BUSHE naumumona uyu umwaice uulemoneka bwino? Ishina lyakwe ni Samwele. No mwaume uumwikete pa mutwe, ni Eli, shimapepo mukalamba uwa mu Israele. Wishi Elkana, na nyina, Hana e batwele Samwele kuli Eli.

Apa Samwele ninshi ali ne myaka nalimo 4 nelyo 5. Lelo atendeke ukwikala na Eli, e lyo na bashimapepo bambi pe tempele lya Yehova. Cinshi Elkana na Hana batwaliile umwana umunono ifi ku kubombela Yehova pe tempele? Natumone.

Imyaka iinono ku numa, Hana ali no bulanda sana. Ne calengele abe no bulanda, ni co talekwata abana, kabili alefwaisha sana umwana. E ico bushiku bumo ilyo Hana aile kwi tempele lya kwa Yehova, apepele ati: ‘Mwe Yehova, mwindaba! Nga mwampeela umwana, ndemulaya ukuti nkamupeela kuli imwe pa kuti akalemubombela ubumi bwakwe bonse.’

Yehova alyaswike ipepo lya kwa Hana, kabili pa numa ya myeshi iinono, aishilekwata umwana umwaume, uo ainike ati Samwele. Hana alitemenwe sana umwana wakwe, kabili atendeke ukumusambilisha pali Yehova ninshi acili umunono sana. Aebele umulume wakwe ati: ‘Samwele nga akulako panono, nkamutwala kwi tempele ku kubombela Yehova.’

Ifi fine e fyo Hana na Elkana bacitile, nga fintu tulemona pa cikope. Apo Samwele balimusambilishe bwino sana ku bafyashi bakwe, alyumfwile bwino ukulabombela Yehova pe tempele. Cila mwaka Hana na Elkana baleya mu kupepa pali cilya cifulo ca kupepelamo, no kutandalila umwana wabo. Kabili cila mwaka, Hana aletwalila Samwele ica kufwala icipya ico alemupangila.

Mu kupita kwa nshita, Samwele alitwalilile ukubombela pe tempele lya kwa Yehova, kabili abantu na Yehova wine balimutemenwe sana. Lelo Hofini na Finehasi, abana ba kwa shimapepo mukalamba, Eli tabali abana abasuma. Balecita ifyabipa ifingi sana, no kulenga abantu bambi belaumfwila Yehova. Eli alingile ukubafumyapo pali bushimapepo, lelo tacitile fyo.

Samwele uwacaice talekele ukubombela Yehova pe tempele pa mulandu wa fyabipa ifyalecitika palya. Lelo Yehova talelanda na bantu pantu pali ilya nshita, abantu abatemenwe Yehova bali fye abanono. Umfwa ifyacitike ilyo Samwele akulileko.

Ilyo Samwele ali mu tuulo mwi tempele aumfwile ishiwi lyamwita. Ayaswike ati: ‘Ndi pano mukwai.’ Kabili alibuukile no kubutukila kuli Eli no kumweba ati: ‘Naumfwa mwacinjita, ndi pano mukwai.’

Lelo Eli ayaswike ati: ‘Awe nshacikwita; kabiye kasendame.’ E ico Samwele alibwelele mu kulaala.

Lyena aumfwile bamwita na kabili ati: ‘Samwele!’ Na kabili alimine no kubutukila kuli Eli. Atile: ‘Naumfwa mwanjita, ndi pano mukwai.’ Lelo Eli ayaswike ati: ‘Awe, nshikwitile, mwana wandi. Kabiye kalaale.’ E ico Samwele aile mu kulaala.

Aumfwile ishiwi umuku walenga butatu lyaita na kabili ati: ‘Samwele!’ E ico Samwele abutukiile kuli Eli no kumweba ati: ‘Naisa, uno muku wena, namunjita.’ Eli alishibe ukuti afwile ni Yehova walemwita. Awe aebele Samwele ukuti: ‘Kabiye na kabili ulaale. Nga akwita na kabili, ulande ati: “Landeni, mwe Yehova, pantu umubomfi wenu aleumfwa.”’

Ifi fine e fyo Samwele alandile ilyo Yehova amwitile na kabili. Lyena Yehova aebele Samwele ukuti akakanda Eli na bana bakwe. Pa numa Hofini na Finehasi balibepeye ilyo abena Israele baile mu kulwa na baPelishiti, kabili ilyo Eli aumfwile ukuti nabafwa, aliwile ukufuma pa cipuna, no mukoshi wafunika, afwa no kufwa. Kanshi ifyo Yehova asosele fyalicitike.

Samwele alikulile aba na kapingula wa kulekeleshako mu Israele. Ilyo akulile, abantu bamwipwishe ati: ‘Tusalile imfumu ya kututeka.’ Samwele talefwaya ukubasalila imfumu pantu Yehova e wali imfumu yabo. Lelo Yehova aebele Samwele ati acite ifyo abantu bamwebele.