MOSE alefwaya ukuya ku Kanaani na bena Israele. E ico aipwishe Yehova ati: ‘Mwe Yehova lekeni njabuke Umumana wa Yordani no kumona icalo icisuma.’ Lelo Yehova atile: ‘Fyafula ifyo wasosa! Wilandapo na kabili pali ili lyashi!’ Bushe nawishiba ico Yehova alandiile ifi?

Ni pa mulandu wa cacitike ilyo Mose aumine pa cilibwe ku nkonto. Ibukisha ukuti Mose na Aarone tabacindike Yehova. Tabaebele abantu ukuti Yehova e wafumishe amenshi mu cilibwe. E calengele Yehova ukulanda ati Mose takengile mu calo ca Kanaani.

E ico pa numa ya myeshi iinono ukutula apo Aarone afwilile, Yehova aebele Mose ati: ‘Ita Yoshua, kabili leka eminine pa ntanshi ya kwa Eleasari shimapepo na pa ntanshi ya bantu. Kabili webe abantu bonse ukuti Yoshua nomba e ntungulushi yabo.’ Mose acitile filya fine fye Yehova amwebele, nga fintu ulemona pa cikope.

Lyena Yehova aebele Yoshua ati: ‘Kosa, kabili witiina. Ni we ukengisha abena Israele mu calo ca Kanaani ico nabalaile ukuti bakekalamo, kabili nkalaba na iwe.’

Pa numa, Yehova aebele Mose ukuniina pa muulu wa Lupili lwa Nebo ulwali mu calo ca Moabu. Ilyo Mose aninine pa lupili, alimwene icalo ca Kanaani icisuma icali kwi shilya lya Mumana wa Yordani. Yehova atile: ‘Ici e calo ico nalaile ukupeela abana ba kwa Abrahamu, Isaki, na Yakobo. Ndefwaya fye ucimone, lelo iwe tawakengilemo.’

Palya pene pa Lupili lwa Nebo e po Mose afwililile. Ali ne myaka 120, lelo amaka yena alikwete na menso yakwe yalemona fye bwino. Abantu bali no bulanda sana kabili balililile ilyo Mose afwile. Lelo balitemenwe sana ilyo babapeele Yoshua ukuti abe intungulushi yabo.