ILYO Mose abwelele ku Egupti, aebele Aarone munyina pa fipesha amano fyonse ifyo Yehova amulangile. Pa numa, Mose na Aarone balangile abena Israele ifipesha amano, kabili abantu bonse balisumine ukuti ca cine Yehova e ubatumine.

Lyena Mose na Aarone baile kuli Farao. Bamwebele ati: ‘Yehova, Lesa wa bena Israele asosa ati, “Leka abantu bandi baye mu matololo pa nshiku shitatu, pa kuti baye mu kumpepa.”’ Lelo Farao ayaswike ati: ‘Nshamwishiba Yehova, kabili nshaleke abena Israele ukuya.’

Farao alikalipe sana pantu abena Israele balefwaya ukuleka ukubomba pa kuti baye mu kupepa Yehova. E ico abapeelelepo imilimo na imbi iyakosa. Abena Israele bali-ilishenye abati, Mose e walenga ukuti batendeke ukubacusha. Ici calengele Mose ukumfwa ububi sana. Lelo Yehova aebele Mose ukukanasakamana. Atile: ‘Nalalenga Farao ukusuminisha abantu bandi ukuya.’

Mose na Aarone na kabili baile kuli Farao. Ili lyena bailelanga Farao icipesha amano. Aarone apoosele inkonto yakwe pa nshi, kabili yasangwike insoka iikulu. Lelo abantu ba kwa Farao abo aleita ati aba mano nabo bapoosele inkonto shabo pa nshi, kabili shasangwike insoka. Awe inkonto ya kwa Aarone yatendeke ukumina insoka sha bantu ba kwa Farao. Na lyo line, Farao tasuminishe abena Israele ukuya.

Nomba Yehova alefwaya ukulanga Farao ukuti alikwata amaka. Bushe nawishiba ifyo Yehova acitile? Aletele ifinkunka 10 pa bena Egupti.

Pa numa ya finkunka ifingi, Farao aitile Mose no kumweba ati, ‘Fumya pali ine icinkunka kabili na ine nalasuminisha abena Israele ukuya.’ Lelo icinkunka nga caleka, Farao talebasuminisha ukuya. Lelo pa numa ya cinkunka calenga 10, Farao asuminishe abena Israele ukuya.

Bushe ifinkunka fyonse 10 walifishiba? Natusambilile pali ifi finkunka pe bula likonkelepo.