ABASHALI mu cibwato, balikonkenyepo ukucita ifyo balecita inshiku shonse. Tabasumine ukuti Ilyeshi lyali no kwisa. Ilyo Noa aingile mu cibwato, bafwile balicililepo ukumuseka. Lelo tapakokwele, balilekele ukuseka.

Bamwene fye imfula yatendeka ukuloka. Imfula yalepongoloka kwati menshi yalefuma mu mbeketi. Ifyo Noa alelanda fyali fya cine! Lelo pali ilya inshita takwali nangu umo uo Lesa ali no kusuminisha ukwingila mu cibwato. Yehova alikomeneko ku ciibi.

Mu nshita fye iinono amenshi yali konse konse. Amenshi yali kwati ya mu mimana iikalamba. Yanukwile imiti no kukunkulusha ifimabwe ifikalamba, kabili yalepanga sana icongo. Abantu bali no mwenso. Babutukiile ku mpili. Baile baleiseka pa kukanaumfwila ilyo Noa alebeba ukwingila mu cibwato ninshi iciibi cicili icaisuka! Lelo tapali ifyo baali no kucita pali ilya nshita.

Amenshi yalefulilako fye. Imfula yalokele pa nshiku 40, akasuba no bushiku. Amenshi yalefulilako fye ica kuti ne mpili ishitali shalibiile. E ico nga filya fine Lesa asosele, abantu bonse abashali mu cibwato, kumo ne nama balifwile. Lelo bonse abali mu cibwato ukubikako fye ne nama, tabafwile.

Noa na bana bakwe balicitile bwino ukupanga icibwato. Amenshi yalimishe icibwato ica kuti cale-elela fye pa menshi. Bushiku bumo, ilyo imfula yalekele ukuloka, akasuba kalitulile. Pa calo palyalwike! Amenshi yaiswile icalo conse. Icalemoneka fye, cibwato icale-elela pa menshi.

Amapaka yonse yalifwile. Kanshi tayali no kulacusha abantu na kabili. E lyo abanakashi abafyele amapaka na bantu bonse abalecita ifyabipa, nabo balifwile. Lelo cinshi cacitike kuli bamalaika abafyele aya mapaka?

Bawishi ba yalya amapaka tabali bantu nga ifwe. Bali ni bamalaika abafumine ku muulu no kwisaikala pe sonde kwati bantu. Kanshi ilyo Ilyeshi lyaishile, bena tabafwile. Bashile imibili ya buntu iyo baipangile, no kubwelela ku muulu muli bumalaika. Lelo Lesa tabasuminishe ukwingila mu lupwa lwakwe ulwa bamalaika. E ico basangwike bamalaika ba kwa Satana. Baibolo ibeta ati ifibanda.

Lesa nomba alengele umwela ukupuupa pe sonde, kabili amenshi yatendeke ukukama. Pa numa ya myeshi 5, icibwato caileikala pa muulu wa lupili. Ilyo papitile inshiku na shimbi, abali mu cibwato nga balengela pa nse balemona pa muulu wa mpili. Amenshi yaile fye yalekama.

Kabili Noa alekele icuni cafiita ico beta ati mwankole ukupupuka ukufuma mu cibwato. Califumine kabili pa numa ya nshita iinono calibwelele ku cibwato pantu tacasangile apa kwikala. Caleti caya cabwela kabili nga cabwela, caleikala pa cibwato.

Noa alefwaya ukumona amenshi nga nayakama pe sonde, e ico nomba atumine inkunda ukufuma mu cibwato. Lelo inkunda na yo yalibwelele pantu tayasangile apa kwikala. Noa atumine inkunda umuku wa bubili, kabili yaishile naisuma ibula lya muolife. Ilyo Noa amwene ifi, alishibe ukuti amenshi nayacepa. Na kabili Noa atumine inkunda umuku walenga butatu, ili lyena yasangile amenshi nayakama.

Lesa nomba aebele Noa ati: ‘Fuma mu cibwato pamo no lupwa lobe e lyo ne nama shonse.’ Baikele mu cibwato ukucila pa mwaka umo. Kanshi bafwile balitemenwe sana ilyo bafumine pa nse no kuti bali aba mweo!