Ubuteko bwa bena Asiria bwalipokele ubufumu bwa mikowa 10 ubwa bena Israele. Sankeribu imfumu ya bena Asiria alefwaya no kupoka ubufumu bwa mikowa ibili ubwa baYuda. E ico atendeke ukupoka imisumba ya baYuda umo na umo. Nomba umusumba alefwaisha ukupoka ni Yerusalemu. Lelo taishibe ukuti Yehova alecingilila umusumba wa Yerusalemu.

Hisekia, imfumu ya baYuda alilipiile Sankeribu indalama ishingi sana pa kuti e kapoka Yerusalemu. Nangu ca kuti Sankeribu alipokele indalama, alitumine abashilika aba maka ukuyasansa Yerusalemu. Ilyo abena Asiria balepalamina ku musumba, abantu mu Yerusalemu balyumfwile umwenso. Lyena Hisekia abebele ati: ‘Mwitiina. Nangu ca kuti abena Asiria balikosa, Yehova ali no kutukosha ukubacila.’

Sankeribu atumine Rabsake ku Yerusalemu ku kweba abantu amashiwi ya kubatiinya. Rabsake aiminine ku nse ya musumba kabili atendeke ukulanda ati: ‘Yehova te kuti amwafwe. Mwileka Hisekia amubepe. Takwaba lesa uwingamucingilila kuli ifwe.’

Hisekia alipwishe Yehova ifyo alingile ukucita. Yehova amwaswike ati: ‘Wileka ifyo Rabsake alelanda filenge ube no mwenso. Sankeribu takapoke Yerusalemu.’ Pa numa, Sankeribu alilembeele Hisekia amakalata. Amulembeele ati: ‘Cimba fye pantu Yehova te kuti akupusushe.’ Hisekia apepele ati: ‘Twapapaata mwe Yehova tupususheni pa kuti abantu bonse beshibe ukuti imwe mweka ni mwe Lesa wa cine.’ Yehova amwebele ati: ‘Imfumu ya bena Asiria tayakesemo mu Yerusalemu. Nkacingilila umusumba wandi.’

Sankeribu alemona ukuti tapali na kupita inshita ali no kupoka Yerusalemu. Lelo bushiku bumo mu nshita ya bushiku, Yehova atumine malaika ku nse ya  musumba uko abashilika abena Asiria baleele. Malaika aipeye abashilika 185,000! Abashilika bonse aba maka abo Sankeribu akwete balifwile. E ico alifililwe ukupoka Yerusalemu, kabili alibwelelemo uko afumine. Yehova alicingilile Hisekia na Yerusalemu, nga fintu alaile. Nga ca kuti waleikala mu Yerusalemu ilyo ifi fyalecitika, bushe nga walitetekele Yehova?