LOTE no lupwa lwakwe baikele pamo na Abrahamu mu calo ca Kanaani. Bushiku bumo Abrahamu aebele Lote ati: ‘Incende ino yacepa iya kuti twikalepo ne fitekwa fyesu fyonse. Kanshi natupaatukane. Iwe nga waya ku cifulo cimo na ine ndeya ku cifulo cimbi.’

Lote aloleshe Icitungu ca Yordani no kumona ukuti yali ni mpanga iisuma iyali na menshi ayengi ne cani icisuma ku fitekwa fyakwe. E ico Lote no lupwa lwakwe baile mu kwikala kulya. Mu kuya kwa nshita basukile baikala mu musumba wa Sodomu.

Abantu ba mu Sodomu bali ababi icine cine. Ici calekalifya Lote pantu ali umuntu umusuma. Na Lesa wine tatemenwe ifyalecita aba mu Sodomu. Lesa asukile atuma bamalaika babili ukusoka Lote ukuti aali no konaula Sodomu no musumba wali mupepi uwa Gomora pantu abantu balicililemo ukucita ifyabipa.

Bamalaika baebele Lote ati: ‘Endesha! Senda umukashi obe na bana bobe babili abanakashi no kufuma muli uno musumba!’ Lote no lupwa lwakwe balewayawaya pa kufuma mu musumba, e ico bamalaika babekete pa maboko no kubafumisha ku nse ya musumba. E lyo umo pali bamalaika atile: ‘Butukeni no kupususha imyeo yenu! Mwilolesha ku numa. Butukileni ku mpili pa kuti mwifwa.’

Lote na bana bakwe balyumfwilile kabili balibutwikemo mu Sodomu. Batwalilile fye ukubutuka kabili tabaloleshe ku numa. Lelo muka Lote ena taumfwilile. Ilyo balebutuka, tabafikile no kutali, muka Lote aloleshe ku numa no kusanguka impinda ya mucele. Bushe naumumona pa cikope?

Kuti twasambililako fimo ku fyacitikile muka Lote. Tusambililako ukuti Lesa alapususha abamumfwila, lelo abashimumfwila te kuti abapusushe.