MONA ifisabo aba baume bakwete. Mona imyangashi ubukulu iyo bakwete! Abantu babili e bakwanishe ukusenda ifi fisabo pa mabeya. Mona ne mikunyu na mapomegranate. Ni kwi ifi fisabo fyafumine? Ni ku calo ca Kanaani. Nga uleibukisha, ku Kanaani e ko Abrahamu, Isaki na Yakobo baleikala pa inshita imo. Lelo pa mulandu wa cipowe caliko, Yakobo no lupwa lwakwe balikuukile ku Egupti. Pa numa ya myaka 216, Mose atungulwile abena Israele ukubwelela ku Kanaani. Pa numa ya kwenda, bafikile mu matololo pa cifulo icaleitwa ati Kadeshi.

Abantu abaleikala mu calo ca Kanaani bali ababi. E ico Mose atumine inengu 12, no kusheba ati: ‘Kalenguleni impendwa ya bantu abekala mu Kanaani, no kumona nga balikosa nelyo iyo. Mukayemona no mushili nga usuma ukulimamo ifintu. Kabili mukaleteko ne fisabo.’

Ilyo inengu shabwelele ku Kadeshi shaebele Mose ati: ‘Icalo cisuma nga nshi.’ Nomba pa kuti Mose ashininkishe, shamulangile ifisabo fimo. Lelo pa nengu atumine ukuyalengula icalo, pali inengu 10 ishatile: ‘Abantu bekala muli cilya calo mapaka kabili ba maka. Bakayatwipaya nga twayako.’

Abena Israele balitiinine ilyo baumfwile ici. Batile: ‘Nga caliweme twafwila mu Egupti nelyo muno mwine mu matololo. Uku tuleya bakayatwipaya mu bulwi, no kusenda abakashi besu na bana besu. Natusale intungulushi imbi tubwelele ku Egupti, Mose ena tatulemufwaya!’

Lelo pa baile mu kulengula icalo, pali babili abacetekele Yehova abale-esha ukukoselesha abantu. Na mashina yabo ni Yoshua na Kalebu. Bena batile: ‘Mwitiiina. Yehova ali na ifwe. Tatwakafilwe ukupoka ici calo.’ Lelo abantu tabaumfwile. Balefwaya no kwipaya Yoshua na Kalebu.

Ici calengele Yehova ukukalipa sana ica kuti aebele Mose ati: ‘Tapali umuntu nangu umo pa ba myaka 20 no kucilapo uukengila mu calo ca Kanaani. Balimona ifipesha amano ifyo nacitile mu Egupti na mu matololo, lelo tabancetekele. E ico bakenda mu matololo pa myaka 40 mpaka fye umuntu wa kulekeshako akafwe. Yoshua fye na Kalebu e bakengila mu calo ca Kaanani.’