MONA Samwele alepongololwela amafuta pa mutwe wa mwaume. Ifi e fyo balecita ku muntu pa kuti cishibikwe ukuti nabamusala ukuba imfumu. Yehova aebele Samwele ukupongolola amafuta pa mutwe wa kwa Shauli. Aya amafuta yalenunkila sana kabili e yo balepongolwela umuntu pa mutwe nga bamusala ukuba imfumu.

Shauli alemona kwati talingile ukuba imfumu. Aebele Samwele ati: ‘Ine ndi mwina Benjamini, umukowa uwacepesha mu bena Israele. Cinshi walandila ukuti nkaba imfumu?’ Yehova alitemenwe Shauli pantu taleimona ukuti mukalamba no kuti alicindeme. E co amusaliile ukuba imfumu.

Lelo Shauli taali umupiina kabili takwete umubili uunono. Afumine mu lupwa ulwali ulukankala kabili ali umutali e lyo alemoneka bwino sana. Ali umutali sana ukucila abena Israele bonse! Shauli ali uwa lubilo kabili ali uwa maka sana. Abantu balitemenwe sana ilyo Yehova asalile Shauli ukuba imfumu. Bonse batendeke ukupuunda ati: ‘We mfumu ukekale umuyayaya!’

Abalwani ba bena Israele baali aba maka sana. Baikalile fye ukucusha abena Israele. Kanshi ilyo Shauli bamusalile fye ukuba imfumu, abena Amone baile mu kulwa na bena Israele. Lelo Shauli alonganike abaume ba bulwi abengi kabili alicimfishe abena Amone. Ici calengele abantu batemwe Shauli, imfumu yabo.

Ilyo imyaka yaleyailepita, Shauli alyafwile abena Israele ukucimfya abalwani babo abengi. Shauli alikwete umwana. Ishina lyakwe ali ni Yonatani. Yonatani na o aleafwa sana abena Israele ukucimfya mu bulwi. Pali iyi nshita, ninshi abaPelishiti bacili balipata sana abena Israele. Bushiku bumo abaPelishiti abengi sana baile mu kulwisha abena Israele.

Samwele aebele Shauli ukulolela mpaka abwela no kwisapeela ilambo nelyo ubupe kuli Yehova. Lelo Samwele alikokwele ukubwela. Shauli alyumfwile sana umwenso ukuti abaPelishiti balatampa ukubalwisha, e ico abuulile ilambo no kupeela kuli Lesa. Ilyo Samwele aishile, aebele Shauli ati ico acitile tacaweme. Atile: ‘Yehova akasala umuntu umbi ukuba imfumu mu Israele.’

Kwali inshita na imbi ilyo Shauli akeene ukumfwila Lesa. E ico Samwele amwebele ati: ‘Ukumfwila Yehova kwawamapo ukucila ukumupeela impaanga iisuma. Apo wakaana ukumfwila Yehova, Yehova na o nakukaana ukuba imfumu ya bena Israele.’

Kuti twasambililako fimo kuli ici. Calicindama ukumfwila Yehova lyonse. Twasambililako no kuti, umuntu umusuma nga filya Shauli aali, kuti ayaluka no kuba umuntu uwabipa. Bushe kuti cawama na ifwe nga twatendeka ukucita ifyabipa?