Lesa atumine malaika Gabriele kuli Maria, umukashana uwali no mutima uusuma. Amwebele ati akakwata umwana uukateka umuyayaya. Uyu umwana, Yesu afyalilwe mwi cinka kabili umu mwine e mo abacemi bailemumwena. Pa numa, ulutanda lwatungulwile abaume abafumine ku Kabanga ukuya ukwali Yesu. Twalalanda pa walengele ukuti balya baume bamone lulya lutanda, e lyo ne fyo Yesu bamupuswishe ku balefwaya ukumwipaya.

Lyena twalalanda pali Yesu ilyo ali mwi tempele na bakasambilisha ninshi ali ne myaka 12. Pa numa ya myaka 18, Yesu alibatishiwe no kutendeka ukubomba umulimo wa kushimikila no kusambilisha pa Bufumu uo Lesa amwebele ukubomba pe sonde. Yesu asalile abatumwa 12 aba kumwafwa ukubomba uyu mulimo.

Alicitile ne fipesha amano ifingi. Aliishishe abantu abengi isabi no mukate ifyali fye ifinono. Aundepe abalwele no kubuusha abafwa. Na mu kulekelesha, twalalanda pa fintu ifingi ifyacitikile Yesu ilyo ashilafwa, ne fyo bamwipeye. Yesu ashimikile pa myaka itatu na hafu. Kanshi ICIPANDE 6 calalanda pa fyacitike mu myaka ukucilako pali 34.