BUSHE naumona abo Dina aleya mu kutandalila? Aleya mu kutandalila abakashana abena Kanaani. Bushe wishi,Yakobo kuti atemwa ukumumona aya kuli aba bakashana? Pa kwasuka ici cipusho, tala ibukisha ifyo Abrahamu na Isaki balemona abakashana abena Kanaani.

Bushe Abrahamu alefwaya Isaki umwana wakwe ukuupa umwina Kanaani? Awe iyo. Bushe Isaki na Rebeka balefwaya ukuti Yakobo ope umwanakashi umwina Kanaani? Awe. Bushe nawishiba umulandu?

Pantu abena Kanaani balepepa balesa ba bufi. Tabali bantu abasuma ukuupa nangu ukuupwako nelyo ukwangala nabo ifibusa. Kanshi ukuti Yakobo tatemenwe ukumona umwana wakwe aleangala na bakashana abena Kanaani.

Dina asukile ailetelela. Bushe naumona umwaume umwina Kanaani pa cikope, uulelolesha Dina? Ishina lyakwe ni Shekemu. Bushiku bumo ilyo Dina aile mu kutandalila abena Kanaani, Shekemu amupatikishe ukulaala nankwe. Ico calilubene pantu umulume no mukashi e bafwile fye ukucita ifyo bacitile. Ifyo Shekemu acitile kuli Dina fyaliletele amafya na yambi.

Ilyo Simeone na Lebi, ba ndume ya kwa Dina baumfwile ifyacitile Shekemu, balikalipe sana ica kuti babuulile amapanga no kuya ku musumba wa bena Kanaani. Awe bafikile fye no kwipaya Shekemu na baume bambi bonse fye. Yakobo alifulilwe sana pa fyo abana bakwe bacitile.

Cinshi calengele kube aya mafya? Ni co Dina aleangala na bantu abashaleumfwila amafunde ya kwa Lesa. Bushe kuti cawama ukwangala na bantu ba musango uyu?