SHAULI na kabili alefwaya ukwikata ati Davidi. Asendele abashilika 3,000 aba maka sana pali bonse no kuya mu kufwaya Davidi. Ilyo Davidi aumfwile ukuti balemufwaya, atumine inengu ukuyamona apo Shauli na bashilika bakwe balefwaya ukulaala ubushiku. E ico Davidi aipwishe abaume babili pabo ali nabo ati: ‘Nani pali imwe, uwalaya na ine kuli Shauli?’

Abishai atile: ‘Nalaya nenu.’ Abishai ali mwana wa kwa Seruya, nkashi ya kwa Davidi. Davidi na Abishai baile balebendelela no kuyafika apo Shauli na bashilika bakwe bali, ninshi nabalaala. Babuulile ifumo ne co Shauli alenwenako amenshi ifyali apepi fye no mutwe wakwe. Takwali nangu umo uwabamwene nelyo uwaumfwile ukuti nabesa, pantu bonse bali mu tulo.

Mona Davidi na Abishai pa cikope. Bali pa lupili. Nabafumapo apali Shauli ukwabula ukubepaya. Davidi abilikishe ku mukalamba wa bashilika ati: ‘Abnere, mulandu nshi taulecingilila imfumu, shikulu obe? Bushe ifumo lya mfumu ne ca kunwenako amenshi fili kwi?’

Shauli alibuukile. Alishibe ukuti ishiwi aumfwile lyali lya kwa Davidi. E ico, aipwishe ati: ‘Bushe ni we Davidi?’ Mona Shauli na Abnere pa cikope icili pe samba.

Davidi ayaswike ati: ‘Ee mwe mfumu.’ Kabili Davidi aipwishe Shauli ati: ‘Mulandu nshi mulefwaila ukunjikata? Cinshi nalufyanya? Ifumo lyenu ili, mwe mfumu. Tumeni uwa kwisasenda.’

Shauli atile: ‘Ndalufyanya. Ifyo ncita fibi.’ Apo pene David alifuminepo, e lyo Shauli na o alibwelelemo ku ng’anda. Lelo Davidi mu mutima atile: ‘Bushiku bumo Shauli akanjipaya. Mfwile ukubutukila ku calo ca baPelishiti.’ Ifi fine e fyo acitile. Davidi abepele abaPelishiti ukuti nomba e bo akula-afwa, nabo balimucetekele.

Ilyo papitile inshita, abaPelishiti baile mu kulwa na bena Israele. Shauli na Yonatani balibepeye mu nkondo. Ici calengele Davidi ukuba no bulanda sana. E co alembeele ulwimbo ulusuma, umo aimbile ati: ‘Ndi no bulanda sana pali iwe munyinane Yonatani. Nalikutemenwe sana!’

Pa numa, Davidi abwelele ku Israele mu musumba wa Hebrone. Abaume abasalile Ishiboshete umwana wa kwa Shauli ukuti abe imfumu batampile ukulwa na baume abalefwaya ukuti Davidi abe imfumu. Lelo abaume ba kwa Davidi basukile bacimfya. Davidi ali ne myaka 30 ilyo atendeke ukuteka. Atekele imyaka 7 na hafu mu Hebrone. Abana bakwe abafyalilwe mu Hebrone ni Amnone, Abishalomu na Adoniya.

Inshita imo Davidi na bantu bakwe baile mu kusansa umusumba uusuma uwa Yerusalemu. Yoabu, umwana wa kwa Seluya nkashi ya kwa Davidi e watungulwile abantu mu bulwi. E ico, Davidi alambwile Yoabu pa kulenga aba umukalamba wa bashilika bakwe. Pa numa ya nkondo, Davidi atendeke ukuteka mu musumba wa Yerusalemu.