BUSHE naumwishiba uyu umwana? Ni Yesu. Apa ninshi e lyo afyalwa fye. Afyalilwe mwi cinka. Mwi cinka e mo balesungila inama. Maria alaalike Yesu umo balebika ifya kulya fya mpunda ne nama shimbi. Lelo cinshi calengele Maria na Yosefe ukuba umwaleikala inama? Pantu icinka te cifulo icisuma ico umwana engafyalilwamo.

Icalengele babe muli cilya cifulo ni co kateka wa bena Roma, Kaisare Augusti apangile ifunde lya kuti umuntu onse alingile ukubwelela mu musumba afyalilwemo no kuyalembesha ishina. Yosefe afyalilwe mu Betelehemu. Lelo ilyo ena na Maria bafikile mu Betelehemu, takwali umuputule nangu umo umwa kwikala. E co bailile muli ici cifulo ne nama shabo. Kabili pali ubu bwine bushiku e lyo Yesu afyelwe! Lelo nga fintu ulemona, Yesu ali fye bwino.

Bushe naubamona bakacema abaleisa mu kumona Yesu? Baali mu mpanga ubushiku balecema impaanga shabo, e lyo ulubuuto lwabasanika. Ni malaika aile kuli bena! Bakacema balitiinine sana. Lelo malaika abebele ati: ‘Mwitiina! Ndefwaya ukumweba ilyashi ilisuma. Pa bushiku bwa lelo, mu Betelehemu namufyalwa Kristu, Shikulu. E ukapususha abantu! Mwalasanga akanya nabakapomba mu nsalu kabili kaleele mu ca kulilamo inama.’ Awe apo pene bamalaika bambi abengi balishile no kutendeka ukutasha Lesa. Bakacema balile bwangu bwangu mu kufwaya Yesu. Balimusangile. E aba bali apa.

Bushe walishiba ico Yesu acindamina sana? Bushe walimwishiba bwino bwino? Ibukisha ukuti mu lyashi lya kubalilapo muli lino ibuuku, twalisambilile pa Mwana wa kwa Lesa uwa kubalilapo. Uyu Umwana abombele pamo na Yehova ilyo alepanga umuulu ne calo na fyonse ifyabamo. Uyu Umwana tulelandapo, ni Yesu!

Yehova akuushishe ubumi bwa kwa Yesu ukufuma ku muulu no kububika mwi fumo lya kwa Maria. Ilyo line fye umwana atendeke ukukula mwi fumo lya kwa Maria nga filya fine abana bonse bakula mwi fumo lya banyinabo. Lelo uyu ena, ali Mwana wa kwa Lesa. Yesu asukile afyalwa mu Betelehemu. Afyalilwe umo balesungila inama. Bushe nomba wamona ico bamalaika batemenwe ilyo bale-eba abantu ukuti Yesu nafyalwa?