BUSHE nawishiba ico uyu umuntu alelepawila ica kufwala cakwe? Yehova e wamwebele ukucilepaula. Uyu muntu ni Ahiya, kasesema wa kwa Lesa. Bushe kasesema ni nani? Muntu uo Lesa eba ifikacitika ku ntanshi ilyo fishilacitika.

Ahiya apa ninshi alelanda na Yeroboamu. Yeroboamu e o Solomone aebele ukulatungulula umulimo wa kukuula. Ilyo Ahiya akumene na Yeroboamu pa musebo, Ahiya acitile icintu ica kupapusha. Afuulile ica kufwala cakwe icipya no kucilepula mu tusalu 12. Aebele Yeroboamu ati: ‘Sendapo utusalu 10.’ Bushe nawishiba ico Ahiya apeelele Yeroboamu utusalu 10?

Ahiya alondolwele ati, Yehova akapoka Solomone ubufumu. Alandile no kuti akapeela Yeroboamu imikowa 10. Kanshi Rehoboamu, umwana wa kwa Solomone bamushililepo imikowa ibili iya kuteka.

Ilyo Solomone aumfwile ifyo Ahiya aebele Yeroboamu, alifulilwe sana. Alefwaya ukwipaya Yeroboamu. Lelo Yeroboamu abutukile ku Egupti. Papitile fye inshita inono, Solomone afwa. Atekele abantu pa myaka 40. Ilyo afwile, umwana wakwe Rehoboamu e watampile ukuteka. Ilyo Yeroboamu ali ku Egupti alyumfwile ukuti Solomone nafwa, e ico alibwelelemo ku Israele.

Rehoboamu taleteka bwino abantu. Alebacusha sana ukucila ne fyo wishi Solomone alebacusha. Yeroboamu na bantu bambi abacindama baile ku Mfumu Rehoboamu no kumweba ukuti afwile ukulateka bwino abantu. Lelo Rehoboamu taumfwile. Na kuba, e lyo umutima wakwe wabipileko. E ico abantu baebele Yeroboamu ukuba imfumu pa mikowa 10. E lyo Rehoboamu atwalilile ukuteka imikowa ibili, uwa kwa Benjamini no wa kwa Yuda.

Yeroboamu talefwaya abantu bakwe ukulaya ku Yerusalemu ku kupepa mwi tempele lya kwa Yehova. E ico apangile utwana twa ng’ombe tubili no kweba abantu ba mu bufumu bwa mikowa 10 ukuti e to balepepa. Papitile fye inshita iinono na bantu muli ici calo batendeka ukwipayana.

Na mu bufumu bwa mikowa ibili namo mwali amafya. Imfumu ya Egupti yailelwisha Yerusalemu ninshi ne myaka 5 tailakumana ukufuma apo Rehoboamu atendekele ukuteka. Imfumu ya Egupti yasendele ifyuma ifingi ifyali mwi tempele lya kwa Yehova. Kanshi itempele lyalyalwike pa numa ya nshita fye iinono ukufuma apo balikuulile.