntu amoneka ku nse.’

Yese aliletele abana bakwe abaume na bambi 6 kuli Samwele. Nomba Samwele aebele Yese ati: ‘Yehova tasalile nangu umo pali aba. Bushe walikwata abana na bambi abaume?’ Yese ayaswike ati: ‘Nalikwata na umbi, ni Davidi e mwaice pali bonse. Naya mu kucema impaanga.’ Ilyo Davidi aishile, Yehova aebele Samwele ati: “E uyu wine!” Samwele aitulwilile amafuta pa mutwe wa kwa Davidi, no ku musuba ukuti ku ntanshi akaba imfumu ya bena Israele.

Ilyo papitile inshita, abena Israele batendeke ukulwa na baPelishiti, kabili abaPelishiti balikwete umushilika ipaka ishina lyakwe ni Galyati. Cila bushiku Galyati aletumfya abena Israele. Alebilikisha ati: ‘Tumeni umwaume uwa kuti alwe na ine. Nga anjipaya ninshi tukaba abasha benu. Nomba nga namwipaya ninshi mukaba abasha besu.’

Davidi aile uko abashilika abena Israele bapangile inkambi, atwalile abakalamba bakwe ifya kulya, abali bashilika. Davidi alyumfwile ifyo Galyati alelanda, e lyo atila: ‘Nalalwa nankwe!’ Imfumu Shauli yamwebele ati: ‘Te kuti ulwe nankwe uli mwaice.’ Davidi ayaswike imfumu ati: ‘Yehova akangafwa.’

 Shauli apeele Davidi ifya kufwala fyakwe ifya kulwilamo, lelo Davidi aebele Shauli ati: ‘Nalafilwa ukulwa nga nafwala ifi fya kufwala.’ Davidi abulile icisukushilo no kuya ku mumana. Asalile amabwe 5 ayatelela no kuyabika mu kacola. Lyena Davidi aile alebutuka ukuya ukwali Galyati. Galyati abilikishe ati: ‘Isa kuno mwaice. Nalakupeela ku fyuni na ku nama pa kuti filye umubili obe.’ Lelo Davidi tatiinine. Na o abilikishe ati: ‘Uleisa kuli ine no lupanga ne fumo, lelo ine ndeisa kuli iwe mwi shina lya kwa Yehova. Taulelwa na ifwe; ulelwa na Lesa. Bonse balamona ukuti Yehova alikwata amaka ukucila ulupanga ne fumo. Lesa alepeela imwe bonse mu minwe yesu.’

Davidi abulile ilibwe no kulibika mu cisukushilo kabili alilisukwise na maka. Yehova alimwafwile, ilibwe ilyo asukwise lyaingile pa mpumi ya kwa Galyati. Ili paka lyaliwile pa nshi no kufwa lyafwa. Lyena abaPelishiti balibutwike pantu baletiina ukubepaya. Bushe walicetekela Yehova nga filya Davidi amucetekele?