BUSHE naucishiba ici cili apa? Ca kupepelamo Yehova. Citwa no kuti icikuulwa ca mushilo. Abantu bapwishishe ukucipanga pa numa ya mwaka umo ukutula apo bafumine mu Egupti. Bushe walishiba uwabebele ukucipanga?

Ni Yehova. Ilyo Mose ali pa Lupili lwa Sinai, e lyo Yehova amwebele ifya kupanga icikuulwa ca kupepelamo. Atile balingile ukucipanga bwino pa kuti cilabafya ukucipangulula. Pantu balecipangulula no kucisenda pa kufuma ku cifulo cimo no kuya ku cifulo cimbi. E lyo nga bafika balecipanga na kabili. Yehova alefwaya ukuti cileyangukila abena Israele pa kucisenda.

Nga walolesha mu kamuputule akanono, walamonamo akabokoshi. Aka kabokoshi baleketa ati icipao ca cipangano. Pali ici cipao paali bamalaika nelyo bakerubi babili abapangilwe na golde. Umo ku lubali lumo e lyo umbi na o ku lubali lumbi. Lesa alilembele na kabili Amafunde Ikumi pa mabwe ayapaapaatala yambi pantu Mose alitobele aya kubalilapo. Kabili aya amabwe bayasungiile mu kati ka cipao ca cipangano. E mo balesungila no mutondo umwali mana. Nga uleibukisha, mana cinshi?

Aarone, munyina wa kwa Mose e o Yehova asalile ukuba shimapepo mukalamba. E waletungulula abantu mu kupepa Yehova. Abana bakwe nabo bali ni bashimapepo.

Nomba lolesha mu muputule umbi. Uyu muputule wena, ukalamba sana. Bushe naukamona akabokoshi apalefuuka icushi? Ici cipailo apo bashimapepo baleocela ifyalefumya icena icisuma ifyo baleita ati ifyanunkila. Muli ne ca kutekapo inyali apali inyali 7. Ne ca butatu icilimo, litebulo apo balesungila imikate 12.

Mu lubansa lwa cikuulwa ca mushilo mwaleba ibeseni ilikalamba umo balebika amenshi ayo bashimapepo balesambamo. Mwali ne cipailo icikalamba, apo baleocela inama baleipaya isho balepeela Yehova. Icikuulwa ca kupepelamo caleba pa kati ka nkambi, kabili abena Israele baleikala mu matenti yabo ayashingulwike ici cikuulwa.