MONA ifyo uyu mwaume aleshiika mwi tenti! Aleshiika ica kufwala icisuma ne cipimfya ca golde e lyo na silfere. Afifumishe mu musumba wa Yeriko. Lelo finshi balingile ukucita ku fipe bafumishe mu Yeriko? Bushe uleibukisha?

Ifi fipe fyali no konaulwa kabili balingile ukubika golde na silfere mu ca kusungilamo icuma icali mu cikuulwa ca kupepelamo Yehova. Kanshi aba bantu balibembukiile Lesa. Baibile ifipe fya kwa Lesa. Uyu umwaume uuleshiika ifi fipe ni Akani kabili ali na ba mu lupwa lwakwe. Natulande pa fyacitike.

Ilyo Akani aibile ifi fipe, Yoshua atumine abaume bamo ku kulwa na ba mu musumba wa Ai. Lelo balibacimfishe. Bamo balibepeye e lyo abashele balibutwike.Yoshua alifulilwe sana. Aleele pa nshi ubukupeme no kupepa kuli Yehova ati: ‘Cinshi mwalekela ici cintu ukucitika?’

Yehova amwaswike ati: ‘Ima! Abena Israele nababembuka. Nabasenda ifipe fimo ifilingile ukonaulwa ne fyo balingile ukubika umwa kupepela Yehova. Nabeba ica kufwala icisuma no kucifisa. Nshamupaale mpaka muconaule no kwipaya uwibile ifi fintu.’ Yehova aebele Yoshua ukuti alamulanga uwibile.

E ico Yoshua alongenye abantu bonse kabili Yehova asokolwele ukuti Akani e mpuupu. Akani atile: ‘Nimembuka. Nacimona ica kufwala icisuma ne cipimfya ca golde e lyo na silfere. Nalefifwaisha e co nafisendeele. Nafishikiile mwi tenti e mo mwalafisanga.’

Ilyo basangile ifi fipe no kufitwala kuli Yoshua, Yoshua aebele Akani ati: ‘Ninshi waleetela amafya pali ifwe? Yehova alakukanda!’ Abantu bonse bapoolele Akani amabwe kumo na ba mu lupwa lwakwe kabili bonse balifwile. Bushe ifi tafilanga ukuti tatulingile ifipe ifishili ifyesu?

Lyena abena Israele baile mu kulwa na bena Ai na kabili. Pali iyi nshita Yehova alyafwile abantu bakwe mu nkondo kabili balicinfishe.